Filipenses 2:1-30
-
Jesusta catijcuna humildecuna canamanta (1-4)
-
Cristo humillarishcamanta, tucuicunata yalli jatunyachishca cashcamantapish (5-11)
-
Quishpiringapaj esforzarishpa catinamanta (12-18)
-
Achijyachij luz shinami achijyachincuna (15)
-
-
Pabloca Timoteotapish, Epafroditotapishmi cachasha nirca (19-30)
2 Cristo Jesushuan shuj shinalla cashcamanta shujtajcunata animangapaj, cꞌuyaihuan cushichingapaj, sustarishcata ricuchingapaj, cꞌuyaita ricuchingapaj, llaquij cashcata ricuchingapajpish esforzarichij.
2 Tandalla causaichij, caishuj chaishuj cꞌuyaita ricuchinacuichij. Cancunapaj ruraicunapipish, yuyaipipish shuj shinalla caichij. Chaita rurashpami cancunaca ñucataca yallitaj cushichinguichij.
3 Imata rurashpapish pꞌiñarishpalla, cancunallapi yuyashpallaca ama ruraichijchu. Ashtahuanpish shujtajcuna cancunata yalli cashcata yuyashpa humildecuna caichij.
4 Quiquinlla alli canataca ama mashcaichijchu. Ashtahuanpish shujtajcunapaj alli canatapish mashcaichij.
5 Cristo Jesús yuyashca shinallataj cancunapish yuyaichij.
6 Paica Dios shina cashpapish Diospajlla cashcata quichunataca mana yuyarcallapishchu. Dioshuan igual canatapish mana yuyarcachu.
7 Ashtahuanpish tucuita saquishpami shuj sirvij runa shina tucurca. Paica shujtaj runacuna shinallatajmi tucurca.
8 Ashtahuancarin shuj runa shina shamushpaca humillarishpami huañungacama Diosta cazurca. Ari, paica llaquichina caspipimi* huañurca.
9 Chaimantami Diosca paitaca tucuicunata yalli jatunyachirca. Shinallataj paita llaquishcamantami tucui shuticunamanta yalli shuj jatun shutitapish curca.
10 Diosca jahua pachapi cajcunapish, cai allpapi cajcunapish, pamba ucupi cajcunapish tucuicuna Jesuspaj shutita jatunyachichunmi chashna rurarca.
11 Yaya Diosta jatunyachingapajmi Jesucristo Amito cashcataca tucuicuna alli yachana can.
12 Cꞌuyashca huauqui panicuna, cancunaca mana ñuca chaipi cajllapichu cazunguichij. Ashtahuanpish ñuca mana chaipi cajpipish siempremi cazunguichij. Chaimanta cancuna quishpiringapajca manchaihuan, chujchuihuan esforzarishpa catichij.
13 Diosmi pai munashca shinallataj paipaj munaita rurachun cancunamanca munaitapish, fuerzatapish cushpa sinchiyachicun.
14 Ama quejarishpa, ama pꞌiñarishpa tucuita ruraichijlla.
15 Chashnami cancunaca pi mana juchachipaj jucha illajcuna canguichij. Shinallataj allita ruranata mana munaj cai punlla millai gentecunapaj chaupipi causacushpapish Diospaj huahuacuna cashcamantami tucuipi alli canguichij. Cancunaca shuj achijyachij luz shinami cai pachapica achijyachicunguichij.
16 Causaita cuj Diospaj shimipi sinchita chariraichij. Shinami ñucaca Cristopaj punllapi cushicusha. Ñucaca yangamanta callpaj runa shina, yangamanta sinchita trabajaj runa shina mana cashcataca yachanimi.
17 Ñucaca cancuna tucui shunguhuan Diosta sirvishpa catichun ayudangapajmi cancuna ruracushca sacrificio jahuapi vino ofrendata tallishca shina cani. Chaimantami cushilla cani, tucui cancunahuanmi cushicuni.
18 Chashnallataj ñucahuan cushicuchunmi cancunataca animani.
19 Amito Jesuspaj munai cajpica ñallami cancunapajman Timoteota cachasha. Chashnami Timoteo cancunamanta ñucaman parlajpica animarisha.
20 Pai shina allita rurajtaca pi shujtajta mana charinichu. Paimi tucui shunguhuan cancunamantaca sustarin.
21 Caishujcunaca paicunapaj allipajllami mashcancuna. Paicunaca Jesucristo munashcataca mana mashcancunachu.
22 Ashtahuanpish Timoteo allita ruraj cashcataca cancunaca yachanguichijmi. Paica shuj churi paipaj yayahuan sinchita trabajaj shinami alli huillaicunata huillangapaj sirvij runa shina sinchita ñucahuan trabajashca.
23 Chaimantami ñucahuan ima tucunata ña yachashpaca cancunapajman paita cachanata yuyacuni.
24 Amito Jesuspaj munai cajpica ñucapishmi cancunahuan casha.
25 Shinapish cunanca ñuca huauqui Epafroditotami cancunapajman cachagrini. Paica ñucata ayudaj, ñuca shinallataj Cristopaj soldadomi can. Paitami ñuca ima minishtishcapi ayudachun cancunaca cacharcanguichij.
26 Paica tucui cancunatami ricunata munan. Pai ungushca cashcata cancuna uyashcata yachaj chayashpami llaquilla can.
27 Yallitaj ungushca cashcamantami paica casi huañurca. Shinapish Diosmi paitaca llaquirca. Mana paillatachu llaquirca. Ashtahuanpish llaquicunata ama jahuanpi jahuanpi charichunmi ñucatapish llaquirca.
28 Chaimantami Epafroditotaca cancunapajman utca cachani. Chashnami paita ricushpa cancunaca cushicunguichij. Ñucapish cancunamanta ña mana tanto sustarishachu.
29 Ima shinami Amito Jesusta catijcunata cushicushpa chasquinguichij, chashnallataj paitapish cushicushpa chasquichij. Pai shina caj runacunataca achca valishca cashcata ricuchichij.
30 Paica Cristopaj obrata ruracushcamantami casi huañurca. Cancuna carupi cashpa ñucata mana ayudai tucushcamantami paica huañuna cashpapish ñucata ayudarca.
Notacuna
^ “Llaquichina caspi” shimita huasha diccionariopi ricui.
