1 Timoteo 2:1-15
-
Tucui laya gentecunamanta Diosta mañanamanta (1-7)
-
Shujlla Diosmi tiyan. Ari ninacushcapi ayudajpish shujllami (5)
-
Tucuicunata randishpami juchacunamanta cacharichirca (6)
-
-
Cꞌaricunaman, huarmicunaman cushca consejocuna (8-15)
-
Mana pinganayajta churarinamanta (9, 10)
-
2 Puntapica cantaca tucui laya gentecunamanta Diosta mañachunmi rogapani. Shinallataj paicunata Dios ayudachun tucui shunguhuan mañai. Paicunamantapish Diosta pagui ni.
2 Alli yuyaihuan causangapaj, tucui shunguhuan Diosta adorangapaj, tranquilo, sumajta causangapajca reycunamantapish, tucui mandajcunamantapish Diosta mañachunmi rogapani.
3 Caimi ñucanchijta Quishpichij Diospaj ñaupajpica alli, chasquinalla can.
4 Paica tucui laya gentecuna quishpirichun, mana llullata alli yachaj chayachunpishmi munan.
5 Shujlla Diosmi tiyan. Dios runacunahuan ari ninacushcapi ayudajpish shujllami tiyan. Paica Cristo Jesusmi. Paimi
6 mashna minishtirishcata pagashpa tucuicunata randishpa juchamanta cacharichingapaj paillataj curirca. Caimantaca parlana punllacuna chayajpimi gentecunaca parlangacuna.
7 Chaimantami ñucataca huillaj cachun, apóstol cachunpish Diosca agllarca. Shujtaj llajta gentecunaman feta charinamanta, mana llullamanta yachachichunmi chashna agllarca. Ñucaca verdadtami nini, mana llullanichu.
8 Tucui ladocunapi cꞌaricuna Diosta mañashpa catichunmi munani. Chuya shunguhuan maquicunata alzashpa, mana pꞌiñarishpa, mana rimanacushpa* mañachunmi munani.
9 Shinallataj huarmicunapish sumajta, mana pinganayajta, alli yuyaihuan churarichun. Tucui laya trenzacunatapish ama rurarichun, orotapish, perlacunatapish, achca valij churanacunatapish ama churarichun.
10 Ashtahuanpish tucui shunguhuan Diosta adoraj huarmicuna cashcamantaca sumajta churarij shina alli ruraicunata rurachun.
11 Huarmica paiman yachachicujpica upalla* uyashpa tucuita cazuchun.
12 Huarmica mana yachachinachu can. Cꞌaritapish mana mandanachu can. Ashtahuanpish upallami* cana can.
13 Diosca Adantami puntaca rurarca. Chai qꞌuipami Evataca rurarca.
14 Shinallataj Diabloca mana Adantachu umarca. Ashtahuanpish huarmitami umarca. Chaimi huarmica juchayuj tucurca.
15 Shinapish huarmica huahuacunata charishpami ima mana alli ruraicunapi mana urmanga. Chaipajca feta, cꞌuyaita, Diospaj ñaupajpi chuya cashcata, alli yuyaita charishcatami ricuchishpa catina can.
