Mana. Santocunata mana adoranachu canchij. Israel llajtaman Dios cushca leycunamanta parlashpami shuj enciclopedia libropica: “Bibliapi huaquin versocunata ricushpami santocunata mana adorana cashcata cuentata cunchij” nin (New Catholic Encyclopedia). Huaquin versocunamanta yachashun:

•   Éxodo 20:4, 5-pica: “Imaman rijchajcunatapish ama ruranguichijchu. Jahua pachapi cajcunaman rijchajtapish, cai pachapi cajcunaman rijchajtapish, yacu ucupi cajcunaman rijchajtapish, amataj ruranguichijchu. Chaicunataca ama cunguringuichijchu, amataj adoranguichijchu. Ñucami Mandaj cambaj Taita Dios cani. Ñucaca tucuita rurai tucuj Dios, ñucapajlla cachun munajmi cani” ninmi. Diosca “ñucapajlla cachun munajmi cani” nishpaca gentecuna imagencunata, santocunata, altarcunata adorachunca mana munaj cashcatami nin.

•   Isaías 42:8-pica Yaya Diosca: “Ñuca jatun canataca, pi shujtajman mana cushachu. Ñucata alabanapaj randi, rurashcalla dioscunata alabachun mana saquishachu” ninmi. Shinashpaca, paita alabangapaj rurashcalla dioscunata adorachunca Diosca mana munanchu. Israelitacuna Diosta adorangapaj shuj curi bizita rurajpica Diosca “millaitami ruracuncuna” nircami (Éxodo 32:7-9).

•   Hechos 17:29-pica: “Taita Dios curita, cullquita, rumita labrashpa gentecunapaj yuyaillamanta rurashca dios shina cana cashcataca mana yuyanachu canchij” ninmi. Panda religioncunapica ‘gentecunapaj yuyaillamanta rurashca dioscunatami’ adorashcacuna. Pero Diosta alli adorajcunamanta parlashpami Bibliapica “ñahuihuan ricushcataca mana caticunchijchu, crishcallapimi caticunchij” nin (2 Corintios 5:7).

•   1 Juan 5:21-pica: “Rurashcalla dioscunataca amataj adoranguichijchu” ninmi. Bibliapica Jehová Diosca israelitacunatapish, Jesusta catijcunamanpish rurashcalla dioscunata, santocunatapish ama adoranguichijchu nishpami mandarca.