Cambaj huahua huasipi cashpa ima ruranata mana charishpaca: “Aburridomi cani” ningachari. Chaipica: “Televisionta ricugri o videojuegocunahuan pugllagri” nishpachari mandangui. Pero amaraj chaita nishpa imata rurai tucushcata ricui.

•   Televisionllapi, videojuegocunallapi pasashpaca ashtahuanmi aburriringacuna. Robert shuti yayaca: “Huaquin huahuacunapajca televisionllapi, videojuegocunallapi pasashcamantami punllapi shujtaj cosascunata ruranaca aburrido ricurin” ninmi.

   Paipaj huarmi Barbarapish chashnallatajmi nin. Paica: “Ñucanchij causaipica imata rurangapajca yuyana, achcata esforzarinami minishtirin. Maipica ima resultadopish mana enseguida tiyanchu. Chaimantami televisionllapi o videojuegocunallapi pasaj huahuacunapajca shujtaj cosascunata ruranaca aburrido ricurin” ninmi.

•   Redes socialescunallapi pasashpaca llaquillami sintiringacuna. Huahuacunaca amigocuna imalla rurajta fotocunapi, videocunapi ricushpaca aburridomi sintiringacuna. Beth shuti shuj huahuaca: “Huaquinpica, tucuicunami divirtirishpalla pasancuna. Ñucallami huasipi pasani nishpami yuyai tucunchij” ninmi.

   Redes socialespi achca horascunata pasashpapish ima faltashcata shina y aburridomi sintiri tucunchij. Chris shuti shujtaj jovenca: “Redes socialescunapimi yallitaj ocuparishpa pasai tucunchij. Pero ultimotaca imata mana rurashcatami cuentata cunchij” ninmi.

•   Aburrido cashpami imata ruranata mashcangacuna. Katherine shuti shuj mamaca, huahuacuna aburrido cashpaca imata ruranatami munangacuna ninmi. Paica: “Huahuacunaca shuj cajonta japishpaca chai cajontaca recuerdocunata huaquichinatami rurai tucun. Mana cashpaca shuj carrota, shuj barcota, shuj coheteta rurashpami pugllangacuna. Y shuj sabanata japishpaca shuj carpa huasita rurashpami pugllangacuna” ninmi.

   Sherry Turkle psicóloga shuj huarmipish, aburrido cashpami “chꞌican chꞌican cosascunata ruranata munashun” ninmi. a Chaimantami, nunca mana aburrido pasanachu canchij mana ni tucunchij. Shinallataj Disconnected (Desconectados) nishca libropipish: “Ima shinami pesado cosascunata alsajpica ñucanchij musculocunaca sinchi tucun, shinallatajmi aburrido cashpa chꞌican chꞌican cosascunata ruranata yuyashpaca alaja cosascunata ruraj cai tucunchij” ninmi.

 Yuyari: Cambaj huahua aburrido cajpica chaica shuj problemami can nishpa mana yuyanachu cangui. Ashtahuanpish paicuna chꞌican chꞌican cosascunata rurachunmi can ayudai tucungui.

•   Pudirijpica huahuacuna canllaman pugllachun saqui. Ñajaman parlashca Bárbara shuti huarmica: “Huahuacuna intipi pasashpa, huairata respirashpaca aburrido canatami saqui tucuncuna. Ñucanchij huahuacunaca canllaman pugllai callarishpaca mushuj cosascunata ruranatami yuyancuna” ninmi.

   Bibliamanta shuj valishca verso: ‘Tucui imata rurangapajpish shuj tiempomi tiyan. Asingapajpish tiempomi tiyan. Saltangapajpish tiempomi tiyan’ (Eclesiastés 3:1, 4).

   Caipi yuyai: ¿Ñuca huahuacuna canllaman llujshishpa pugllashpa ashtahuan tiempota pasachunca imatataj rurai tucuni? ¿Huasimanta mana llujshi tucushpaca, ima shinataj huasi ucupi shujtaj cosascunata rurashpa pasai tucun?

•   Cambaj huahuacuna shujtajcunapi yuyachun ayudai. Lillian shuti mamaca: “Huahuacunaca shuj mayorlla amigopajman rishpami cespedta cuchushpa, huasi canllata pꞌichashpa, imitallatapish yanushpa o saludashpallapish pasai tucuncuna. Shujtajcunata ayudashpami cushilla cai tucunchij” ninmi.

   Bibliamanta shuj valishca verso: “Shujtajcunapaj allita rurajcunaca charijyancunami. Shujtajcunaman carajcunaca, paicunapish chasquincunami” (Proverbios 11:25).

   Caipi yuyai: ¿Ñuca huahuacuna shujtajcunata ayudashpa cushilla cachunca ima shinataj paicunata ayudai tucuni?

•   Cambaj ejemplohuan yachachi. Cada punlla can imalla rurashcacunata parlajta uyashpaca ¿cambaj huahuacunaca ima shinashi sintiringa? Sarah shuti shuj mamaca: “Can cada punlla imata rurashpapish aburridolla pasajta ricushpaca huahuacunapish aburrido pasanatami yachangacuna. Pero can cushilla cajpi, imalla rurashcacunamanta cushicuihuan parlajpica huahuacunapish cushillami sintiringacuna” ninmi.

   Bibliamanta shuj valishca verso: “Cushicui shunguhuan causajpajca, punllanta jatun micuita rurashca shinami” (Proverbios 15:15).

   Caipi yuyai: ¿Cada punlla imalla rurashcacunamantaca ima shinataj ñuca huahuacunapaj ñaupajpica parlani? ¿Aburrido cashpa ñuca imata rurajtataj paicunaca ricuncuna?

 Caitami rurai tucungui: Cambaj huahuacunahuan tiyarishpa imalla cosascunata rurai tucushcata shuj listapi anotashpa churaichij. Allison shuti shuj mamaca: “Huasipica shuj cajitatami charinchij. Chaipimi ñucanchij imalla rurai tucushca yuyaicunata escribishpa churanchij” ninmi.