MATEU libruqa kënömi willakun: “Jesusqa templumanmi yëkurirqan, y templuchö qatukoqkunata y rantipakoqkunatam waqtaman qarqurqan, jina qellë trokaqkunapa mësankunata y paluma rantikoqkunapa täkuyänankunatapis tikrakacharkurqanmi. Y kënömi nirqan: ‘Qellqashqam këkan: “Wayïqa, mañakuyänan wayi nirmi reqishqa kanqa”, peru qamkunaqa suwakoqkunapa machëninmanmi tikraratsiyashqanki’” (Mat. 21:12, 13).

Judïukunapaq parlaq willakïkunaqa, templuchö rantikoqkuna alläpa chaniyoqchö rantikurnin nunakunapita provechakuyanqantam nin. Judïukunapa unë libruchömi willakun, apostolkunapa tiempunchö pishtashqa ofrendapaq ishkë palumalla, juk kutiqa örupita rurashqa juk denariu cuestanqanta. Tsëtaqa juk nuna 25 junaq trabajar-ran ganaq. Jehovä Moisesta qonqan leyqa, waktsakunaqa pishtashqa ofrendapaq ishkë palumakunata o kullkukunata qoyänampaqmi permiteq. Peru alläpa chaniyoq kaptinmi rantita puëdiyarqannatsu (Lev. 1:14; 5:7; 12:6-8). Tsëqa, judïukunapa yachatseqnin Simeon ben Gamaliel nishqan nunataqa alläpam piñatsirqan, tsëmi pishtashqa ofrendakunata mas wallkallatana qoyänampaq patsätsirqan. Tsërëkurmi palumakunapa chaninqa chipyëpa bajarirqan.

Tsëmi Jesucristuqa templuchö rantikoqkunataqa ‘suwakoqkuna’ nirqan, porqui nunakunapitam provechakuyaq y mallaqäkoqmi kayaq.