BIBLIACHÖ ninqanta estudiaq nunakunanam, Daniel libruchö rey Belsasarpaq parlanqan mana rasumpa kanqanta, y imëpis mana kawashqa kanqanta mëtsika watapa niyarqan (Dan. 5:1). Tsënöqa niyaq, unë pasakunqankunata estudiaqkuna tsë rey kawashqanta imapis rikätsikunqanta mana tariyashqa kayaptinmi. Peru 1854 watachöqa juknöpanam pensayarqan. ¿Imanir?

Tsë watachömi, Gran Bretäña nacionpita precisaq carguyoq John Taylor nuna, raqällana këkaq unë Ur markata oqtir qallëkurqan. Tsë markaqa Irak nacionchömi kananqa këkan. Tsëchömi juk jatun törrichö, juk cuartapa pullannin mideqta mitupita rurashqa cilindru niraqkunata mëtsikata taririrqan. Tsëkunachömi, shukshuwan tanïpa qellqayanqankunata y Babiloniachö rey Nabonïdu y mayor kaq tsurin Belsasar mëtsika watakunapa kawayänampaq mañakuyanqanta qellqarëkaqtapis tariyarqan. Tsë estudiösu nunakunapis, Belsasar kawashqa kanqantaqa manam neguëta puëdiyarqannatsu.

Peru Bibliachöqa, manam kawashqa kanqanllatatsu nin, sinöqa rey kashqantapis ninmi. Peru estudiösu nunakunaqa, rey mana kashqa kanqantam niyaq. Tsëmi 1875 watakuna witsan, William Talbot cientïficu nuna wakinkuna kënö niyanqanta qellqarqan: “Bel-sar-ussurqa [Belsasarqa] teytan Nabonïduwan juntum rey kayarqan. Peru tsëtaqa manam imapis rikätsikuntsu”.

Tsënö niyanqan mana rasumpa kanqanqa musyakärirqan, mitupita rurashqa cilindru niraqkunachö Belsasarpa teytan Nabonïdu, Babiloniachö atska watakunapa mana kashqa kanqanta qellqarëkaqta tariyanqanchömi. Pë mana kanqan witsanqa, ¿pitaq rey karqan? Encyclopaedia Britannica libruchömi kënö nin: “Juk nacionchö Nabonïdu kanqanyaqmi, Belsasar gobernanampaq y cäsi llapan tröpankunata rikänampaq churarqan”. Tsëmi Belsasarqa, teytan mana kanqan witsan rey karqan. Tsërëkurmi, unë pasakunqankunata y juk idiömakunata estudiaq Alan Millard nuna, Daniel libruchö Belsasarpaq rey kanqanta ninqanqa allilla kanqanta nirqan.

Peru Diosta sirweqkunapaqqa, Daniel libru rasumpa kaqllata willakunqan y Diospita shamunqanqa kikin Bibliachö qellqarëkaqkuna cläru rikätsikunqantam cuentaman churayan (2 Tim. 3:16).