9 KAQ TAPUKÏ
¿Creïmanku imëkapis kikinllam rurakashqa niyanqanman?
¿QAMQA IMATATAQ RURANKIMAN?
Këman pensari: Älexqa pantashqam këkan. Pëqa imëpis creishqa imëkakunatapis Dios ruranqantam. Peru kananqa profesorninqa nin, kikinlla rurakashqa kanqantam y yachaq nunakuna pruëbakunata tariyanqantam rikätsin. Älexqa manam upatanö rikäyänanta munantsu, tsëmi kënö pensarin: “Sï yachaq nunakunapis kikinlla rurakashqa kanqanta nikäyaptinqa, ¿imanir-raq noqaqa ‘manam tsënötsu’ nïman?”.
Älex karninqa, ¿imëkapis kikinlla rurakäkushqa kanqanta librukuna niyaptinllatsuraq qampis creinkiman?
ALLEQRAQ PENSË
Wakin nunakunaqa alleq manaraq pensarninmi, imëkapis kikinlla rurakäkushqanman o Dios kamashqanman creiyanqanta niyan. Peru imanir creiyanqantaqa manam entienditsikïta puëdiyantsu.
-
Wakinkunaqa imëkatapis Dios kamanqanmanqa creiyan, iglesiachö yachatsishqa kayaptinllam.
-
Wakinkunanam imëkapis kikinlla kamakäkushqa kanqanman creiyan, escuëlachö yachakushqa karninlla.
KË JOQTA TAPUKÏKUNATA RURAKÏ
Hebrëus 3:4 textum kënö nin: “Llapan wayicunatapis nunacunam rurayan, peru Diosmi camarqan nunatapis y llapan imecacunatapis”. ¿Biblia kënö ninqan creipaqnöku?
Imëkatapis Dios mana kamanqanman creiqa, kë wayi kikillanlla rurakäkushqa kanqanman creïnömi, y tsëqa upa këmi kanman.
NIYANQAN: Imëkapis rikanqantsikqa yurimurqan ima karpis ciëluchö pashtëkunqampitam, tsëtam Big Bang nishpa reqiyan.
1. ¿Imataq o pitaq Big Bang kanampaq causëkurqa?
2. Mëqantaq mas creipaqnö, ¿imëkapis kikinlla rurakäkushqa kanqanman creïku o imëkapapis juk kamaqnin kanqanman creïku?
NIYANQAN: Nunakunaqa animalpitam shamuntsik.
3. Sï animalpita nunakuna shamushqa karqa, ¿imanirtaq animalpita mas musyaq kantsik?
4. ¿Imanirtaq ‘mana precisaqtanö’ rikanqantsik kawëkunapis alläpa sasa (aja) entiendinan kayan?
NIYANQAN: Imëkapis kikinlla rurakäkushqa kanqantaqa pruëbakunam rikätsikun.
5. Tsënö neq nunaqa, ¿alleqtsuraq estudiashqa imanö kanqanta?
6. ¿Ëkaq nunakunataq imapis kikinlla rurakäkushqa kanqanman creiyan, “yachaq nunakunaqa tsëmanmi creiyan” niyaptinlla?
“Bosqui rurimpa ëwarëkarnin qerupita shumaq wayita rikärirqa manachi kënö pensankimantsu: ‘¡Imanöparaq këqa rurakëkurqan! Këmanqa qerukuna shikwamur shikwamurchi juk wayiman tikrarirqan’. Manachi tsënöqa pensashwantsu. Tsënö këkaptinqa, ¿imanir-raq creishwan imëkapis kikinlla rurakäkushqa kanqanman?” (Julia).
“Pillapis kënö nirishunkiman: ‘Librukunata imprimiyänan sälachömi juk mäquina pashtëkurqan, tsënam tinta më tsëpa ramakarnin juk diccionariuman tikrarirqan’. ¿Creinkimantsuraq?” (Gwen).
¿IMARËKURTAQ DIOSMAN CREÏ?
Bibliam nishunki yachaq kënikita utilizänëkipaq (Romänus 12:1, Traducción del Nuevo Mundo). Juk parlakïchöqa, markäkïnikiqa manam kanantsu:
-
SIENTINQËKILLAPITAQA: “Ima karpis nimanmi juk mas puëdeq kallpa kanqanta”.
-
WAKINKUNA CREIYANQANLLAPITAQA: “Juntu kayanqä nunakunaqa Diosmanmi creiyan”.
-
CREINËKITA MUNAYANQANLLAPITAQA: “Wayichöqa Diosman creinäpaqmi niyäman”.
Wakinkuna niyanqanllata creinëkipa rantinqa, kikikim alleq musyanëki imanir creinqëkita.
“Cuerpu imanö funcionanqanta escuëlachö profesor entienditsikamuptinqa masran Diosman creï. Cuerpuchöqa imëkanmi mana precisaqnölla karpis, alläpa precisan. Cäsi imëpis manam cuentata qokuntsiktsu cuerpuntsik imanö funcionëkanqanta. ¡Alläpa espantakïpaqmi!” (Terësa).
“Juk jatun wayita, juk barcuta o juk cärruta rikärirqa, ‘¿piraq rurëkushqa?’ nirmi tapukü. Këllaman pensarishun, yachaq nunaran cärrutaqa rurëta puëdin, mëtsika ichisaq piëzankunam kan y tsëkunatam alleqraq sitiunman patsätsinan alli funcionanampaq. Sï juk cärruta yachaq nunaraq rurëkaptinqa, nunakunatapis juk mas yachaqraqmi rurashqa” (Richard).
“Imëka kamashqakunapita mas yachakunqämannömi, imëkapis kikinllam rurakäkushqa niyanqanqa mas mana creipaq tikran. [...] Mëtsika markäkïtaran wanantsik imëkapis kikinlla rurakäkushqa kanqanman creinapaqqa, peru Diosman creinapaqqa manam tsënötsu” (Anthony).
KËMAN PENSARI
Cientïficukunaqa atska tiempupana investiguëkarpis, imëkapis kikinlla rurakäkushqa kanqampaqqa jukta juktam niyan. Yachaq këkarpis manam acuerdutsu kayan. Tsëqa, ¿imanirtaq mantsapakunki “kikinllam rurakäkushqa” niyanqampaq manam tsënötsu nïta?
Capaz këkunapis gustashunki
WAKIN JÖVINKUNA IMATA PENSAYANQAN
¿Creïmanku Dios rasumpa kanqanman?
Ishkaq jövinkunam yachakuyanqampita segürutsu kayarqan, peru ¿imatan yanaparqan?
