•  Imakunata yachakunapaq kaq 2

•  Bibliapita alli yachakunapaq 3-5

  •  Discursu 3

  •  Imakunata yachakunqantsik 4

  •  Bibliata leyi 5

•  Alli yachatsikunapaq 6-14

  •  Parlapar qallanëkipaq 7

  •  Watukaq kutinëkipaq 8

  •  Bibliapita yachatsinëkipaq 9

  •  Creinqëkikunata shumaq entienditsikuy 10

  •  Juk wawqim këta yachatsikamunqa 11

  •  Imapita yachatsikunapaq 12

  •  Mëchö yachatsikuykarnin ruranapaq 13

  •  Videukunata y publicacionkunata imanö utilizänapaq 14

•  Diosnintsikta alli sirwinapaq 15, 16

  •  Bibliapita yachakunapaq libru 16

•  Imakunata yachakunqantsik 17

•  Felicitäyänampaq y consejayänampaq 18

•  Tiempu 19

•  Congregacionkunata watukaq wawqi watukamashqa 20

•  Asamblëa kanqan semäna 21

•  Jesus Wanunqanta Yarpäna semäna 22

•  Cristiänunö Kawakunapaq y Yachatsikunapaq reunionta rikaq 23

•  Cristiänunö Kawakunapaq y Yachatsikunapaq reunionta dirigeq 24

•  Yachatsikamoqkunata consejaq wawqi 25

•  Taksha sälakuna kaptin 26

•  Videukuna 27

1. Cristiänunö Kawakunapaq y Yachatsikunapaq reuniontaqa, këchö ninqannömi rurayämunan. Tsë reunionchö yanapakoqkunaqa, rurayämunampaq kaqta manaraq alistakurmi, këchö ninqanta y Cristiänunö Kawakunapaq y Yachatsikunapaq höjachö ninqanta leyiyänan. Yanapakuyta puëdeq publicadorkunataqa, Bibliata leyiyämunampaq, demostracionkunata rurayämunampaq y discursuta rurar yanapakayämunampaqmi animayänan. Bibliachö ninqanman creir y Bibliachö ninqannö kawakurqa, reunionkunaman seguïdu shamoqkunapis tsëkunachö yanapakuyta puëdiyanmi. Manaraq publicador karnin pillapis tsëkunachö yanapakuyta munaptinqa, Cristiänunö Kawakunapaq y Yachatsikunapaq reunionta rikaq wawqim, tsëchö yanapakamunampaq Bibliachö ninqanta cumplinqanta o manaraq cumplinqanta musyanampaq pëwan parlanan. Tsëpitanam demostracionkunata rurar yanapakuyta puëdinqanta o manaraq puëdinqanta willanan. Pëwan parlaptinqa, Bibliapita yachatseqnin wawqi o panim pëkunawan kanan (wamrallaraq kaptinqa, papänin o mamäninmi pëkunawan kanan). Tsëkunachö yanapakuyta munaqkunaqa, publicador këta munaqkuna cumpliyanqantam cumpliyänan (od-S cap. 8 pärr. 8).

2. Juk minütu. Cantar usharishqa juk wawqi mañakaramuptinmi, Cristiänunö Kawakunapaq y Yachatsikunapaq reunionta dirigeq wawqi, yachakuyta munanapaqnö reunionchö wakin yachakunapaq kaqpita parlamunqa, masqa yanapamänapaq kaqpita.

 3. Discursu (10 minütus). Yachatsikamunqampa tïtulunqa Reunionchö Yachakunapaq höjachömi këkan, y tsëchömi yachatsikamunampaq kaqkunapita ishkë o kima puntukuna qellqarëkan. Këtaqa alli yachatsikoq anciänu o siervu ministerialmi ruramunan. Bibliachö juk librupitana yachakur qallashqaqa, tsë librupita willakoq videutam rikäshun. Tsë videuchö willakunqampita parlarpis, yachatsikamoq wawqiqa Reunionchö Yachakunapaq höjachö llapan ninqampitam yachatsikamunan. Dibüjukunaqa yachatsikamunqanta mas entiendinapaqmi yanapakun, tsëmi tiempu kaptinqa tsëchö dibüjukunapitapis parlakamunan. Yachatsikamunqanta maslla entienditsikunan kaptinqa, juk publicacionkunachö ninqantapis parlakamuyta puëdinmi.

 4. Imakunata yachakunqantsik (10 minütus). Këchöqa tapukayämunqantam contestashun. Tapukamoq wawqiqa, manam qallananchö ni ushananchöpis maskunata parlamunantsu. Këtaqa alli yachatsikoq anciänu o siervu ministerialmi ruramunan. Wawqiqa ishkan tapukuykunatam tapukamunan. Höjachö yarqamoq textuta o textukunata leyitsinampaq o mana leyitsinampaq kaqtaqa, kikinmi decidinan. Wawqi panikunaqa, 30 segundusllachö o mënusllachömi parlakayämunan.

 5. Bibliata leyi (4 minütus). Këtaqa juk wawqim ruramunan. Bibliata leyimoqqa, manam qallananchö ni ushananchöpis maskunata parlamunantsu. Reunionta dirigimoq wawqim leyimoqkunata yanapanqa, entiendinapaqnö, qellqarëkanqantanö y imëpis parlakunqannölla mana pantashpa leyiyämunampaq. Tsënöllam yanapanqa imatapis leyikanqanmannö vozninta cambianampaq, puntukunata y cömakunata respetanampaq y sentimientuwan leyinampaqpis. Bibliata wakin leyiyämunampaq kaq mas atska kaptinmi, Cristiänunö Kawakunapaq y Yachatsikunapaq reunionta rikaq wawqiqa, leyita puëdinqanmannö pï wawqita churanampaq kaqta rikänan.

6. Quinci minütus. Këqa llapan publicadorkunatam yanapan imanö yachatsikuyänampaq kaqta musyayänampaq, y nunakunata parlapar, watukaq kutirnin y Bibliapita yachatsirpis shumaq rurayänampaq. Precisaptinqa, anciänukunapis tsëkunachö yanapakuyta puëdiyanmi. Këchö yanapakoqkunaqa, Yachatsikunapaq o Kuyakoq karmi neq follëtukunachö ninqantam cuentaman churayänan. Mëqanta cuentaman churayänampaq kaqtaqa Reunionchö Yachakunapaq höjachömi willakun. Wakin semänakunaqa wiyaqkunapis parlakayämunqan. Këtaqa alli yachatsikoq anciänu o siervu ministerialmi ruramunqa (wiyaqkunapis parlakayämunampaq kaqta imanö ruranëkipaq kaqta musyanëkipaqqa, rikäri  15 kaq pärrafuchö willakunqanta).

 7. Parlapar qallanëkipaq. Këtaqa juk publicador o publicadöram ruramunqa. Yanapaqninqa ollqu mayin, warmi mayin o familianmi kanan. Sïllaman jamëkur o shëkarpis ruramuyta puëdinmi. (Imapita yachatsikunampaq kaqta y mëchö yachatsikuykarnin ruranapaq kaqpita masta musyanëkipaqqa, rikäri  12 y  13 kaq pärrafukunachö ninqanta).

 8. Watukaq kutinëkipaq. Këtaqa juk publicador o publicadöram ruramunqa. Yanapaqninqa ollqu mayin o warmi mayinmi kanan (km-S 5/97 päg. 2). Sïllaman jamëkur o shëkarpis ruramuyta puëdinmi. Këta ruramoqqa, yachakuyta munaq nunata o warmita watukaq kutirnin imata ninapaq kaqtam rikätsikamunan. “Imanö yachatsikunapaq” neqchö ninqannömi ruramunan. (Imapita yachatsikunampaq kaqta y mëchö yachatsikuykarnin ruranapaq kaqpita masta musyanëkipaqqa, rikäri  12 y  13 kaq pärrafukunachö ninqanta).

 9. Bibliapita yachatsinëkipaq. Këtaqa juk publicador o publicadöram ruramunqa. Yanapaqninqa ollqu mayin o warmi mayinmi kanan (km-S 5/97 päg. 2). Sïllaman jamëkur o shëkarpis ruramuyta puëdinmi. Këchöqa Bibliapita yachatsikuykanqantam rikätsikamunan. Reunionchö Yachakunapaq höjachö tsëta rikätsikunampaq mana niptinqa, qallananchö y ushananchöpis manam imata ninantsu. Manam libruchö llapan ninqantatsu fuertipa leyitsinan, peru munarqa leyitsita puëdinmi.

 10. Creinqëkikunata shumaq entienditsikuy. Discursu kaptinqa, juk wawqim ruramunqa. Peru demostracion kaptinqa, juk publicador o publicadöram ruramunqa. Yanapaqninqa ollqu mayin, warmi mayin o familianmi kanan. Këta ruramoqqa, referenciachö ninqannömi tsë asuntupaq Bibliachö ninqanta shumaq y cläru yachatsikamunan. Ima publicacionpita yachatsikëkämunqanta willakamunampaq o mana willakamunampaqpis kikinmi decidinan.

 11. Juk wawqim këta yachatsikamunqa. Kuyakoq karmi neq follëtuchö “Masllata musyanapaq A” ninqampita yachatsikamunan kaptinqa, nunakunata yachatsirnin tsëchö textukunata imanö utilizänapaqmi rikätsikamunan. Puëdinmi entienditsikamuyta tsë textu ima ninan kanqanta, imanö utilizänapaq kaqta y imatapis entienditsikunapaq imanö utilizänapaq kaqtapis. Reunionchö Yachakunapaq höjachö, tsë follëtuchö ninqannö ruramunampaq niptinqa, follëtuchö ninqannö ruramunampaqmi kallpachakunan. Yanapamänapaq kaqta rikarqa, puëdinmi Kuyakoq karmi neq follëtuchö 1 kaq ninqampita o “Kë textukunatapis leyi” ninqampitapis parlakamuyta.

   12. Imapita yachatsikunapaq. “Parlapar qallanëkipaq” o “Watukaq kutinëkipaq” ninqanta ruramoqqa, kë pärrafuchö y qateqnin kaq pärrafuchö ninqannömi ruramunan. Reunionchö Yachakunapaq höjachö mana imatapis niptinqa, wiyëkaqnin nunata o warmitam yanapanampaq kaqpita parlapänan y yapë watukaq kutinampaqmi patsätsinan. Kë demostracionta ruramoqqa, nunakuna musyëta munayanqampita y pëkunata yanapanqampitam yachatsikamunan. Yachatsikunapaq dispunishqa publicacionkunata o videukunata rikätsinampaq o mana rikätsinampaqpis, kikinmi decidinan. Tsëta ruramoqqa manam dememoria yachakunqantatsu yachatsikamunan, tsëpa rantinqa, parlapëkanqan nunapaq o warmipaq yarpachakunqanta, conviëninqan hörachö parlanqanta y maskunatam rikätsikamunan.

   13. Mëchö yachatsikuykarnin ruranapaq. Këta ruramoqqa, këkunachö yachatsikuykarmi ruramunan:

1.  (1) Wayin wayin yachatsikur. Këchöqa wiyëkaqnin nunata o warmitam wayin punkuchö, telëfunupa o cartapa yachatsita puëdinqa. Wayin punkuchö, telëfunupa o cartapa Bibliapita yachatsir sïguitapis puëdinqam.

2.  (2) Mëchö këkarpis yachatsikur. Këchöqa trabäjunchö këkar, escuëlanchö këkar, cärruchö viajëkar, vecïnunkunawan parlëkar o juknöpapis yachatsikuyta puëdinqam.

3.  (3) Cällikunachö carrïtukunawan yachatsikur. Këchöqa carrïtukunawan, negociukuna kanqanchö, cällikunachö, parquikunachö, paradërukunachö y mas sitiukunachö këkarmi yachatsikuyta puëdinqa.

 14. Videukunata y publicacionkunata imanö utilizänapaq. Videukunata o publicacionkunata utilizänampaq o mana utilizänampaq kaqtaqa, demostracionta ruramoq kaqmi decidinan. Videuta rikätsinampaq decidiptin o Reunionchö Yachakunapaq höjachö videuta rikätsinampaq niptinqa, mana rikätsishllapam tsë videupita yacharatsinan.

15. Juk cancionta cantarirmi këtaqa yachakushun. Qallanan 15 minütuschömi Bibliachö ninqannö kawanapaq juk o ishkë asuntukunapita yachatsikayämunqa. Reunionchö Yachakunapaq höjachö mana imatapis niptinqa, alli yachatsikoq anciänu o siervu ministerialmi këkunataqa yachatsikayämunqa. Peru ruranantsikpaq pishinqankuna ninqantaqa anciänukunallam rurayämunan. Wiyaqkunapis parlakayämunan kaptinqa, tsëta yachatsikamoq wawqiqa puëdinmi Reunionchö Yachakunapaq höjachö ninqampita maskunata tapukamuytapis. Mas yanapamanqantsik kaqkunapita yachatsikamunampaq y wiyaqkunapis parlakayämunampaqmi yachakunapaq kaqpitaqa alläpaqa parlamunantsu.

  16. Bibliapita yachakunapaq libru (30 minütus). Këtaqa alli yachatsikoq anciänum ruramunan (peru congregacionchö anciänukuna wallkaqlla kayaptinqa, alli yachatsikoq siervu ministerialpis ruramunmanmi). Këchö pikuna yanapakuyta puëdiyanqantaqa, anciänukuna juntakëkurmi rikäyänan. Këchö yanapakoq wawqiqa, ima textukunata leyinapaq kaqtam rikänan, yachakuykanqantsik imanö yanapamanqantsiktam entienditsikamunan y tiempunchömi ushanan. Yachakunapaq kaq tapukuykunayoq kaptin tsëta imanö dirigimunampaq kaqta musyanampaqqa, Täpakoq revistachö ninqanmi yanapanqa (w23.04 päg. 24, recuadru). Höra manaraq cumpliptin librupita allina yachatsikamushqa karqa, manam 30 minütus cumplinantaraqtsu shuyänan. Puëdikaptinqa, allim kanman cada semäna juk wawqi diriginan y juk wawqi leyinan. Reunionta dirigeq wawqi mas wallka tiempullachö ushanampaq niptinqa, librupita yachatsikamoq wawqim imanö ruranampaq kaqta decidinan. Capaz tsëpaqqa wakin pärrafukunata leyitsinmannatsu.

17. Kima minütu. Reunionta dirigeq wawqim, mas yanapamänapaq kaqkunata yarpätsikamunqa, y yachakuyta munanapaqnömi qateqnin semäna imata yachakunapaq kaqta willakamunqa. Tiempu kaptinqa, “Alli yachatsikunapaq” ninqanchö qateqnin semäna pikuna yanapakayämunampaq kaqtapis willakamunmanmi. Imachöpis jukta mana niptinqa, imakunata yachakunqantsikta parlamunqan höram cartakunata leyimunan o imatapis willakamunan. Mëchö y imë höra yachatsikunapaq kaqta, mëqan grüpu pitsapakunapaq kaqta y maskunataqa, manam plataformapita nimunantsu, tsëtaqa cada ünum tablëruchö rikänan. Cartata leyimunampaq o imatapis willakamunampaq tiempu mana tinkuptinqa, “Diosnintsikta alli sirwinapaq” neqchö yachatsikamoq wawqikunatam mas wallka tiempullachö ushayänampaq ninan (rikäri  16 y  19 kaq pärrafukunachö ninqanta). Cancionta cantarishqa juk wawqi mañakaramuptinmi, reunion ushanqa.

18. Bibliata leyir, demostracionta rurar o discursuta rurar ushariyaptinmi reunionta dirigeq wawqiqa, juk minütullachö felicitänan y precisaptinqa Yachatsikunapaq neq follëtu ninqannö ruranampaqmi consejanan. Pï o pikuna rurayämunampaq kaqta willakamurqa, manam nimunantsu follëtupa mëqan yachatsikuynin ninqannö ruramunampaq kaqta. Ushariptin felicitärirqa, puëdinmi willakamuyta Yachatsikunapaq neq follëtupa mëqan yachatsikuynin ninqannö ruramunqanta y imanir alli ruramushqa kanqanta. Imachöpis mas alliyänan kaptinqa, shumaqmi entienditsinan imanir alliyänampaq kaqta y imanö ruranampaq kaqta. Demostracionta ruramoqta o wawqi panikunata yanapanan kaptinqa, puëdinmi tsë demostracionchö allita rurayämunqampita parlakamuyta. Reunion ushariptin o juk junaqpis, puëdinmi consejëta Yachatsikunapaq neq follëtuchö ninqannö ruranampaq o maskunachö alliyänampaqpis. Tsëpaqqa puëdinmi utilicëta Kuyakoq karmi neq follëtuta, Yachatsikunapaq neq follëtuta o Benefíciese neq librutapis (Cristiänunö Kawakunapaq y Yachatsikunapaq reunionta dirigeq wawqi y yachatsikoqkunata consejaq wawqi imakunata ruranqantaqa,  19,  24 y  25 kaq pärrafukunachömi willakun).

19. Reunionchö yachatsikoqkunaqa tiempunchömi ushayänan (reunionta dirigeq wawqipis manam dispunishqa tiempupita masqa parlamunantsu). Reunionchö Yachakunapaq höjachö ëka tiempuchö rurayänampaq kaqta willakuptimpis, mënus tiempullachö usharqa, manam tiempu cumplikanqanyaqtsu parlayämunan. Reunionchö yachatsikamoqkuna dispunishqa tiempupita pasakuyaptinqa, yachatsikoqkunata consejaq wawqim japallankunata consejanan (rikäri  24 y  25 kaq pärrafukunachö willakunqanta). Cancionkunata cantanqantsikwan y Diosman mañakunqantsikwanmi, reunionqa 1 höra 45 minütuschö ushanan.

20. Congregacionkunata watukaq wawqi congregacionnintsikta watukamuptinqa, Reunionchö Yachakunapaq höjachö ninqampita ichik jukläyam reunion kanqa. “Bibliapita yachakunapaq libru” neqpa rantinmi, tsë 30 minütuschö congregacionkunata watukaq wawqi yachatsikamunqa. Manaraq qallaptinmi, reunionta dirigeq wawqiqa reunionchö yachakunqantsikta yarpätsikamunqa, yachakuyta munanapaqnömi qateqnin semäna imata yachakunapaq kaqta willakamunqa, willakuykunatam willakamunqa y cartakunatam leyimunqa. Tsëpitanam congregacionkunata watukaq wawqi imata yachatsikamunampaq kaqta willakamunqa. Congregacionkunata watukaq wawqi yachatsikamur ushariptinqa, pë akranqan canciontam cantashun. Reunionta ushanapaqqa, puëdinmi mëqan wawqitapis mañakamunampaq nita. Tsë semänaqa manam taksha sälakunachö juntakäyanqatsu. Juk idiömata parlaqkunapaq grüpukuna kaptinqa, reunionninkunata normalmi rurayanqa. Tsënö kaptimpis, congregacionkunata watukaq wawqi yachatsikamunqantaqa congregacionwan juntum wiyayänan.

21. Asamblëa kanqan semänaqa, manam congregacionchö reunion kanqatsu. Congregacionchö kaqkunatam yarpätsimäshun tsë semäna yachakunapaq kaqtaqa, japallantsik o familiantsikwan yachakunapaq kaqta.

22. Jesus Wanunqanta Yarpäna reunion semänachö kaptinqa, manam Cristiänunö Kawakunapaq y Yachatsikunapaq reunion kanqatsu.

23. Pëtaqa congregacionchö anciänukunam akrayan. Pëqa reunion alli patsätsishqa kanampaq y kë höjachö ninqannö rurakänampaqmi segurakunan. Yachatsikamoqkunata consejaq wawqiwanmi seguïdu parlarëkänan. Reunionchö Yachakunapaq höja yarqaramuptinllam, tsë wawqiqa ishkan killachö pikuna yachatsikayämunampaq kaqta patsätsinan. Pëmi patsätsinan pikuna Bibliata leyiyämunampaq kaqta y “Alli yachatsikunapaq” neqchö yanapakayämunampaq kaqtapis. Patsätsinanmi wakin yachakunapaq kaqta pikuna rurayämunampaq kaqta y pikuna reunionta dirigiyämunampaq kaqtapis. Kë ultimukunachö yanapakuyänampaqqa, anciänukuna aprobayanqan wawqikunatam churanan (rikäri  3-16 y  24 kaq pärrafukunachö ninqanta). Pï yachatsikamunampaq kaqta rikarqa, ëka watayoq kanqanta, experienciayoq o mana experienciayoq kanqanta y tsë asuntupita yachatsikamuyta puëdinqanta o mana puëdinqantam rikänan. Bibliata leyimoqkunata y “Alli yachatsikunapaq” neqchö yanapakoqkunataqa, Asignación para la reunión Vida y Ministerio Cristianos (S-89) neq höjata entreganan. Tsëtaqa kima semäna o mas pishikaptinmi entreganan. Reunionpaq progrämataqa tablërumanmi churatsinan. Anciänukunaqa puëdiyanmi pëta yanapanampaq juk anciänuta o siervu ministerialta akrëta. Tsënö kaptimpis, “Bibliapita alli yachakunapaq” neqchö y “Diosnintsikta alli sirwinapaq” neqchö pikuna yachatsikayämunampaq kaqtaqa anciänu kaqkunallam patsätsiyänan.

24. Cada semänam juk anciänu Cristiänunö Kawakunapaq y Yachatsikunapaq reunionta dirigimunqa (anciänukuna wallkaqlla kayaptinqa, alli yachatsikoq siervu ministerialpis dirigimuyta puëdinmi). Reunionta dirigimoq wawqiqa, reunionta qallar y ushar imata ninampaq kaqtam puntallapitana preparakunan. Cada yachakunapaq kaqta pï ruramunampaq kaqtam willakamunqa, y anciänukuna wallkaqlla kayaptinqa, capazchi wakintaqa kikin yachatsikamunqa, masqa videukunata rikänapaq kaqkunata. Qateqnin kaqta pï yachatsikamunampaq kaqta willakamurqa, manam alläpaqa parlamunantsu. Anciänukunam decidiyan pikuna reunionta dirigiyämunampaq kaqta. Aprobashqa wawqikunaqa cambianakurmi reunionta cada semäna dirigiyämunqa. Capaz höraqa, Cristiänunö Kawakunapaq y Yachatsikunapaq reunionta rikaq wawqiqa, wakin alli yachatsikoq anciänukunapitapis mas kutipa reunionta dirigimunqa. “Bibliapita yachakunapaq libru” neqta dirigir yanapakoq anciänuqa, capazchi reunionta dirigitapis puëdinqa. Tsënö kaptimpis, reunionta dirigeq wawqiqa, yachananmi Bibliata leyimoqkunata y “Alli yachatsikunapaq” neqchö yanapakamoqkunata felicitëta y precisaptinqa kuyëllapa consejëta. Reunion tiempunchö ushanampaqpis pëmi segurakunan (rikäri  17 y  19 kaq pärrafukunachö ninqanta). Plataformachö sitiu kaptin y reunionta dirigeq wawqipaq allinö kaptinqa, reunion tiempunchö ushanampaqmi yachatsikamoq wawqi atrilman churakanqanyaq, pï yachatsikamunampaq kaqta juknin micröfonupita willakamuyta puëdin. Bibliata leyiyämuptin y demostracionkunata rurayämuptinqa, reunionta dirigeq wawqi jamakunampaqmi sïllatawan mësata plataformaman churëta puëdiyan.

25. Puëdikaptinqa, këchöqa alli yachatsikoq anciänum yanapakunan. Precisaptinqa, pëmi anciänu o siervu ministerial kayaptimpis, Cristiänunö Kawakunapaq y Yachatsikunapaq reunionchö yachatsikamoqkunata, semäna ushëchö yachatsikamoqkunata, Täpakoq revistata o librupita yachakunqantsikta dirigeqkunata y leyir yanapakamoqkunata consejanan (rikäri  19 kaq pärrafuchö ninqanta). Manam precisantsu cada yachatsikayämuptin consejanan. Congregacionchö alli yachatsikoq anciänukuna atskaq kayaptinqa, puëdiyanmi cada wata jukta akrëta.

26. Bibliata leyiyämunampaq y “Alli yachatsikunapaq” neqchö yanapakayämunampaq ëkaq kayanqampitam congregacionchö taksha sälakuna kanampaq o mana kanampaqpis decidiyanqa. Taksha sälakuna kaptinqa, cada sälachö yanapakoqkunata diriginampaq y consejanampaqmi juk anciänu kanan, peru mana kaptinqa, alli yachatsikoq siervu ministerialpis yanapakunmanmi. Anciänukunam decidiyänan tsë sälakunachö yanapakoqkunata pikuna dirigiyänampaq kaqta, y cambianakuyänampaq o mana cambianakuyänampaq kaqtapis. Tsë sälakunachö dirigeqkunaqa,  18 kaq pärrafuchö ninqannömi rurayänan. “Bibliapita alli yachakunapaq” neqchö “Imakunata yachakunqantsik” neqta yachakur usharishqallam, taksha sälakunachö yanapakoqkunaqa tsëman ëwayänan. “Alli yachatsikunapaq” neqta yachakur usharishqanam jatun sälaman kutiyämunan.

27. Cristiänunö Kawakunapaq Y Yachatsikunapaq reunionchö rikänapaq kaq videukunataqa JW Library® aplicacionmanmi churayämunqa, tsë videukunataqa, celularchö, tabletchö, computadörachö y maskunachömi rikëta puëdintsik.

© 2023 Watch Tower Bible and Tract Society of Pennsylvania

S-38-QUN 11/23