•   ¿Mana alliku sientikunki jukkuna mala palabrata parlayaptin?

  •  Manam. Tsëkunata wiyar yachakashqana karmi ni cuentatapis qokütsu.

  •  Mana allinömi sientikü, peru manam imanëtapis puëdïtsu.

  •  Awmi. Alläpa mana allim sientikü y manam ni ichikllapis wiyëta munätsu.

•   ¿Parlankiku mala palabrakunata?

  •  Manam ni imëpis.

  •  Höra hörallam.

  •  Awmi. Imëpis parlämi.

•   ¿Alläpa mana alliku tsëkunata parlë?

  •  Manachi alläpa mana alliqa kanmantsu.

  •  Awmi, alläpa mana allim.

 ¿Alläpa mana allitsuraq mala palabrakunata parlë? Capaz qamqa pensanki allilla kanqanta y pïmëpis parlanqanta. Peru, ¿tsënötsuraq?

 Manam pensanqëkinötsu, wakin nunakunaqa mala palabrakunata mana parlayänampaqmi kallpachakuyan, y këkunata rurayänan precisanqantam niyan:

•  Mala palabrakunata parlëtaqa manam pöcu cäsupaq churanantsiktsu. Imanö parlakunqëkiqa rikätsikun imanö kanqëkitam. Mala palabrakunata parlarqa rikätsikuykanki kikikillaman pensanqëkita y wakinkunata cuentachö mana katsinqëkitam. Peru ¿rasun kaqchöqa tsënöku kanki?

   Bibliachömi kënö nin: “Imapis shimipita yarqamoqqa shonqupitam shamun” (Mateu 15:18).

•  Mala palabrata parlarqa mana allichömi quedanki. Cuss Control libruchömi nin: “Mala palabrakunata imëpis parlaptikiqa manam asïllaqa ni pipis amïguyki këta munanqatsu, y manam ni familiëkichöpis ni trabäjuykichöpis shumaq respetayäshunkitsu, manam piwampis alliqa kawakunkitsu ni trabäjuykichö mas puestuta chaskinkitsu, y reqiyäshoqnikikunapis mana allim rikäyäshunki”. Nïkurmi tsë libru kënö consejakun: “Këta yarpë: mala palabrakunata mana parlarqa capaz mas alli amïgukunata tarinki”.

   Bibliachömi kënö nin: “Dejayëna […] qayapänakur parlapänakuyta, llakitsinakur parlapänakuyta y imëka mana alli rurëkunata” (Efesius 4:31).

•  Mala palabrata parlarqa manam yarpanqëkinötsu achoräda o achorädu kanqëkita rikätsishunki. ¡Qué maleducado! neq librunchömi Alex Packer kënö willakun: “Mala palabrakunata parlaqkunaqa manam pitapis shumaqllaqa parlapäyantsu, manam tantiakuyta yachayantsu, ni jukkuna imanö sientikuyanqanta yarpäyantsu. Tsëmi tsënö parlaqkunataqa raslla ajayäriyan o cansariyan”. Y kënöpis ninmi: “Mana pensarlla lluta parlakoq karqa, imëpis llutalla y mana tantiyakurllam parlarinki”.

   Bibliachömi nin: “Ama shimikikunawan llutankunata parlayëtsu” (Efesius 4:29).

•  Këkunata rurëta procurë. Juk killa entëru kallpachakuy mala palabrata mana parlanëkipaq, y cada junaq imanö cumplikanqëkita juk calendariuman o imallamampis apuntë. Mala palabrata manana parlanëkipaqqa këkunatapis ruranëkim:

•  Mala palabrata parlaqkunataqa ama ni imachöpis rikëtsu ni wiyëtsu. Bibliachömi kënö nin: “Mana alli nunakunawan juntakuyqa, alli costumbrikunatam oqratsikun” (1 Corintius 15:33). Mana alli nunakunawan juntakuypaq parlarqa manam nunakunallapaqtsu parlëkan, sinöqa televisionchö imatapis rikanqantsikpaq, imëka videojuego pukllakunapaq y müsicata wiyanqantsikpaqwanmi. 17 watayoq Kennethmi kënö nin: “Hörantaqa gustashunqëki müsicatam pasë cantar qallëkunki, y manam cuentatapis qokunkitsu feyukunata parlanqanta. Tonädan allish kaptinllam gustëkushunki”.

•  Alli tantiyakoq kanqëkita rikätsikuy. Wakinqa mayorna tukurmi mala palabrakunata parlayan. Peru rasumpa mayorkunaqa “alli pensëta yachakushqa kar[mi], ima alli kanqanta y ima mana alli kanqanta cuentata qokuyta” yachayan (Hebrëus 5:14). Manam piwampis alli quedëta munarllaqa mala palabrakunata parlayantsu.

 Mala palabrakunata imëpis parlarqa llutankunallatanam yarparäshun, y wiyamaqnintsikkunatapis tsënömi pasanqa. Mana alli pensamientuyoq llapankuna kayänantaqa manam munantsiktsu. Cuss Control libruchömi kënö consejakun: “Ama jukkuna rurayanqanta rurëtsu. Mala palabrata mana parlarqa allim sientikunki, pïmëpis yachanäyäshunkim, y alli parlakuyänampaqmi pïmëtapis yanapanki”.