Awmi, Diabluqa rasumpam kan. Pëqa juk angelmi karqan, peru tsëpitaqa Diospa contranmi churakarqan. Diabluqa “kë munduchö nunakunapa gobernaqnin[mi]” (Juan 14:30; Efesius 6:11, 12). Bibliachö Diablupaq willakunqanmi, pë imanö kanqanta musyanapaq yanapamantsik. Wakinllata rikärishun:

•   Satanasqa, “Contrakoq” ninanmi (Job 1:6).

•   Diabluqa, “Calumniakoq” ninanmi (Apocalipsis 12:9).

•   Culebra nirqa, Bibliachöqa engañakoq këpaqmi parlëkan (2 Corintius 11:3).

•   Tentakoq (Mateu 4:3).

•   Ulikoq o llullakoq (Juan 8:44).

Diabluqa manam mana alli kaqtatsu ni mana alli kanqantsiktatsu rikätsikun

 Wakinkunaqa pensayan, Diabluqa mana alli kaqta y Dioschö y noqantsikchöpis mana alli kanqanta rikätsikunqanta. Bibliachömi willakun Teyta Dioswan Diablu parlayanqanta. Peru Teyta Diosqa limpium y imëpis alli kaqllatam ruran. Tsëqa, ¿imanöraq Teyta Dioschöqa ima mana allipis kanman? (Deuteronomiu 32:4; Job 2:1-6). Bibliachöqa willakunmi Jesusta Diablu tentëta munanqantapis, y Jesusqa jutsannaqmi karqan (Mateu 4:8-10; 1 Juan 3:5). Tsëmi cläru rikätsikun Diabluqa rasumpa kanqanta, y mana alli kaqllata mana rikätsikunqanta.

 Mëtsikaq nunakunam creiyan Diabluqa mana kanqanta. ¿Espantakushwanku tsënö pensayanqampita? Manam. Bibliachömi willakun Diabluqa engañamënintsikta munarnin imëkata ruranqanta (2 Tesalonicensis 2:9, 10). Juknöpaqa nunakunata Diablu engañan mana rasumpa kanqanta creitsirmi (2 Corintius 4:4).

 Mana rasumpa kaq: Luciferqa Diablupa juknin kaq jutinmi.

 Rasumpa kaq: Hebreu idiömapita wakin Bibliakunachö “Lucifer” nir traduciyanqan palabraqa, “chipapäkoq” ninanmi (Isaïas 14:12). Tsë palabraqa Teyta Dios puntallapitana willakunqanchömi yurin. Puntanchö y qepanchö ninqanta leyishqaqa, Babiloniachö gobernaqkunapaqmi parlëkan. Tsë gobernantikuna orgullösu kayaptinmi, Teyta Diosqa penqakatsinan karqan (Isaïas 14:4, 13-20). Tsë willakunqanchömi, Babiloniachö gobernaqkuna ushakäyaptin burlakurnin “chipapäkoq” nin.

 Mana rasumpa kaq: Diabluqa Teyta Diostam yanapan.

 Rasumpa kaq: Diabluqa manam Teyta Diospa sirweqnintsu, sinöqa chikeqninmi. Diabluqa Diospa sirweqninkunatapis chikinmi, tsëmi imëkata rurar sufritsin y mana kaqpita acusan (1 Pëdru 5:8; Apocalipsis 12:10).