RI AL Yomara, ri a Marcelo y ri a Hiver kachalal kibʼ y keʼel pa jun alaj tinamit re Guatemala. Ri al Yomara xumajij retaʼmaxik chrij ri Biblia y je xkibʼan ri e kebʼ uxibʼal. Are kʼu ri kʼax are che kekaʼy taj y kekun ta kesikʼin pa braille. Rumal laʼ, ri xyoʼw etaʼmanik chke rajawaxik kusikʼij ri párrafos y ri textos chkiwach.

Are chiʼ xkimajij bʼenam pa ri riqbʼal ibʼ kʼax xkiriqo. Rumal che 40 minutos kʼo wi ri Ja rech Ajawbʼal chke y kekun ta kebʼe kitukel. Rumal laʼ, ri qachalal pa ri congregación kkijal kibʼ che kikʼamik bʼik. Y, are chiʼ kkiya ri kasignaciones pa ri e riqbʼal ibʼ ri e qachalal kekitoʼo rech kkʼojiʼ pa kijolom ri kkibʼij.

Pa ri mayo de 2019, xmajix ubʼanik riqbʼal ibʼ pa ri kitinamit y jun kʼulaj precursores xeʼopan che uyaʼik tobʼanik kukʼ. Ri jun kʼulaj qachalal riʼ xkimaj ukʼutik braille chkiwach ri e oxibʼ kachalal kibʼ, paneʼ ketaʼm taj jas kkibʼan che ubʼanik. Rumal laʼ, xebʼe pa jun biblioteca che utzukuxik libros re braille rech kketaʼmaj jas kkibʼan che ukʼutik.

Ri oxibʼ kachalal kibʼ aninaq xketaʼmaj braille, wariʼ xeʼutoʼ rech xekʼiy pa ri kikojonik. a Ri al Yomara, ri a Marcelo y ri a Hiver e precursores regulares chik, y ri a Marcelo tobʼanel re ri congregación. Sibʼalaj keʼok il che upatanexik ri Jehová. Wariʼ e utoʼm nikʼaj chik rech je kkibʼano.

Ri oxibʼ kachalal kibʼ sibʼalaj kkimaltyoxij ri loqʼoqʼebʼal che kikʼutum ri qachalal chke. Ri al Yomara kubʼij: «Pa ri nabʼe qʼij che xqetaʼmaj kiwach ri qachalal xqil ri loqʼoqʼebʼal che xkikʼut chqe». Ri a Marcelo xuqujeʼ kubʼij: «E kʼo utz taq qachiʼl pa ri congregación y e kʼo qachalal pa ronojel uwach Ulew che kojkaj». Ri al Yomara y ri e rachalal sibʼalaj kkaj kopan ri qʼij che kekunik kekaʼyik y kkil ri kotzʼiʼjalaj uwach Ulew (Sal. 37:10, 11; Is. 35:5).