Qonojel kajwataj pwaq chqe rech kqakoj pa ri qafamilia (Proverbios 30:8). Qastzij wi, ri pwaq «are jun toʼbʼal ibʼ» (Eclesiastés 7:12). Jujun mul weneʼ kʼax kbʼan che rilik ri pwaq che kkoj pa ri familia, are kʼu xaq mayaʼo che kuya kʼaxkʼolil pa ri akʼulanem (Efesios 4:32). Utz che kubʼan ta kebʼ ikʼuʼx chbʼil iwibʼ xuqujeʼ utz che junam kichomaj ri kibʼan che usachik ri pwaq.

RI KUBʼIJ RI BIBLIA: «¿La kʼo lo jun chiwe, we kraj kuyak jun takʼatikalaj ja, ri ma ta nabʼe katʼuyiʼ na che rajilaxik joropaʼ ri kusach na, we kubʼanaʼ ri pwaq ri kʼo rukʼ che ukʼisik ri takʼatikalaj ja?» (Lucas 14:28). Are rajawaxik che xaq junam kichomaj ri kibʼan che usachik ri pwaq (Amós 3:3). Chiwilaʼ ri kajwataj chiwe xuqujeʼ jampaʼ pwaq kisacho (Proverbios 31:16). We kʼo irajil rech kiloqʼ jun jastaq kraj ta kubʼij che kiloqʼo. Chikojoʼ ichuqʼabʼ rech kikoj ta ikʼas, xaq xiw chisachaʼ ri pwaq che kʼo iwukʼ (Proverbios 21:5; 22:7).

RI KATKUNIK KABʼANO:

• We kʼo na arajil chiʼ kkʼis jun ikʼ, chachomaj rukʼ ri akʼulaj ri kabʼan che ukojik

• We kubʼanaʼ ta ri irajil, chichomaj jas kibʼano rech nim ta ri kisacho. Jun kʼutbʼal, kixkunik kibʼan iwa xa ta kiloqʼo

RI KUBʼIJ RI BIBLIA: «Kaqachomaj kʼu ubʼanik ri utz, man xuwi ta chuwach ri Ajawaxel, xaneʼ xuqujeʼ chkiwach ri winaq» (2 Corintios 8:21). Qas chabʼij che ri akʼulaj jampaʼ kachʼako xuqujeʼ jampaʼ kasacho.

Rajawaxik che kattzijon rukʼ ri akʼulaj chrij ri kabʼan che ukojik ri pwaq (Proverbios 13:10). We kixtzijon chrij ri pwaq kixutoʼ rech kixchʼojin taj. Chachomaj che rech ri familia ri kachʼako, xaq xiw ta awech at (1 Timoteo 5:8).

RI KATKUNIK KABʼANO:

• Chattzijon rukʼ ri akʼulaj chrij ri pwaq che kisach pa ijujunal

• Kʼateʼ ta kixtzijon chrij ri pwaq chiʼ kʼo chi chʼoj