Jeʼ, rumal che ri Dios kraj che kqamulij qibʼ rech kqaya uqʼij. Ri Biblia kubʼij: «Qas chqililaʼ qibʼ, chqapixbʼela qibʼ che ri loqʼoqʼebʼal qakʼuʼx xuqujeʼ ri utzalaj taq chak. Maqayaʼ kan ri umulixik qibʼ, jas ri kinaqʼatisabʼal jujun, xaneʼ chqapixbʼela qibʼ. Qas kʼu chujok na il rumal rech chi kqilo chi knaqajin ri qʼij re ri Ajawaxel» (Hebreos 10:24, 25).

 Jesús xubʼij, che ri upatanelabʼ kekʼojiʼ chkixoʼl winaq che kkibʼan ri jastaq rukʼ cholajil are chiʼ xubʼij: «Rumal kʼu waʼ konojel kketaʼmaj na chi ix nutijoxelabʼ, we kiloqʼoqʼelaʼ iwibʼ» (Juan 13:35). Rech ri upatanelabʼ ri Cristo kkikʼut wajun loqʼoqʼenik riʼ rajawaxik kekʼojiʼ chkixoʼl nikʼaj chi cristianos. Y rech kkibʼan wariʼ rajawaxik kekʼojiʼ pa taq congregaciones y amaqʼel kkimulij kibʼ rech kkiya uqʼij ri Dios (1 Corintios 16:19). Je wariʼ, kekunik kekʼojiʼ chuxoʼl jun familia che kʼo cho ronojel ri uwach Ulew (1 Pedro 2:17).

Rajawaxik kʼo kqabʼano xaq xiw ta kojkʼojiʼ pa jun kojonem

 Ri Biblia kubʼij che ri winaq rajawaxik kkimulij kibʼ rech kkiqʼijilaj ri Dios. Are kʼu kubʼij taj che keqaj chuwach ri Dios rumal che e kʼo pa jun kojonem. Xaneʼ rajawaxik che ri kojonem kʼo kubʼan pa ri qakʼaslemal. Jun kʼutbʼal, ri Biblia kubʼij: «Ri qʼijilanik che ri Dios ri qas chʼajchʼoj, ri man tzʼajtal ta chuwach ri Dios Tataxel are waʼ: Chi kekilij ri malkaʼnibʼ xuqujeʼ ri man kʼo ta chik kitat kinan, ri e kʼo pa kʼaxkʼolil, xuqujeʼ chi kqachajij qibʼ man kqatzʼaj ta qibʼ, man kqabʼan ta ri etzelal re ri uwach ulew» (Santiago 1:27).