Konojel taj. Ri e kojonem xaq ta e junam. Ri Biblia kukʼutu che konojel ta ri kojonem utz kril ri Dios. Chqilaʼ kebʼ kʼutbʼal.

Nabʼe: Ri kekiqʼijilaj ri qastzij taj diosibʼ

 Ri Biblia kubʼij che kʼo ta upatan che keqʼijilax ri qastzij taj diosibʼ (Jeremías 10:​3-5; 16:19, 20). Ojer ri Jehová a xubʼij chke ri israelitas: «Mekʼojiʼ jule taq diosibʼ chik we ta mat xaq xiw ri in» (Éxodo 20:​3, 23; 23:24). Are chiʼ ri israelitas xekiqʼijilaj ri qastzij taj diosibʼ xpe royowal ri Dios chkij (Números 25:3; Levítico 20:2; Jueces 2:​13 14).

 Ri Dios ukʼexom ta ri uchomanik, ri areʼ utz ta keril «ri kbʼix e diosibʼ chke» (1 Corintios 8:​5, 6; Gálatas 4:8). Kubʼij chke ri upatanelabʼ che kkinim ta kibʼ pa ri qastzij taj kojonem. Ri Biblia kubʼij: «Chixel chkixoʼl chitasaʼ iwibʼ chkij» (2 Corintios 6:​14-​17). ¿La kuta wariʼ ri Dios chqe wet konojel ri e kojonem xaq e junam y kojkiqebʼisaj rukʼ?

Ukabʼ: Ri utz ta kkibʼan che uqʼijilaxik ri Dios

 Ri Jehová xeʼuxutuj ri israelitas che xkimajij ukojik jastaq che kkoj che kiqʼijilax e tyox y xkiyuj ri qastzij kojonem rukʼ ri qastzij taj (Éxodo 32:8; Deuteronomio 12:​2-4). Ri Jesús xubʼij chke ri e kʼamal taq bʼe che utz ta ri tajin kkibʼan che uqʼijilaxik ri Dios. Ri areʼ kkibʼij che kkiqʼijilaj ri Dios are kʼu kkibʼan ta ri kubʼij ri pixabʼ «ri sukʼil ri elebʼal kʼuxaj y ri kojonik» (Mateo 23:23).

 Kimik, ri kojonem che kojuqebʼsaj rukʼ ri Dios are kubʼan ri kubʼij ri Biblia (Juan 4:24; 17:17; 2 Timoteo 3:16, 17). Ri e kojonem che kkikʼut ta ri kubʼij ri Biblia kkibʼano che ri winaq kketaʼmaj ta uwach ri Dios. E kʼi winaq kkichomaj che pa ri Biblia kriqitaj ri Trinidad, che kʼo kakʼasiʼ kan chqe chi kojkamik y che kojb’e pa qʼaqʼ. Are kʼu ri e chomanik riʼ qastzij taj. Kʼo ta upatan ri kkikʼut ri e kojonem, rumal che kkikʼut ta ri qastzij che kʼo pa ri Biblia (Marcos 7:7, 8).

 Xuqujeʼ ri Dios utz ta krilo che ri e kojonem kebʼ kipalaj (Tito 1:6). Ri kojonem rajawaxik kojutoʼo rech kojkunik kojqebʼ rukʼ ri Dios. Xaq xiw ta kukʼut jastaq chqawach che kʼo ta upatan; xaneʼ rajawaxik kojuto pa ri qakʼaslemal. Jun kʼutbʼal, ri Biblia kubʼij: «We kʼo jun chixoʼl ri kuchomaj chi kuqʼijilaj ri Dios, ri man ktaqan ta kʼu puwiʼ ri raqʼ xaneʼ kusubʼ ri ranimaʼ, ri uqʼijilanik ri areʼ che ri Dios man kʼo ta upatan. Ri qʼijilanik che ri Dios ri qas chʼajchʼoj, ri man tzʼajtal ta chuwach ri Dios Tataxel are waʼ: Chi keqilij ri malkanibʼ xuqujeʼ ri man kʼo ta chik kitat kinan, ri e kʼo pa kʼaxkʼolil, xuqujeʼ chi kqachajij qibʼ man kqatzʼaj ta qibʼ, man kqabʼan ta ri etzelal re ri uwach ulew» (Santiago 1:26, 27). Ri e tzij qʼijilanik che ri Dios ri qas chʼajchʼoj y utz, ri Biblia La palabra de Dios para todos kubʼij «chʼajchʼojalaj kojonem» che.