Isaías 60:1 nin: “¡Sharkuy, Jerusalén! Salvacionniki chayamushqana kaykaptinqa ¡atsikyay! Munaynïmi qamcho atsikyaykan”. Jerusalén o Sión marcaga Judá naciunpa capitalninmi cargan (Is. 60:14; 62:1, 2). Jerusalenpita parlar, parlaycanchi lapan israelitacunapita. Chauraga, ¿imaytaj y maychotaj Jerusalén marcaga sharcurcur achicyar galaycurgan? ¿Y Isaías wilacuycunaga canan tiempupis cumplicuycanchu? Cay ishcay tapucuycunapa respuestanta ricärishun.

¿Imaytaj y maychotaj Jerusalén marcaga sharcurcur achquir galaycurgan? Judiucuna 70 watapano Babilonia marcacho tiyapäcurgan. Chay wichan, Jerusalén y templuga juchuchish caycargan. Ichanga medo y persa runacuna Babilonia marcata ushacächergan, y israelitacunata nipäcurgan Jerusalenman cutir yapay Jehovata adurapäcunanpaj (Esd. 1:1-4). Jesús manaraj shamuptin 537 watapita, achca yäracoj judiucuna Jerusalenman cutipäcamurgan (Is. 60:4). Yapay Jehovapaj sacrificiucunata rupachergan, fiestacunapis celebrargan y templuta sharcachir galaycurgan (Esd. 3:1-4, 7-11; 6:16-22). Chaynopa Jehovapa glorian Jerusalén marcacho yapay achicyar galaycurgan, paycuna Jehovata yapay aduraycashganpita. Y paycunapis chaypita Jehovata mana reguishgan naciuncunapaj espiritual cajcho achquinomi cargan.

Chayno captinpis, Isaías wilacushganga manami carganchu unay Jerusalén marcalapächu. Chay wichan achca israelitacunaga Jehovata wiyayta munarganchu (Neh. 13:27; Mal. 1:6-8; 2:13, 14; Mat. 15:7-9). Tiempuwanmi Jesustapis chiquir wanuchergan (Mat. 27:1, 2). Jesús shamushganpita 70 watachona, Jerusalenpa templunpis yapay juchuchishga cargan.

Unayna Jehová wilacushga cargan Jerusalén ushacashga cananpaj (Dan. 9:24-27). Isaías libro 60 caj capitulucho, profeciacunacho Jehová manami parlarganchu Jerusalencho lapan profeciacuna cumplicunanpaj cajta.

¿Canan wichanpis Isaías wilacushganga cumplicuycanchu? Aumi, pero Jerusalén niptenga parlaycan jana pachacho caycaj Jerusalenpa. ¿Ima ninantaj jana pachacho caycaj Jerusalén? Chaycho parlaycan cielucho caycaj cäsucoj angelcunapaj. Paycunapita Pablo parlaycargan mama japuyno wawanwan cashganta (Gál. 4:26). Wawan nirajno caycan Jesús y 144.000 jana pachapaj acrashga cajcuna, chaychopis caycan Pablo, paycunami “santa nación”, “Israel runakunami karkaykan” (1 Ped. 2:9; Gál. 6:16).

¿Imanotaj jana pachacho caycaj Jerusalén sharcurcur achicyar galaycurgan? Chayga cargan waquin cristianucuna acrashga captin jana pachapaj aywananpaj. Paycuna pasashganta tincuchishwan Isaías 60 caj wilacuywan.

Apostulcuna wanushganpita congregaciuncho luta yachachicojcuna mirargan, y cielupaj acrashgacunaga espiritual cajcho chacaycho caycajnomi quedargan (Mat. 13:37-43). Jatuncaray Babiloniapa maquincho carcelarashganno caycargan 1914 watacama, chay watacho galaycurgan cay ushanan tiempo (Mat. 13:39, 40). Pero 1919 watacho, luta yachachicuycunapita librina caycar espiritual cajcho achicyayta galaycurgan. ¿Imataj rurargan? Calpachacurgan junaj junaj predicapäcunanpaj. a  Chaypita pacha tucuy naciuncunapita maychicaj runacuna chay achquiman aywashganno Diospa sirvejninman ticrargan, waquincunaga Tayta Dios cuyashgan mushoj Israel runacunami, Isaías 60:3 wilacushgan “reykunapis” caycan (Apoc. 5:9, 10).

Shamoj tiempucho acrashga cajcunaga, masraj achicyarcamunga. Paycuna wanuptinmi ‘mushuq Jerusalenno’ o Jesuspa novianno canga. 144.000 cajcuna, reycunano y sacerdoticunano capäcunga (Apoc. 14:1; 21:1, 2, 24; 22:3-5).

Mushoj Jerusalenga Isaías 60:1 wilacushgannomi canga (Isaías 60:1, 3, 5, 11, 19, 20 tincuchiy Apocalipsis 21:2, 9-11, 22-26 cajwan). Unay Jerusalencho caycaj reycuna lapan israelitacunata gobernashganno, chaynolami shamoj tiempucho paycunaga Jesucristuwan cielupita gobernamäshun. ¿Imanotaj Jerusalén marca ‘Tayta Diospa nawpanpita uraykämunqa’? Chaytaga ruranga cay pachapita gobernamuptinmi. Chay marcapita parlar, Bibliaga nin “maytsay nacionkunacho salvashqa runakunatami atsikyapanqa”, y juchanpita y wanuypitapis libracashgami canga (Apoc. 21:3, 4, 24). Chayno cumplicuptenga Isaías y juc profetacuna wilacushganno lapanpis ‘Tayta Dios munashqannönami’ canga (Hech. 3:21). Chayga galaycamushga Jesucristo Rey cananpaj churashganpita y waranga wata usharishgancamami canga.