35 CAJ YACHACUY

¿Imatataj ruräman Diospa amigun canäpaj?

Gabriel wilacun 12 watayoj caycaptinshi taytan jaguirir aywacurgan y juc chacay riccharcurshi Jehovata wagapar mañacurgan taytan cutimunanpaj.

Laquish caycashgancho Gabrielga Bibliata leir galaycurgan y cushicurgan Salmo 10:14 textuta leircur, chaychoga nin: “Pïninpis mana kaqkunaqa qammanmi yärakamun. Waktsakunataqa qammi yanapanki”. Gabriel nin: “Chay textuga shongüta ancashyächirgan, chaycho Jehová niycämargan ‘ama laquicuychu, noga taytayquino yanapashayquimi’. Y cayta musyarga cushichimargan”. Gabrielga cuentata gocurgan Jehovawan amigun cashganga alapa yanapargan pasashgancho.

¿Gampis Gabriel pasashgannochu pasashcanqui? Capazchi ninqui ‘awmi’ o ‘manami’, imano captinpis taytalanchi Jehovaga gamwan amigo cayta munan. Biblia cayno nin: “Tayta Diosninchïman ayway-llapa (o witimuy). Chauraga paypis maquinchönami purichishunqui” (Santiago 4:8, Tayta Diosninchi Isquirbichishan). Diosta mana ricaycarpis, payga nimanchi paywan amigo canapaj.

Pero Dioswan amigo canapaj manami jinaylapita canmanchu, chaypa trucanga calpachacunanchirämi. Tantiarinapaj, chacracho murushpayqui shumaj wayunanpäga, ¿imataraj ruranquiman? Chulpayoj alpacho murunquiman y cada cadala pargunquiman ¿aw? Y manami quiquilan winananpaj jaguirinquimanchu. Chaynolami Dioswanpis amigo canayquipäga, ¿imataraj ruranquiman?

Bibliapita yachacuy

Ishcay amigucunaga shumaj parlapäcun y jucnin jucninpis tantianacurmi yanapänacun. Dioswan amigo canapäga, pay parlapamashganchita wiyacur casucushun. ¿Imanotaj Diosta wiyacushwan? Payga Bibliawan parlapämanchi, chaymi Bibliata leinanchi y estudiananchi (Salmo 1:2, 3).

Capazchi Bibliata estudiaytaga manami gustashunquichu, ichanga televisiunta ricarayta, puclayta o amiguyquicunawan goyayta si gustashunqui. Pero Dioswan amigo cayta munarga, Bibliata estudianayqui.

Librucunata leinayquipaj mana gustashuptiquipis, waran waran Bibliata ichiclatapis leircuptiqui tiempuwanga gustashunquipämi, mana yamacanquichu. Chaypäga tiempuyquita raquinayqui y juc jipash rurashganno ruranayqui, paymi nin: “Tutala sharcurcurmi Bibliata leircö”. María jipash ichanga pununanparäshi Bibliata leircun.

Bibliapita shumaj yachacurcunayquipaj ricäriy  quiquiqui Bibliayquiwan yachacunayquipaj recuadruta. Nircur escribiy cada junaj imay horacho Bibliata estudianayquipaj.

․․․․․

Bibliata leir galaycuptiquiga capazchi cuentata gocunqui cada junaj leinayquipäga manami facilchu. Jezreel jutiyoj wamra Bibliata leir galaycushganpita cayta wilacun: “Waquin cajtaga shumaj tantiä y waquin cajtana manami”. Gampis chayno sienticuptiquiga, ama laquicuychu. Bibliata estudiarga cuyashga amiguyqui Jehovawan parlaycashgayquino sienticuy. Chayno captinga ichic ichiclapa más gustashunquipaj y tiempuwanga Bibliata leirga cushicunquipämi.

Diosta imaypis mañacuy

Diosta mañacushpanchiga paywan parlacuycanchi. Y cayga juc shumaj regalumi. Maycho caycarpis y imay horapis Jehová oraciunninchicunata wiyanmi, payga wiyashunayquita munan. Chaymi Bibliaga nin: “Tayta Diosninllanchïta mañacuy yanapäshunayquipaj”. Lapan yarpachacuyniquicunata payta wilapay y “llapanpita payta agradësicuy” (Filipenses 4:6).

Chaurasga, cayga ninanmi Diosta wilapayta puedinqui lapan problemayquicunata y yarpachacuyniquicunatapis. Pero ama gongaychu payta agradecicunayquipaj. Jehovaga amatar ali y cuyacoj cashpanmi noganchiraycur imaycacunata rurashga. Payno amiguga manami pipis canchu (Salmo 106:1).

Imacunapita Jehovata agradecicunayquipay escribiy.

․․․․․

Imaylapis alapa yarpachacuycunawan y problemacunawanmi caycarga, ¿imataraj ruranquiman? Biblia cayno nin: “Yarpachacaycächishushayquitaga TAYTA DIOSPA maquinman cachaycuy. Paymi yanapashunquipaj. Wiyacojcunataga TAYTA DIOS manami cachaycongapächu” (Salmo 55:22, TDI).

Imata yarpachacaycächishushayquita Diosta mañacunayquipaj escribiy.

․․․․․

Imataj pasashgayquipita yachacuy

¿Imataj más ruranquiman Diospa amigun canayquipaj?

Salmusta escribej David juc canciunta escribirgan: “TAYTA DIOS fiyupa alli cashanta musyanayquipaj masqui camay” (Salmo 34:8, TDI). Chay canciunta David escribirgan rey Saúl wanuchinanpaj gueshpishganchomi. Payga israelitacunapa chiquicojninpa marcancho pacacurgan. Y Gat marcapa mandajnin musyaptin chaycho pacacushganta, Davidga manchacurgan y pasaypa locu tucushpan lausan jutuycaptin purirgan. Cayta rurargan mana wanuchinanpaj (1 Samuel 21:10-15).

Davidga mana yarparganchu yachaj cashganpitachu salvacushganta, payga Diosta alabargan yanapashganpita. Escribishgan canciunpa galanancho nirgan: “Ruwakuptïmi TAYTA DIOS mayamashqa. Mantsariptïpis paymi valorta qomashqa” (Salmo 34:4). David mana alicunapa pasarcuptinga, cuentata gocushga Jehová yanapashganta, chaymi pay nirgan: “TAYTA DIOS fiyupa alli cashanta musyanayquipaj masqui camay”.

Yarpachacuy imacunacho Jehová yanapashushgayqui y nircur escribiy. Chaypäga ama yarpachacuychu jatun wilacuytaraj cananpaj, sinoga waran waran imano Dios cuidashushgayqui cajman yarparcuy.

․․․․․

Taytanchicuna Bibliapita yachachipäcamaptinchipis, quiquinchipita caycan Diospa amigun canapaj. ¿Imacunaraj yanapashunqui Diospa amigun canayquipaj? Cay yachachicuycho yachacunqui imacunata ruranayquipaj y Jehovaga yanapashunquipämi calpachacuptiqui paypa amigun canayquipaj. Quiquin Diospa palabran nin: “Mañacuptiquega Tayta Dios tarichishunquimi. Asherga tarinquimi” (Mateo 7:7, TDI).

BIBLIA NISHGANTA

“Kushishqami kawapäkunqa Tayta Diosta nistaqkuna” (Mateo 5:3).

CAYTA RURAY

Bibliata waran waranmi chuscu paginacunata leircuy, chayno ruraptiquiga juc watalacho ushanqui.

¿MUSYARGAYQUICHU?

Cay libruta leishpayqui casucurga, claro ricacan Jehová gampaj yarpachacunganta y amigun canayquipaj munan (Juan 6:44).

¡JUCLA RURAY!

Cayta rurashaj Bibliapita shumaj yachacurcunäpaj: ․․․․․

Cayta rurashaj Diosta imaypis mañacunäpaj: ․․․․․

¿Imataraj cay temapita taytäta o mamanëta tapupäman? ․․․․․

¿IMA NINQUITAJ?

● ¿Imataraj ruranquiman Bibliata leishpan cushicunayquipaj?

● ¿Imanirtaj Jehová munan runacuna payta mañacunanpaj?

● ¿Imataraj ruranquiman oraciunniquicuna más ali cananpaj?

[Wilacuy]

Eva jutiyoj jipash nin: “Wamralaraj cashpäga yaparir yaparir umachicushgaläta mañacoj cä. Cananga ali cajcunapita y mana ali cajcunapitapis Diosta wilapä. Cada junaj imaycacuna can Diosta wilapänäpaj”.

[Foto y recuadrupis]

Quiquiqui Bibliayquiwan yachacunayquipaj

1. Bibliapa juc wilacuyninta leinayquipaj acramuy. Jehovata mañacuy yanapashunayquipaj ali tantianayquipaj.

2. Cutin cutin leircuy. Bibliata leishpayquiga ama janalanpäga leicuychu, chaypa trucanga chaycho ima ayca pasaycanganta yarpachacuy. Cayga yanapashunqui cuentata gocunayquipaj imataj pasaycan, pïcuna chaycho parlarcaycan, cushishgachu o laquishgachu parlaycan y maspis... cayta ruraptiquiga Bibliata leishpayqui cushicunquipaj.

  3. Tapucuriy. Leishgayquita usharga, tapucuriy:

● ¿Imanir-raj Jehová Palabrancho cayta churamushga?

● ¿Pïcunataj ali ejemplucuna nogapaj caycan?

● ¿Imatataj leishgäpita yachacö y imanotaj practicaman churäman?

● ¿Cayga imatataj Jehovapita yachachiman?

4. Mañacuy. Jehovata wilapay imata yachacushgayqui Bibliata leishgayquicho y imanotaj practicaman churanqui. Nircur ama gongaychu Palabranpita agradecicunayquipaj.

[Paginacho foto]

“Palabrayquega juc achquinömi. Purinäpaj caminupa achquipämajnömi caycan” (Salmo 119:105, Tayta Diosninchi Isquirbichishan).

[Foto y recuadrupis]

Más alin cajta puntaman churay

¿Tiempuyqui manami canchu Diosta mañacunayquipaj y Bibliata estudianayquipaj? Chayno captinga, yarpachacunquiman imata puntaman churanayqui.

Maslata tantiarcunapaj: Juc baldicho jatun rumicunata churamuy, nircur alpata winarcuy. Chayta rurarga rumicuna alpawan baldicho junta caycanga.

Cananga jucnopana ruray. Alpata y rumicunata jorgamuy y baldiman primero alpata winarcuy, nircur-raj rumicunata churamuy. Cayta rurarga cuentata gocunqui mana jäcunnachu rumicunata churanayquipaj.

¿Imataj yachacunqui caypita? Cawayniquicho alapa ocupado captiqui puclaycunacho o ichic ruraycunachoga, tiempuyqui mana canganachu Bibliata leinayquipaj o espiritual caj ruraycunata ruranayquipaj. Chaymi Bibliaga nin más ‘ali cajcunata ruranayquipaj tantiacäriy’ (Filipenses 1:10). Cay consejuta casucuptiquiga, tiempuyqui canga espiritual caj ruraycunata ruranayquipaj y puclanayquipäpis. Ama gongaychu más alin caj ruraycunata puntaman churanayquipaj.