Mateo 19:1-30
19 Tsayno yacharkatsirmi Galileapita aywar Judeaman chayananpaq Jordán mayu tsimpanparaq Jesús tumamurqan.
2 Paypa qepantami atskaq runakuna aywapäkurqan. Tsaychömi qeshyaqkunatapis aliyätsirqan.
3 *Fariseukunapis tsayman aywaykurmi lutanta parlatsinan kashqa Jesústa tapupäkurqan kayno nir: “¿Ima achäquilapis warminpita runa rakikanmanku o manaku?”
4 Tsayno tapuptinmi Jesús kayno nirqan: “¿Manaku liyipäkushqanki Tayta Diospa palabranta? Tsaychömi niykan olqutapis warmitapis Tayta Dios kamashqanta.*
5 Tsayno kamarkurmi Tayta Dios kayno nirqan: ‘Runaqa mamanpa y taytanpa makinpita yarqukun warminwan mana rakikaypa tänanpaqmi. Ishkaq karpis juklaylanömi kanqa’.*
6 Tsayno niykaptinqa manami ishkaqnatsu kaykan, sinöqa juklaylanönami. Tsaymi Tayta Dios juklatsashqantaqa pipis mana rakinmantsu”.
7 Tsayno niptinmi fariseukuna tapurqan kayno nir: “Tsayno kaptinqa ¿imanirtaq Moisés qelqashqancho niykan warminpita rakikar papilta firmaparkur qarqunanpaq kashqanta?”*
8 Tsawraqa Jesús kayno nirqan: “Runakuna warminpita rakikänanpaq Moisés nirqan chukru shonqu kaptinmi. Itsanqa manami tsayno kananpaqtsu Tayta Dios kamarqan.
9 Tsayno kaptinpis qamkunata kaynömi nï: Mayqan runapis warmin mana jarukuykaptin juk warmiwan tarqa adulteriu jutsatami ruraykan. [Tsaynölami runanpita rakikashqa warmiwan taq runapis adulteriu jutsata ruraykan]”.*
10 Tsawraqa discïpulunkuna kayno nipäkurqan: “Tsayno kaptinqa mas alimi kanman warmiynaqla täkuptin”.
11 Tsawraqa Jesús kayno nirqan: “Manami lapantsu warmiynaq kawayta kamäpakun. Tayta Dios kamakätsiptinmi itsanqa warmiynaqlapis täkun.
12 Wakin runakuna warmiynaq täkunanpaqmi yuripäkun. Wakinqa capashqa kar warmipaq mana yarpantsu. Wakinnami Tayta Dios *mandaykashqancho kawar warmita mana ashintsu. Pipis majaynaq täkuyta munarqa japala täkutsun”.
Wamrakunapaq Tayta Diosta Jesús manakushqan
Marcos 10.13-16; Lucas 18.15-17
13 Tsaypitanami wamrakunata Jesús kaqman apapäkurqan umankunaman makinta churaykur Tayta Diosta manakunanpaq. Wamrakunata aparkaykaqta rikarmi discïpulunkuna michäpäkurqan.
14 Tsawraqa discïpulunkunata Jesús kayno nirqan: “Wamrakunata apakamunanta ama michäpäkuytsu. Wamrano kaqkunapaqmi Tayta Dios *mandaykashqan kaykan”.
15 Tsayno nirkushpanmi wamrakunapa umanman makinta churaykur Tayta Diosta manakurqan. Nirkurnami tsaypita aywakurqan.
Rïcu runa sasataraq salvakunanpaq kashqan
Marcos 10.17-31; Lucas 18.18-30
16 Juk kutichömi Jesúsman chayaykur juk mözu kayno nirqan: “*Rabí, [ali runami kanki]. ¿Ima alitataq ruräman *mana ushakaq kawayta tarinäpaq?”
17 Tsawraqa Jesús kayno nirqan: “¿Imanirtaq ali ruraypaq tapumanki? Juklaylami ali ruraqqa.* Mana ushakaq kawayta tariyta munarqa paypa mandamientunkunata cäsukuy”.
18 Tsay mözunami yapay tapurqan kayno nir: “¿Mayqan mandamientukunatataq cumplïman?”
Tsawraqa Jesús kayno nirqan: “Runa mayikita ama wanutsinkitsu.* Majaykita ama jarukunkitsu.* Ama suwakunkitsu.* Manakaqtaqa pitapis ama tumpankitsu.*
19 Mamaykita y taytaykita respitanki.* Tsaynöpis kikiki kuyakushqaykino runa mayikita kuyanki”.*
20 Tsawraqa mözu kayno nirqan: “Tsaykunataqa [wamra kashqäpita patsami] lapanta cumplishqä. ¿Imataq mas pishiykäman cumplinäpaq?”
21 Niptinmi Jesús kayno nirqan: “Tayta Dios munashqanno kayta munarqa lapan imaykaykikunatapis rantikuykur tsay qellayta waktsakunata qoykuy. Tsayno ruraptikiqa jana patsachömi riquëzayki kanqa. Nirkur qatirämay”.
22 Tsayno niykuptinmi pasaypa rïcu kar tsay mözu lakishqa aywakurqan.
23 Tsawraqa discïpulunkunata Jesús kayno nirqan: “Rasunpami kayno nï: ¡Sasami kaykan rïcu runakuna Tayta Dios *mandaykashqanman yaykapäkunanpaq!
24 Yapaymi qamkunata kayno nï: Rïcu runa Tayta Dios mandaykashqanman yaykushqanpitaqa mas raslami *camëllupis awjapa uchkunpa ushturinman”.
25 Tsayno niptinmi discïpulunkuna pasaypa mantsakashqa kayno nipäkurqan: “Tsayno kaptinqa ¿piraq salvakunqa?”
26 Tsawraqa paykunata rikärishpan Jesús kayno nirqan: “Runakuna salvakunanpaqqa aläpa sasami kaykan. Tayta Diospaqmi itsanqa imapis sasatsu kaykan”.
27 Tsawraqa Pedro kayno nirqan: “Noqakunaqa lapan imaykäkunatapis kachaykurmi qamta qatirpaykä, tayta. Tsayno karkaykaptïqa noqakunapaq ¿imataq kanqa?”
28 Tsayno niptinmi Jesús kayno nirqan: “Rasunpami kayno nï: Mushuq patsacho *Runapa Tsurin chipchipyaykaq trönunman jamaykuptinmi* qamkunapis qatirämashqaykipita chunka ishkay trönukunacho jamakärinkipaq. Tsaychömi chunka ishkay trïbu Israel runakunata juzgapäkunkipaq.*
29 “Noqa rayku pipis wayinta, wawqinkunata, paninkunata, mamanta, taytanta, [warminta,] tsurinkunata y chakrankunatapis kachariq kaqqa pachak (100) kuti mastami chaskinqa. Tsaynöpis mana ushakaq kawaytami tarinqa.
30 Atskaqmi respitashqa kaykaqkuna manakaqman churashqa kanqa. Manakaqman churashqa kaqkunanami respitashqa kanqa”.*
Ichic wilacuycuna
^ fariseo runa Fariseukunaqa Moisés qelqashqan leykunata lapantami yachakärirqan. Tsay leykuna jananmanmi mas leykunata y costumbrikunata yapapäkurqan (Mar. 7.1-4). Tsaykunata yachaykarpis runa mayinta manami kuyarqantsu (Mat. 16.5-12; 23.1-36).
^ 19.4 Gén. 1.27; 5.2.
^ 19.7 Deut. 24.1-4; Mat. 5.31.
^ 19.9 Mat. 5.32; 1Cor. 7.10-11.
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ rabí Rabíqa Tayta Diospa palabranta yachaq y yachatsiq runami karqan. Jesucristo kawashqan witsanmi Tayta Diospa palabranta yachatsir markan markan rabíkuna puripäkurqan. Rabíkunawanmi wakin runakunapis yachakuyta munar puripäkurqan. Tsay runakunatami rabípa discïpulun kashqanta nipäkurqan. Jesucristupis rabími karqan (Juan 1.38; 3.2, 26; 4.31; 6.25).
^ mana ushakaq kaway Mana ushakaq kawayqa Tayta Diospa nawpancho imayyaqpis kawanantsipaqmi kaykan. Tsay kawayta tarirqa Tayta Diosta reqintsimi (Juan 17.3). Mana ushakaq kawayqa kay patsachömi qalaykun (Juan 5.24). Tsay kawayta tarintsi Jesucristuta chaskikurmi (Juan 3.16, 36; 6.40, 47; 14.6; 20.31).
^ 19.17 Wakin qepa kaq griego copiakunachöqa kaynömi niykan: ¿Imanirtaq ali runa kashqäta nimanki? Tayta Dioslami aliqa kaykan. Tsaynömi niykan Mar. 10.18 y Luc. 18.19 versïculukunachöpis.
^ 19.18a Éxo. 20.13; Deut. 5.17.
^ 19.18d Éxo. 20.16; Deut. 5.20.
^ 19.18c Éxo. 20.15; Deut. 5.19.
^ 19.18b Éxo. 20.14; Deut. 5.18.
^ 19.19a Éxo. 20.12; Deut. 5.16.
^ 19.19b Lev. 19.18.
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ camëllu Camëlluqa jatunkaray uywami kaykan. Camëllukunataqa ashmapäkun maypapis aywar cargakunanpaq y muntakunanpaqmi. Tsaynöpis camëllupa milwanta putskarkurmi awapäkuq. Camëllupa milwanpitami Bautizaq Juanpa röpanpis karqan (Mat. 3.4; Mar. 10.25).
^ Runapa Tsurin Runapa Tsurinpaq parlarqa Jesucristo kikinpaqmi parlarqan (Juan 9.35-37). Tsaynöpami tantiyatsirqan Daniel 7.13-14-cho qelqaraykashqanno Runapa Tsurin kashqanta, kutimunanpaq kashqanta (Mat. 13.41-42; 24.27, 30, 44; 25.31) y lapanpaq munayniyuq kashqanta (Mar. 2.10; 2.28).
^ 19.28a Mat. 25.31.
^ 19.28b Luc. 22.30.
^ 19.30 Mat. 20.16; Luc. 13.30.
