Guerra captenga guellay yacuno aywacun.

•   “2,2 billones guellayshi gastacan cay munducho achca guerracuna captin” (The Washington Post, 13 de febrero de 2024).

 Pero manami ayca guellay gastacashganlachu laquichimanchi. ¿Ima nishwantaj Ucraniacho guerrapita?

•   Soldaducuna. 500.000 soldaducunanoshi wanupäcush chay naciuncho guerra galaycushganpita.

•   Waquin runacuna. Naciones Unidas nishgan wilacun 28.000 runacunapitapis mas-shi wanupäcush o wanunanpäna caycanpis. ONU nishgancho aroj juc alto carguyoj runa cayta wilacush: “Guerraraycu ayca gastacashgan o ayca wanupäcushgantaga piraj aliraj musyanman”. a

 Cay munducho guerraraycu imayca nacaycuna may chaycho masraj miraycush.

•   114 millones runacunami guerraraycu marcanta jaguirir aywacärish, chayga 2023 septiembre quillapita pacha.

•   783 millones runacunami micuyraycu sufripäcun. “Cay munducho guerra captinmi runacuna masraj nacapäcun” (Programa Mundial de Alimentos).

 ¿Imaylapis guerracuna ushacangachuraj? ¿Ali cawayta tarishunchuraj? ¿Imacunata rurar-raj cay Pachacho ali caway galaycamunga? ¿Ima nintaj Biblia?

 Bibliaga cawallupita y montarajninpita parlarmi tantiachicorgan canan wichan guerracuna cananpaj.

•   “Tsayno nimuptinmi puka cawallu yarqamurqan. Muntaraqmi jatun espädata chaskirkur aywarqan runakuna chikinakur kikinpura wanutsinakunanpaq” (Apocalipsis 6:4,Tayta Diospa Wilacuynin, TDW).

 Más cawallucunapita parlarpis tantiachicorgan cay munducho micanay, wanuy y imayca guesyacunapis cananpaj (Apocalipsis 6:5-8). Caypita masla yachacunayquipaj leiriy cay yachachicuyta: “¿Qué representan los jinetes del Apocalipsis?”.

 Walcalana pishin cay Pachacho cawaj runacuna guerracunaman yarpaylapis manana yarpapäcunanpaj. Biblia cayno nin:

•   Dios “mandaptinmi maytsaychöpis guërra mana” canganachu (Salmo 46:9, TDW).

•   Diosninchimi ima guerratapis pasaypa ushacächenga. Pï mayta “shoqashpanmi weqinkunatapis pitsapanqa. Wanuypis, waqaypis, lakikuypis y nakaykunapis manami kanqanatsu. Tsaykunaqa lapanmi ushakanqa” (Apocalipsis 21:4, TDW).

•   Chay wichanga tranquilulami goyäcushun. Diosninchi aunicun: “Kuyashqä runakuna karmi markaykikunacho y wayikikunachöpis jawkala täkärinkipaq” (Isaías 32:18, TDW).

 Unayna Biblia wilacushgancuna cumplicaycajta ricar cuentata gocunchi walcalana pishin ali caway chayamunanpaj.

 ¿Imataraj Dios ruranga ali cawayta apamunanpaj? Camacächishgan Gobiernunwanmi ima alicunatapis ruranga (Mateo 6:10). Chay Gobiernupita masla yachacunayquipaj, cay videuta ricay: ¿Imataj Diospa Gobiernun?