República Dominicana suyumanta, Santo Domingo nisqa llajtapi nacekorqani. Tawa wawasmanta sullkʼa kaj kani. Tatasneyqa yachaywasiman rerqanku, kʼacha runas chaupipitaj uywayta munawarqayku. Paykunaqa niraj nacekushajtiy, Mormón religionmanta misionerosta rejsisqanku. Kʼachas, llimphus, sumaj pʼachallisqastaj kasqankoqa, tatasniyta tʼukuchisqa. Chayrayku paykunapis Mormón religionman yaykupusqanku, nisunman Iglesia de Jesucristo de los Santos de los Últimos Días nisqaman. Suyuymantaqa, familiay chay religionman ñaupajta yaykuporqa.

Iglesiay imata ruwajtinpis chaypi kaj kani, chaywanpis mormones familiata, llimphu kausayta ima jatunpaj qhawasqanku, aswan allin noqapaj kaj. Mormón kasqaywan kusisqa karqani, misionerotaj kayta munarqani.

Chunka pusajniyoj watayta juntʼajtiy, sumaj universidadman yaykunaypaj Estados Unidosman riporqayku. Watanmanqa, Florida llajtapi tiyakushajtiyku, tiosniy waturiwarqayku. Paykunaqa Jehovaj testigosnin karqanku, jatun tantakuyninkumantaj wajyariwarqayku. Tantakuypi kajkunaqa, yachachikusqanta Bibliankupi maskʼasharqanku, anotakusharqankutaj. Chayrayku noqapis, chayta ruwanaypaj uj papelta, boligrafotawan mañakorqani.

Tiosneyqa misionero kayta munasqayta yacharqanku. Chayrayku jatun tantakuy tukukusqantawan, Bibliata astawan rejsinaypaj yanapayta munawasqankuta niwarqanku. Chaytaj allin rijchʼawarqa, imajtinchus Bibliamanta nisqaqa, Mormonespa Libronkuta astawan rejserqani.

Tiosniy ripusqankutawan, Bibliamanta telefononejta parlallajpuni kayku.  Paykunaqa imatachus creesqayta, Bibliaj nisqanwan kikinchanayta niwaj kanku. Cheqa kajta sapallaymanta tarinayta munarqanku.

Mormonespa casi tukuy yachachisqankuta creerqani. Chaywanpis, chay yachachiykuna Bibliaj nisqanwan kikinchus manachus kasqanta, mana yacharqanichu. Tiayqa 1995, 8 noviembre killamanta ¡Despertad! revistata apachimuwarqa, chaytataj Jehovaj testigosnin orqhonku. Chay revistaj iskay yachaqanasnin, mormonesmanta parlan. Iglesiaypa ashkha yachachiykunasninta mana rejsisqanichu, chayrayku chay revistapi leesqay cheqachus manachus kasqanta yachanaypaj, imatachus religionniy Internetpi churasqanta maskʼarqani. Tukuy nisqantaj cheqapuni kasqa. Utah llajtapi mormonespa rikuchisqanku wasisman rispa, astawanraj chayta repararqani.

Noqaqa Bibliawan Mormonespa Libronkuwan ujllata yachachisqankuta yuyaj kani. Chaywanpis Bibliata allinta ukhunchaspaqa, churanakusqankuta repararqani.

Chantapis suyunkuta anchata jatunchasqanku mana allinchu rijchʼawarqa. Sutʼincharinapaj, mormonesqa qallariypi Edén huerta Jackson (Misuri, Estados Unidos) llajtapi kasqanta ninku. Chantapis mormonesta kamachejkunaqa, Diospa Reinon Estados Unidospa gobiernonnejta Jallpʼata kamachinanta yachachinku.

Noqataj tapukoj kani: “¿Imataj suyuymanta, waj suyusmanta ima kanqarí? ¿Imatá religionniy chaymanta yachachinrí?”, nispa. Uj kuteqa rejsisqay telefononejta wajyamuwarqa, payqa misioneropaj yachakusharqa. Sutʼimanta tapurerqani: “Suyuyki waj suyuwan maqanakushanman chayqa, ¿chay suyumanta mormoneswan maqanakuwajchu?”, nispa. Paytaj tʼukunaypaj jina, “maqanakuyman” niwarqa. Jinapis religionniy imatachus yachachisqanta ukhunchallarqanipuni, iglesiaymanta sumajpaj qhawasqa kamachejkunatapis tapurqani. Paykunataj tapuykunasniy mana kutichiyniyoj kasqanta niwarqanku, tiemponpitaj sutʼinchakunanta.

Jinata niwasqankoqa sonqoyta pʼakerqa. Chayrayku imaraykuchus misionero kayta munasqayta tapukorqani. Reparakorqanitaj runata yanapayta munasqayrayku, misionerosta jatunpaj qhawasqankurayku imalla, chayta ruwayta munasqayta. Chantapis Diosmanta pisillata yacharqani. Bibliata ashkha kutista leespapis, mana anchata valechejchu kani. Manallataj yacharqanichu, imatachus Dios Jallpʼapaj, runapaj ima ruwayta munasqanta.

Jehovaj testigosninwan Bibliata ukhunchaspaqa, kay imasta yachakorqani: Imachus Diospa sutin kasqanta, imachus wañusqaswan kasqanta, Diospa munaynin juntʼakunanpaj imatachus Jesús ruwasqanta, waj imasta ima. Jinamanta Bibliata rejsiyta qallarerqani. Yachakusqaymanta parlaspataj, ¡mayta miskʼichikoj kani! Dios kasqanta yacharqaniña, chaywanpis kunanqa uj sumaj amigowan jina paywan parlayta atini. Kay 2004, julio killapi 12 pʼunchayta Jehovaj testigon jina bautizakorqani, sojta killanmantaj tiempo juntʼasqata Diospaj llankʼayta qallarerqani.

Brooklyn (Nueva York) llajtapi, Jehovaj testigosnipa oficinasninkupi phishqa watata llankʼarqani. Jallpʼantinpi runaspaj Bibliasta, waj librosta ima ruwaysikuspa tumpallatapis yanapakoyqa, mayta kusichiwarqa. Arí, ¡tukuy kay watasta runa masiyta Diosta rejsinanpaj yanapasqaymanta, sonqo juntʼasqa kani!