Bibliapeqa griego parlaypi tukuy imapi allinta puriy nispaqa, allin kajta ruwaymanta, llimphu kausayniyoj kaymantataj parlashan.

Cristianosqa apóstol Pablo “munallaykutaj tukuy imapi allinta puriyta” nisqanta kasukunku. ¿Ima niyta munan chay?

Tukuy runas niraj wasimanta llojsishaspa espejopi qhawarikunku allin rijchʼayniyoj kayta munaspa. Imajtinchus imayna rijchʼayniyojchus kasqanchejtaqa imayna runachus kasqanchejpi rikukun. Nitaj allin peinasqa, allin pʼachallisqataj kaspallachu allin rijchʼayniyoj kanchej.

Bibliaqa sutʼita nin sajra kajllata ruwayta munasqanchejta. Génesis 8:21 versículo nin: “Runaqa wawamantapacha mana allin kajllata yuyan”, nispa. Tukuy imapi allinta puriyta munaspaqa, sajra kajta ruwayta munasqanchejta atipananchej tiyan. Apóstol Pabloqa imaynapichus rikukusqanmanta jinata nerqa: “Sonqoypeqa Diospa leynimpi kusikuni. Chantá waj leyta ukhuypi rikuni, chaytaj sonqoypa contrampi kashan; presochasqata jucha ruwayman pusawan, mayqenchus noqapi kashan, chayman”, nispa (Romanos 7:22, 23).

Sonqonchej mana allin ruwayman aysawajtinchejqa, mana atipachikunachu. Imachus allin kajta chayri mana allin kajta noqanchej ajllayta atinchej. Allin kajta ajllaspaqa, allinta puriyta ajllanchej kay sajra pachapi kausaspapis.

Imapichus creesqanchejqa allinta purinapaj yanapawasun. Chaywanpis ashkha runasqa, allinpaj qhawasqa kayllapi yuyasqankurayku mana allin kajta ruwanku. Chantapis ruwasqanku allillan kasqanta ninku. Chaymanta parlaspa uj libro nin: “Wajkunata chʼaukiyanchej allin kajta ruwashasqanchejta yuyaspa”, nispa. Jinapis, ¿imataj yanapawasunman maykamachus mana cheqan kajman jina ruway allillan kasqanta yachanapaj?

May chhika runas yachakunku Biblia uj sumaj yanapa kasqanta. Diospa Palabran nisqanqa ni imawan kikinchakunchu (Salmo 19:7). Bibliaqa yanapawanchej familia ukhupi, llankʼaypi, llimphu kausayniyoj kanapaj, Diosta yupaychanapaj ima. Yuyaychasqantaj kunankama yanapallawanchejpuni. Bibliaj kamachiykunasnin, yuyaychaykunasnin imaqa, tukuy laya llajtaspaj, runaspaj, parlaykunapaj, aylluspaj ima. Bibliata leespa tʼukurisun, chayman jinataj kausakusun chayqa, tukuy sonqo allin kajta ruwasun.

 Kay sajra pachapi kausasqanchejrayku sajra ruwaykunaman tanqasqa kanchej. Chaytataj mana Bibliata rejsispallachu atipasun. Astawanpis Diosmanta mañakunanchej tiyan yanapanawanchejpaj (Filipenses 4:6, 7). Ajinallamanta mana manchachikuspa tukuy imapi allinta purisun.

Hitoshitaqa, pimantachus ñaupaj kaj yachaqanapi parlarerqanchej, mana llullakuspa llankʼayta munasqanrayku allin rerqa. Kunantaj payqa llankʼashan kʼacha runapaj. Hitoshi nin: “May agradecesqa kashani. Imajtinchus mana sonqoy juchachanawanpaj jina llankʼayta tarini”, nispa.

Wajkunatapis allillantaj rerqa. Chayrayku kunanqa Biblia yuyaychasqanman jina, “tukuy imapi allinta puriyta” munajkunata allin risqanmanta parlarina.

• Sonqonku mana juchachanchu

  Irlanda suyumanta Cheryl, nin: “Chunka kinsayoj kashaspa escuelamanta llojsiporqani suwaswan ‘llankʼanaypaj’. Casi tukuy ganasqayqa suwasqaymanta karqa. Aswan qhepamantaj casarakorqani, qosaywan khuskataj Jehovaj testigosninwan Bibliamanta yachakorqayku. * Chaypitaj yachakorqayku Diosqa mana allin ruwayta chejnisqanta, chayrayku ñaupa kausayniykuta saqeporqayku. Kay 1990 watapitaj bautizakorqayku Jehovaj testigosnin jina (Proverbios 6:16-19).

  ”Wasiypeqa suwasqay imaslla kapuwarqa, kunantaj manaña. Sonqoypis niña juchachawanchu. Suwakuspa kausasqay tiempomanta yuyarikuspaqa Jehovata agradecekuni khuyakuwasqanrayku. Chantapis ni imamanta llakikuspa puñukapuni Jehová kusisqa kashasqanta yachaspa”, nispa.

  Hong Kong llajtamanta Sonny, nin: “Ni imarayku llukʼiykuchikuyta munasqayta yachaytawan patronniy niwarqa: ‘Diosniyki yanapasunki atienekunapaj jina kanaykipaj. May sumajpuni kay empresapi llankʼasqaykeqa’, nispa. Cheqan kajman jina ruwaspaqa, Jehovaj ñaupaqenpi allinpaj qhawasqa kanaypaj yanapawan. Chantapis familiayta, wajkunatapis ajinallataj kanankupaj yanapayta atini”.

• Sonqo tiyasqa kausakuy

  Estados Unidosmanta Tom, nin: “Uj jatun bancopi llankʼani. Kay jina llankʼaypeqa, astawan gananarayku mana cheqan kajta ruwayqa yachasqalla. Tukuytaj ninku: ‘Mana allin kajta ruwayqa allillan, imajtinchus astawan ganakun’. Chaywanpis cheqan kajman jina ruwaspaqa sonqo tiyasqa kausakuni. Patronesneyqa yachanku mana paykunarayku, nitaj paykunamanpis llullakunayta”, nispa.

• Respeto

  Japón suyumanta Kaori, nin: “Llankʼayninmanta encargadoqa, wakin materiales chinkajtin llullakunayta niwarqa, nitaj munarqanichu. Pikunachus suwasqankuta yachakojtintaj patronqa mana llullakusqaymanta agradecesqa kasharqa. Kay pachapi mana llullakunapajqa mana manchachikuyniyoj kananchej tiyan. Jinamanta tukuypis atienekuwanchej, respetawanchejtaj”, nispa.

Tukuy imapi allinta purejtinchejqa mana sonqonchej juchachawanchejchu, sonqo tiyasqa kausakunchej, wajkunapis respetawanchej. Chaytaj may sumajpuni.