¿REJSINKICHU pisi willajkuna kanku chay suyuman ripoj hermanosta? Maykʼajllapis kayta tapurikorqankichu: “¿Imataj chay hermanosta waj suyuman ripunankupaj yanaparqa? ¿Imaynatá chay hermanos wakichikunku waj suyuman ripunankupaj? ¿Noqapis waj suyuman ripuymanchu?”, nispa. Kay tapuykunaj kutichiyninta tarinapajqa, waj suyupi Diosta sirvej hermanoswan parlarisunman. Imatachus paykuna nisqankuta qhawarina.

¿Imataj yanaparqa pisi willajkuna kanku chay suyuman ripunankupaj? Amyqa, Estados Unidosmanta 35 watasniyoj jinaña. Pay nin: “Ashkha watasta tʼukurerqani Diosta sirvej waj suyuman ripuypi, yuyarqanitaj chayta ni jaykʼaj atinayta”, nispa. ¿Imataj yanaparqa niña jinata yuyananpaj? Amy nin: “Kay 2004 watapi Belice suyupi Diosta sirvej uj qhariwarmi wajyariwarqanku, paykunawan khuska uj killata Diosmanta willanaypaj. Rejtiytaj, mayta gustawarqa. Watanmantaj Ghana suyuman riporqani precursora jina llankʼanaypaj”, nispa.

Stephanie, Estados Unidosmanta, 30 watasniyoj jinañataj kashan. Payqa may unayña sumajta tʼukurerqa, nerqataj: “Jehovapaj astawan llankʼayta atiyman, imaraykuchus mana onqosqachu kani, nitaj qosayojchu, nitaj wawasniyojchu kani”, nispa. Ajinata tʼukurisqantaj, Diosmanta willaj Ghanaman ripunanpaj yanaparqa. Filip, Ida uj qhariwarmi Dinamarca suyumanta kanku, 60 watasniyoj jina. Paykunaqa precursores kanku, pisi willajkuna kanku chaymantaj ripuyta munarqanku. Chayraykutaj tukuy imata ruwarqanku. Filip nin: “Ripuyta atejtiykutaj, Jehovapis riychej nishawaykuman jina karqa”, nispa. Kay 2008 watapi Ghanaman riporqanku, kinsa wata kurajtataj chaypi sirverqanku.

 Hans, Brook uj qhariwarmi, 30 kuraj watasniyoj kanku Estados Unidospitaj sirvishanku. Paykunaqa 2005 watapi sinchʼi wayra Katrina nisqa kajtin mayta yanapakorqanku. Aswan qhepamantaj waj suyuspi Tantakuna Wasista ruwaypi yanapakunankupaj uj solicitudta juntʼacherqanku, jinapis mana wajyarisqaschu karqanku. Hans nin: “Uj jatun tantakuypi uj umallirichiypi rey Davidmanta uyarerqayku. Jehovaqa payta mana saqerqachu templota ruwananta, jinapis Davidqa Jehovata tukuy sonqo kasukorqa, waj jinamantataj yanapakorqa. Chaytaj yanapawarqayku Diospa llajtanpi waj jinamanta yanapakunaykupaj”, nispa (1 Cró. 17:1-4, 11, 12; 22:5-11). Brook nin: “Jehovaqa waj jinamanta llajtanpi yanapakunaykuta munarqa”, nispa.

Paykunaqa waj suyupi precursores jina llankʼayta munarqanku, amigosninku waj suyuspi Diosta sirvispa may kusisqa kashasqankuta willarisqankurayku. Kay 2012 watapitaj Ghanaman ripuspa tawa killata makiswan parlaj congregacionpi yanapakorqanku. Estados Unidos suyunman kutipunanku kajtinpis, Ghanapi Diospaj llankʼasqankoqa Diospa gobiernonta ñaupajman churanallankupajpuni yanaparqa. Chaymantapachataj Micronesia Betelta ruwaypi yanapakorqanku.

¿Imaynatá wakichikorqanku pisi willajkuna kanku chaypi sirvinankupaj? Stephanie nin: “Torremanta Qhawaj revistapi, pisi willajkunalla kanku chaymanta parlaj yachaqanasta maskʼarqani. Chantá ancianosniywan, congregacionesta waturej hermanowan, warminwan ima parlarerqani waj suyupi sirviyta munasqaymanta. Astawantaj Jehovaman mañakuypi mayta willarqani”, nispa. * Stephanieqa qolqenta mana usuchejchu, chayraykutaj waj suyupi sirvej rinanpaj qolqeta waqaychakuyta aterqa.

 Hans nin: “Diosmanta yanapata mañakorqayku, maymanchá pay munan chayman rinaykupaj. Mañakuyniykupitaj ima fechachus ripunaykuta nerqayku”, nispa. Chay qhariwarmeqa tawa Betelkunaman cartasta apacherqanku. Ghana Betelmanta kutichimojtinkutaj, Ghanaman iskay killapaj riporqanku. Hans nin: “Congregacionmanta hermanoswan khuska llankʼaspa mayta kusikorqayku. Chayraykutaj chay lugarpi aswan unayta qhepakorqayku”, nispa.

George, Adria qhariwarmi Canadá suyumanta kanku, 40 watasniyoj jinataj. Paykunaqa allinta yacharqanku Jehová ruwasqanchejta bendecisqanta, nitaj allinta ruwayta munasqallanchejtachu. Chayrayku mayta kallpachakorqanku munasqankuta ruwanankupaj. Ghanapi pisi willajkuna kanku chaypi sirvej hermanawan parlarerqanku, tukuy imatataj tapurerqanku. Canadá Betelman, Ghana Betelman imataj cartasta apacherqanku. Adria nin: “Pisi imasllawanña kausakuspapis, kapuwasqaykuta astawan pisiyacherqayku”, nispa. Chayta ruwasqankuraykutaj 2004 watapi Ghanaman riporqanku.

¿Ima chʼampaykunapitaj rikukorqanku waj suyuman ripuytawan, imaynatá chayta atiparqanku? Amyqa qallariypi familianta faltachasqanrayku sinchʼita llakikorqa. Pay nin: “Tukuy imapis mana llajtaypi jinachu karqa”, nispa. ¿Imataj yanaparqa? Pay nillantaj: “Familiaresniy wajyarimuwaspa Jehovapaj may sumajta ruwashanki niwasqanku, Jehovata chay lugarpi sirvinallaypajpuni yanapawarqa.  Aswan qhepamantaj familiaywan Internetnejta parlarej kayku. Internetnejta rikunakusqaykuraykutaj, manapis karupichu kashayman jina karqa”, nispa. Amyqa chay lugarmanta uj hermanawan amigas ruwakorqa, chaytaj yanaparqa chay lugarmanta costumbresta entiendenanpaj. Amy nin: “Chay lugarmanta runasqa imata ruwajtiypis uj jinayaj kanku. Amigaytaj yanapawarqa imaraykuchus uj jinayasqankuta entiendenaypaj. Niwarqataj imastachus ruwanayta, imastatajchus mana ruwanayta chay runas mana uj jinayanankupaj. Chaytaj yanapawarqa Diosta kusiywan sirvinaypaj”, nispa.

George, Adria ima Ghanaman chayaspa ñaupaj wataspipis kausakushankuman jina sientekorqanku. Adria nin: “Lavadorapi tʼajsanaykumantaqa, baldespi tʼajsaj kayku. Waykʼuspapis astawan unaypi waykʼoj kayku. Chʼampaykunapi rikukusqaykuta, tiemponman kusiywan yuyarikorqayku”, nispa. Brook nin: “Chʼampaykunapi rikukuspapis, kusisqas kausakuyku. Imaspichus may allin riwasqaykumanta parlarispataj, may kusiywan yuyarikuyku, mayqentachus ni jaykʼaj qonqasqaykuchu”, nispa.

¿Imaraykutaj wajkunata kallpachariwaj waj suyuman ripunankupaj? Stephanie nin: “Mayta kusikuni cheqa kajmanta sapa pʼunchay yachakuyta munaj runas tiyakunku chaypi willaspa. Pisi willajkuna kanku chayman sirvej ripuyta ajllasqayqa may sumajpuni”, nispa. Kay 2014 watapi Stephanie, Aaronwan casarakorqa, kunantaj Ghana Betelpi llankʼashanku.

Alemania suyumanta uj precursora Christine sutiyoj nin: “May sumajpuni karqa kayman jamoyqa”, nispa. Payqa 30 watasniyojmanta astawanña, niraj Ghanaman ripushaspataj Boliviapi Diosta sirverqa. Pay nillantaj: “Familiaymanta karupi kaspa, Diosmanta yanapata mañakojpuni kani. Paytaqa rikushaymanpis jina qhawani. Chantapis Diospa llajtan may ujchasqa kasqanta rikuni. Diosta sirveyqa, Diosta yupaychaypi qhapajyachiwan”, nispa. Christineqa kunallanraj Gideon sutiyoj hermanowan casarakun, iskayninkutaj Ghanapi sirvishanku.

Filip, Ida ima Bibliamanta yachakojkunata ñauparinankupaj imatachus yanapanankupaj ruwasqankumanta willariwanchej. Paykuna ninku: “Chunka phishqayoj runasmanta astawan yachachej kayku, jinapis sumajta yachachinaykupaj chunka runasllamanña yachachiyku”, nispa. ¿Yachakojkuna ñauparerqankuchu? Filip nin: “Michael sutiyoj uj jovenman yachacherqani. Payqa sapa pʼunchaypis yachakuyta atillaj, sumajta wakichikusqanraykutaj Yachachin librota uj killapi tukorqayku. Chaymantataj Michaelqa willayman llojsiyta qallarerqa. Ñaupaj kutirayku llojsispataj, tapuriwarqa: ‘¿Estudiosniywan yanapariwankimanchu?’, nispa. Noqataj tʼukulla qhawarerqani. Michaelqa kinsa runasmanña yachachishasqanta, sumajta yachachinanpajtaj yanapata necesitasqanta ima niwarqa”, nispa. Ghanapeqa Diosmanta yachachejkuna pisilla kanku, yachakojkunapis yachachishanku.

Amyqa ashkha yanapa necesitakusqanta reparasqanta willariwanchej, pay nin: “Ghanaman chayasqaykumanta pisi tiemponman, uj juchʼuy llajtitaman willaj rerqayku, makiwan parlaj runasta maskʼaj. Uj llajtitallapi pusaj runastapuni tarerqayku”, nispa. Tiemponmanqa Amy, Ericwan casarakorqa. Iskayninkutaj makiwan parlaj congregacionpi precursores especiales jina kashanku. Ghana suyupeqa makiwan parlajkunamanta willajkuna, Bibliamanta yachakuyta munajkuna ima 300 kuraj kanku. George, Adria ima, Ghanapi misioneros jina karqanku, chayrayku mayta kusikorqanku Galaad Escuelaman, clase 126 nisqaman wajyarejtinku. Kunantaj Mozambique suyupi misioneros jina llankʼashanku.

May sumajpuni waj suyusmanta hermanos sumajta chay suyusmanta kaj hermanoswan khuska Diosmanta willasqankoqa (Juan 4:35). Ghanapi sapa semana 120 runas bautizakunku. Ghanaman 17 hermanos ripojkuna jina, Jallpʼantinmanta may chhika hermanos Jehovata munakusqankurayku ‘jaywaykukunku’ payta sirvinankupaj. Paykunaqa pisi willajkuna kanku chaypi sirvishanku. Jehová Diostataj mayta kusichinku (Sal. 110:3; Pro. 27:11).