DANIEL libroqa Babiloniapi kaj rey Belsasarmanta parlan (Dan. 5:1). Jinapis Biblia pantasqa kasqanta nejkunaqa, ashkha watasta nerqanku Belsasarqa ni jaykʼaj kausasqanta. ¿Imaraykutaj chayta nej kanku? Imaraykuchus ni ima karqachu Belsasar kausasqantapuni rikuchinapaj. Jinapis imachus 1854 watapi kasqanta qhawarina.

Chay watapi Gran Bretañamanta John Taylor sutiyoj runaqa, Irak suyoj uranejninpi kaj raqaykunata qhawaj risqa. Chay raqaykunaqa, ñaupa tiempopi Ur sutiyoj llajta karqa. Johnqa chay lugarpi uj jatun torreta rikusqa. Chay ukhupitaj, tʼurumanta sumaj ruwasqa chhoqo kʼurpitasta jina tarisqa. Sapa kʼurpitaqa chhoqonman 10 centimetrosniyoj jina karqa, ñitʼisqa qhelqayojtaj. Chay kʼurpitasmanta ujninpeqa, Babiloniamanta rey Nabonidoj mañakuynin qhelqasqa rikhurin. Payqa diosesninmanta mañakusqa, paypis, kuraj wawan Belsasarpis unayta kausakunankupaj. Chay qhelqasqaqa sutʼita rikucherqa Belsasar kausasqantapuni. Bibliaj nisqanta mana creejkunapis, mana iskayrayarqankuchu.

Chaywanpis Bibliaqa mana Belsasar kausasqallantachu nin, manaqa rey kasqantapis nillantaj. Biblia pantasqa kasqanta nejkunarí, Belsasar rey kasqantañataj mana creerqankuchu. Paykunamanta ujnenqa Inglaterramanta William Talbot karqa. Payqa científico karqa, 1875 wata chaynejpitaj qhelqarqa: “Wakenqa ninku Belsasar tatan Nabonidowan khuska kamachisqanta. Jinapis chaytaqa ni ima rikuchinchu”, nispa.

Chaypis sutʼinchakullarqataj. Imaraykuchus yachayniyoj runasqa, astawan chhoqo kʼurpitasta tarisqanku. Chaykunapitaj qhelqasqa kasqa, Belsasarpa tatan rey Nabonidoqa, chay kamachina llajtanmanta watasta ripusqanta. Chantá, ¿pitaj Babilonia llajtapi kamachinanpaj qhepakoj? Belsasar. ¿Imaraykutaj chayta ninchej? Chay tiempomanta sumajta sutʼinchaj libro nin: “Rey Nabonidoqa waj llajtaman rispa, wawan Belsasarta kamachejta jina saqej. Paypa makinpi saqellajtaj casi tukuynin soldadosninta”, nispa. Chayrayku Alan Millard sutiyoj runapis nin: “Daniel libropi Belsasar ‘rey’ kasqanta nisqanqa, kusalla kashan”, nispa. Payqa unay tiempopi kaj imasmanta, parlaykunamantawan sumajta yachan.

Diospa kamachisnenqa yachanchej Daniel libro cheqatapuni parlasqanta, Diospunitaj qhelqachisqanta. Imaraykuchus chay libroqa Bibliapi kashan (2 Tim. 3:16).