Adán ñaupa tatanchej kasqanrayku, tukuy uj familia jina kanchej. Uj familiapi munakuy, respeto ima kananta suyajtinchejpis, mana jinachu. Chaywanpis Diosqa mana ajina kanantachu munarqa.

‘Runa masiykichejta munakuychej qankuna kikiykichejta jina’ (LEVÍTICO 19:18).

“Enemigosniykichejtaqa munakullaychejpuni” (MATEO 5:44).

Diosqa, Palabranpi 1 Corintios 13:4-7 versiculospi nin imaynachus munakuyniyoj runa kasqanta.

“Munakuyniyoj runaqa pacienciayoj, kʼachataj”.

Kaypi tʼukuriy. ¿Imaynataj sientekunchej wajkuna pacienciakuwajtinchej, kʼachas kajtinku, pantaykojtinchejpis mana phiñakojtinku?

“Munakuyniyoj runaqa mana envidiakunchu”.

Kaypi tʼukuriy. ¿Imaynataj sientekunchej wajkuna mana noqanchejpi atienekuwajtinchej, envidiakuwajtinchejtaj?

Munakuyniyoj runaqa “mana payllapajchu imatapis maskʼan”.

Kaypi tʼukuriy. ¿Imaynataj sientekunchej wajkuna imatachus nisqanchejta respetajtinku, nitaj nisqankutapunichu valechejtinku?

Munakuyniyoj runaqa “mana usqhayllata phiñakunchu”.

Kaypi tʼukuriy. Diosqa juchasninkumanta pesachikoj runasta perdonananpaj wakichisqa kashan. “Mana tukuy kutichu kʼamiwanchej, phiñakuynintaj mana wiñaypajchu” (Salmo 103:9). Pitachus sonqonta nanacherqanchej chay runa perdonawajtinchejqa, kusikunchej. Chayrayku noqanchejpis wajkuna sonqonchejta nanachiwajtinchej usqhayllata perdonana (Salmo 86:5).

“Munakuyniyoj runaqa mana kusikunchu mana cheqan kajmantaqa”.

Kaypi tʼukuriy. Imallapipis mana allin riwajtinchejqa, mana munanchejchu wajkuna kusipayanawanchejta. Chayrayku mana kusikunchejchu, wajkuna llakiypi kashajtinku, maytapuni sonqonchejta nanachiwarqanchej chaypis.

Dios bendecinawanchejta munanchej chayqa, tukuy runasta munakunanchej tiyan, maymanta kajtinkupis, ima edadmanta kajtinkupis, ima religionniyoj kajtinkupis. Chaytataj rikuchisunman pikunachus yanapata necesitanku, chaykunata yanaparispa.