Diosqa cuerponchejta sapallanmanta sanoyayta atinanpaj jina ruwarqa. Chayrayku khuchurpakojtinchej, rasmillarpakojtinchej, chayri imallawanpis tʼujsirpakojtinchej, cuerponchejqa sanoyapunanpaj chay rato trabajan. Ñaupajtaqa yawarta sayachin, chantá tʼiriykuchin, chaymantataj watejmanta aychallikun.

TʼUKURINA: Diosninchej cuerponchejta sapallanmanta sanoyapunanpaj jina ruwan chayqa, nanasqa sonqonchejtapis jampillanmantaj. Salmo 147:3 versiculota qhelqajqa, Diosmanta nerqa: “Payqa sonqo pʼakisqasta thañichin, nanasqasninkutataj jampiykun”, nispa. ¿Imaynapí yachasunman Diosninchej pʼakisqa sonqonchejta jampinantapuni?

Diosqa niwanchej: “Ama manchachikuychu, imaraykuchus noqaqa qanwampuni kashani. Ama sonqoyki qʼenaqakuchunchu, imaraykuchus noqaqa Diosniyki kani. Noqa kallpachasqayki, yanapallasqaykitaj; justiciata ruwaj paña makiywan sayachillasqaykipuni”, nispa (Isaías 41:10). Jehová Diosninchej munakuwasqanchejta yachayqa, sonqonchejta tiyaykuchin, llakiykunata atipanapajtaj kallpachawanchej. Apóstol Pabloqa chay “sonqo tiyaykuyta” Dios qowasqanchejta nerqa, “mayqentachus runas mana entiendeyta atinkuchu, chayta”. Chantá nillarqataj: “Tukuy imapaj kallpayoj kani, Dios atiyta qowasqanrayku”, nispa (Filipenses 4:4-7, 9, 13).

Bibliaqa Jehová Diospa nisqanpi atienekunapaj yanapawanchej. Apocalipsis 21:4, 5 niwanchej imastachus Dios ruwananta, chantá imaraykuchus paypi atienekunata ima. Chay versiculosqa 15 paginapi kashan.

• Diosqa runaspa “ñawisninkumanta tukuy waqayta pichanqa”. Llakiyninchej wakinpaj mana sinchʼichu kajtinpis, Jehová Diosqa tukuy llakiyninchejta, nanayninchejta ima chinkachenqa.

• Tukuy atiyniyoj Diosninchejqa, cielopi “kamachina tiyanapi” tiyaykonqa. Chantá manaña ujtawan ñakʼarinanchejta saqenqachu, necesitajtinchejtaj yanapawasun.

• Jehová Diosninchejpa nisqanqa, “atienekunapaj jina”, “cheqataj”. Mana llullakoj Dios kasqanqa, imatachus nisqanta juntʼananpaj uj garantía jina.

“‘Payqa ñawisninkumanta tukuy waqayta pichanqa, manañataj wañuy kanqachu, nitaj llakiypis, nitaj qhapariypis, nitaj nanaypis. Chay ñaupaj kaj imasqa chinkapunña’, nispa. Kamachina tiyanapi tiyasqa kajtaj nerqa: ‘Tukuy imata mosojyachishani’, nispa. Nillarqataj: ‘Qhelqay, imaraykuchus kay palabrasqa atienekunapaj jina kanku, cheqataj kanku’, nispa” (Apocalipsis 21:4, 5).

Diostaqa ruwasqasninnejta, Biblianejta ima rejsisunman. Diospa ruwasqasnenqa, chʼinllamanta niwanchej payman qayllaykunanchejta. Bibliatajrí sutʼimanta niwanchej: “Diosman qayllaykuychej, paytaj qankunaman qayllaykamusonqachej”, nispa (Santiago 4:8). Hechos 17:27 versiculotaj niwanchej, Diosqa “mana karupichu kashan sapa ujninchejmanta”.

Diosninchejta astawan rejsispaqa, ‘pay qanmanta llakikusqantapuni’ yachanki (1 Pedro 5:7). Chayta yachay, ¿yanapasunkimanchu?

Japonmanta Toru sutiyoj runamanta parlarina. Maman Diosmanta yachachejtinpis, Toruqa may sajra runaswan ujchaykukusqa. Chay runasqa Japonpi wajkunata wañuchisqankumanta, waj sajra imastawan ruwasqankumanta rejsisqa karqanku. Toru nin: “‘Diosqa chejnikuwanchá’ nej kani. Rejsisqasniy wañojtinkutaj, juchaymanta Dios castigashawasqanta piensaj kani, astawanraj familiasniy chayri amigosniy wañojtinku”. Toruqa chay sajra runaswan purisqanrayku, “mana khuyarikoj sajra runaman” tukorqa. Pay nin: “Yuyarisqa kanaypaj may rejsisqa runata wañuchiyta munarqani. Chaymantataj joven wañupuyta munarqani”, nispa.

Ajinapi Toruwan señoranwan Bibliata estudiayta qallarisqanku. Bibliapi yachakusqanman jinataj,  Toruqa kausayninta cambiasqa, rijchʼayninpis niña millaychu karqa. Toruj warmin nin: “Qosay cambiasqanqa mana creenapaj jina karqa”, nispa. Kunanqa Toru nin: “Diosqa tiyanpuni, sapa ujninchejmantataj llakikun. Payqa mana munanchu pipis wañunanta, payman kutirikunanchejtataj munan. Diosmanqa tukuy imata willakuyta atinchej. Paytaj ni pi jina sumajta entiendewanchej. Jehová Diosqa pisimantawan tukuy llakiyta, nanayta, problemasta ima chinkachenqa. Kunanpis tukuy imaymanamanta yanapashawanchej. Payqa noqanchejmanta mayta llakikun. Sonqo pʼakisqa kashajtinchejpis kallpachawanchej” (Salmo 136:23).

¿Imatá Toruj kausaynin rikuchiwanchej? Diosninchej tukuy llakiyninchejta pisimantawan chinkachinanta yachayqa, aswan sumaj kausayta suyakunapaj yanapawanchej. Chantapis kunanña kusisqa kausakunapaj yanapawanchej. Kay mundo llakiykunamanta juntʼa kajtinpis, Dios munakuwasqanchejta yachayqa mayta yanapawanchej.