¿Pikunataj Diospa Llajtanta Kamachejkuna kanku, chanta imastataj ruwanku?
Diospa Llajtanta Kamachejkunaqa uj juchʼuy grupo experienciayoj cristianos kanku. Chantapis paykunaqa jallpʼantinmanta Jehovaj testigosninta ñaupajman pusashanku. Chaytataj iskaynejmanta ruwanku.
Paykunaqa Bibliamanta yachachiykuna imaynatachus wakichikusqanta qhawarinku. Chay yachachiykunaqa llojsimun revistaspi, librospi, videospi ima. Tukuy chaykunatataj ukhunchayku tantakuykunapi, Bibliamanta yachakunapaj escuelasta ruwayku chaykunapi ima (Lucas 12:42).
Paykunaqa imaynatachus jallpʼantinpi predicakunanta qhawarinku. Jehovaj testigosnin qolqesitunkumanta churasqankutapis allinta apaykachanku.
Diospa Llajtanta Kamachejkunaqa imaynatachus ñaupa tiempomanta cristianos ruwaj kanku ajinata ruwanku. Ñaupa tiempomanta Jerusalenpi apóstoles, ancianospis congregacionpi cristianos imastachus ruwanankuta ajllaj kanku. Jinapis paykunaqa mana patrones jinachu kamachej kanku (Hechos 15:2, 6). Diospa Llajtanta Kamachejkunapis mana patrones jinachu Jehovaj testigosninta kamachinku. Astawanpis Bibliata sumajta ukhunchanku, chayman jina imatapis ajllanankupaj. Chantapis sut’ita yachanku Jehová Diosqa, Jesucristota congregacionmanta umata jina churasqanta (1 Corintios 11:3; Efesios 5:23).
¿Pikunataj Diospa Llajtanta Kamachejkuna kanku?
Paykunaqa kanku: Kenneth Cook, Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, Jeffrey Winder ima. Paykunaqa Warwick llajtapi kaj centralniykupi llankʼashanku. Chaytaj Nueva Yorkpi kashan.
Diospa Llajtanta Kamachejkuna, ¿imaspitaj yanapakunku?
Diospa Llajtanta Kamachejkunaqa, jallpʼantinpi Jehovaj testigosnin imatachus ruwanku, chaypi yanapanankupaj sojta comisionesta churanku. Sapa comisionpitaj paykunamanta uj chayri iskay yanapakunku.
Coordinadores kajkunamanta Comisión. Kay comisionpi llankʼajkunaqa tukuy ima leyesman jina kananpaj qhawanku. Chantapis hermanosninchej jatun llakiykunapi rikhurejtinku, Diosta yupaychasqankurayku qhatiykachasqa kajtinku, manachayrí kaymanta jinalla ima llakiykunapipis rikukojtinku yanapanku.
Llankʼajkunapaj Comisión. Kay comisionpi llankʼajkunaqa jallpʼantinpi Betel wasispi llankʼajkunaj, nisunman sucursalespi llankʼajkunaj allinninkuta maskʼanku.
Publicacionespaj Comisión. Kay comisionpi llankʼajkunaqa publicaciones imprimikunanta, jallpʼantinmanta congregacionesman apachikunanta ima qhawanku. Chantá jallpʼantinpi Tantakuna Wasis, sucursales, traducinapaj oficinas ima, imaynatachus ruwakunanta qhawarinku.
Willaypaj Comisión. Kay comisionpi llankʼajkunaqa ‘jallpʼantinpi Diospa Gobiernonmanta sumaj willaykuna’ willakunanta qhawarinku (Mateo 24:14).
Yachachinapaj Comisión. Kay comisionpi llankʼajkunaqa tantakuykunapi, jinallataj escuelaspi, ima yachachiykunachus, ima videoschus, ima grabacioneschus llojsinanta qhawarinku.
Qhelqajkunapaj Comisión. Kay comisionpi llankʼajkunaqa Diospa llajtanpaj yachachiykunata wakichinku. Chantapis Internetpi jw.org nisqa paginapi, ima yachachiykunachus llojsinanta, traducinapaj oficinaspi ima publicacioneschus traducikunanta ima qhawarinku.
Diospa Llajtanta Kamachejkunaqa kay sojta comisionespi yanapakuspapis, paykunaqa sapa semana tantakullankutaj Diospa llajtan imastachus necesitasqanta qhawarinankupaj. Chay tantakuykunapeqa Bibliata ukhuncharinku, Diospa espíritu santontapis mañakunku sumaj yuyaychaykunata tarinankupaj, ajinamanta paykunaqa uj yuyayllaman chayanku (Hechos 15:25).
Diospa Llajtanta Kamachejkunata yanapajkuna
Diospa Llajtanta Kamachejkunata yanapajkunaqa, sojta comisionespi tʼaqasqa kashanku. Sapa comisionpitaj sumaj wakichisqa, sumaj experienciayoj cristianos kashanku. Paykunaqa churasqa kanku Diospa Llajtanta Kamachejkunamanta hermanos imatachus encargasqankuta ruwanankupaj (1 Corintios 4:2). Chantapis paykunaqa Diospa Llajtanta Kamachejkunawan sapa semana tantakullankutaj. Chaypitaj Diospa Llajtanta Kamachejkunaman imatachus ukhunchasqankuta rikuchinku, imaynatachus ruwakunanmantapis parlarinku. Jinapis imaynatachus ruwakunantaqa, Diospa Llajtanta Kamachejkuna ajllanku. Chantapis Diospa Llajtanta Kamachejkunaqa, pikunachus paykunata yanapanku chaykunata waj suyuspi hermanosta visitarej rinankupaj kachanku. Kachasqa hemanostaj jatuchaj tantakuykunapi, manachayrí Galaad Escuelapi kaj hermanosta discursosninkuwan kallpacharinku.
Comisión |
Sutis |
---|---|
Coordinadores kajkunamanta Comisionpi yanapakun |
|
Llankʼajkunapaj Comisionpi yanapakunku |
|
Publicacionespaj Comisionpi yanapakunku |
|
Willaypaj Comisionpi yanapakunku |
|
Yachachinapaj Comisionpi yanapakunku |
|
Qhelqajkunapaj Comisionpi yanapakunku |
|