Pabia ku Jesus comadu di Fiju di Deus?
Resposta di Biblia
Manga di bias Biblia coma Jesus di “Fiju di Deus”. (Jon 1:49) Spreson “Fiju di Deus” ta mostra kuma Deus i Kriadur, o Fonti, di tudu vida, nkluindu di Jesus. (Salmu 36:9; Apokalipsi 4:11) Biblia ka sina kuma Deus tene fiju na sintidu literal, suma ku pekaduris ta tene.
Biblia coma tambi anjus di “fijus di Deus”. (Kumsada 6:2) Biblia fala di kuma, purmeru omi Adon, seduba “fiju di Deus.” (Lukas 3:38) Ma, suma Jesus i purmeru kriason di Deus i uniku ku kumpudu diretamenti pa rel, Biblia fala Jesus i pumeru Fiju di Deus.
Sera ki Jesus viviba na seu antis di padidu na Tera?
Sin. Jesus seduba un kriatura spiritual na seu, antis di padidu suma umanu na Tera. Jesus propi fala: “Ami N ria na seu”. — Jon 6:38; 8:23.
Deus kumpu Jesus antis di kumpu kualker utru kusa. Nota ke ku Biblia fala aserka di Jesus:
“Kristu i . . . purmeru Fiju ku sta riba di tudu kriason.” — Kolosensis 1:15.
El i “kil ku tudu kriason di Deus sai nel”. — Apokalipsi 3:14.
Jesus kumpri profesia aserka di kil ku “si kumsada sedu disna di tempus mas antigu ku pasa”. — Mikeias 5:2; Mateus 2:4-6.
Ke ku Jesus ta fasiba antis di bin pa Tera?
I teneba un garandi pusison na seu. Jesus papia des pusison, oca ki fala na orason: “Pape, glorifikan . . . ku ki gloria ku N teneba ku bo antis di mundu sedu”. — Jon 17:5.
I juda si Pape na kumpu tudu utru kusas. Jesus tarbaja juntu ku Deus “pa judal”. (Ditus 8:30) Nota ke ku Biblia fala aserka di Jesus: “I pabia del ku tudu kusas kumpudu na seu ku na tera”. — Kolosensis 1:16.
Deus tarbaja ku Jesus pa kumpu tudu utru kriaturas ku ten. Es kriason ta nklui tudu utrus kriaturas spiritual ku universu. (Apokalipsi 5:11) Na un sertu sintidu, es koperason entri Deus ku Jesus i suma di un arkitetu ku un pedreru. Arkitetu ta fasi planta; pedreru ta kumpu suma ki sta na planta.
I seduba Palabra. Oca ku Biblia na fala di vida di Jesus antis di bin na Tera, i comal di “palabra”. (Jon 1:1) Sin duvida, es signifika kuma Deus usa si Fiju pa da informason ku instrusons pa utrus kriaturas spiritual.
I pudi sedu ki Jesus aẑi tambi suma Porta-vos di Deus pa umanus na Tera. I pudi sedu ki, Deus usa Jesus suma Palabra oca ki na da instrusons pa Adon ku Eva na jardin di Eden. (Kumsada 2:16, 17) I pudi sedu ki Jesus i ki anju ku giaba antigu povu di Israel na disertu, kil ku israelitas dibi di obdisiba. — Saida 23:20-23. *
^ par. 12 Palabra i ka uniku anju ku Deus usa pa transmiti si mensaẑen. Pur izemplu, i usa utru anjus alen di si Purmeru fiju pa transmiti si Lei pa antigu Israel. — Atus 7:53; Gálatas 3:19; Ebreus 2:2, 3.