Kasamenti ta kria un nobu familia. I bardadi kuma, bu na kontinua ama i rispita bu pape ku bu mame, ma gosi, bu parseru i algin mas importanti pa bo na mundu. Talves i pudi sedu difisil pa alguns di bu parentis seta es. Ma konsiju di Biblia pudi judau sedu ikilibradu, asin bu na pudi da ben ku bu parentis, nkuantu bu na tarbaja risu pa firmanta relason di amizadi ku bu nobu familia.

ES KI BIBLIA FALA: “Rispita bu pape ku bu mame”. (Efésius 6:⁠2) Mesmu ki bu sedu garandi, bu pirsisa sempri di rispita bu pape ku bu mame. Lembra di kuma bu parseru tambi, suma fiju, i pirsisa di da atenson pa si pape ku si mame. “Amor i ka nveẑosu;” pa kila ka bu sinti nunka ameasadu pa relason ku bu parseru tene ku si pape i ku si mame. — 1 Koríntius 13:4; Gálatas 5:⁠26.

KE KU BU PUDI FASI:

• Ivita palabras suma esis: “Bu familia sempri ta toma pa bo” o “bu mame nunka ka ciga di gosta di mi.”

• Tenta pui bu kabesa na lugar di bu parseru.

ES KI BIBLIA FALA: “Omi ten ku disa si pape ku si mame, i junta ku si minjer; elis dus e ta sedu un kurpu son.” (Kumsada 2:24) Ora ku bu kasa, talves bu pape ku bu mame pudi pensa kuma e tene inda diritu di kuida di bo, i talves e pudi misti nvolvi na bu kasamenti tok e ta pasa limiti.

Abos ki dibi di disidi te kal puntu ki bo na seta kila, i dipus bo fasi elis sibi bo disison na bon manera. Bo pudi sedu klaru i diretu sin sedu duru. (Ditus 15:⁠1) Umildadi, pasensa ku un spiritu kalmu na judau tene un bon relason di amizadi ku bu parentis, i kontinua “nguenta n̈utru ku amor.” — Efésius 4:⁠2.

KE KU BU PUDI FASI:

• Si bu sta preokupadu pa manera ku bo parentis sta na nvolvi na bo vida, papia di kila ku bu parseru ora ku situason sta kalmu.

• Bo buska sempri ciga na ntindimentu di kuma ku bo na lida ku es situason.