Erein sounpar 30 samwalahro, aramas tohto medewe me mie nanpwungmwahu nanpwungen soangsoangen wehi kan oh e mwamwahula. Ahpw dahme wiawi ahnsou pwukat kasalehda me met kakete sohte mehlel.

•   “Aramas akan kin pwunodki me mahwen en Gaza pahn lella wehi teikan nan wasao ni Israel oh Hezbollah ara tepida pei ni irepen Lebanon.”—Reuters, January 6, 2024.

•   “Pwihn kan me mi pahn kaweid en Iran tepida pei ni soangsoangen wasa kan, Iran uhd pwurehng wiahda tehtehn mahwen en nuclear. Oh pil Russia oh China iangala Iran. Mepwukat koaros kihong wehi kan en Palikapi (the West) kahpwal kapw ehu.”—The New York Times, January 7, 2024.

•   “Pepei sang Russia pousehlahte kauwehla wasa koaros nan Ukraine.”—UN News, January 11, 2024.

•   “En China eh kin kekehlailla ni palien pesines oh palien mahwen, lalaudlahn Taiwan eh pohnmwahsohki eh wehi, oh soansuwed nanpwungen China oh U.S. Mepwukat kin kahrehda uhpene kak mwadangete wiawi.”—The Japan Times, January 9, 2024.

 Dahme Paipel mahsaniheki duwen pingiping en sampah pwon me kitail kilikilang rahnwet? Mahwen en sampah pwon pahn wiawi?

 Paipel sohte kin kohpada soangen mahwen dah me kitail kilikilang eh wiawi. Ahpw e kohpada mahwen kan me kin wiawi wasa koaros oh kin kihsang “popohl nin sampah.”—Kaudiahl 6:4.

 Pwuhken Daniel kohpada me ni imwilahn ahnsou, wehi kehlail kan me kin uhpene kin nantihong ale manaman en kaunda. Ar nannanti wet kin pidada ar kasalehda nair tehtehn mahwen kan oh doadoahngkihla kiden “dipwisou kesempwal kan,” de mwohni laud.—Daniel 11:40, 42, 43.

 Paipel kin kasalehda me irair en sampah pahn susuwedla mwohn eh pahn mwahula. Sises ketin kohpada me “pahn mie kahn kamakam kowahlap me saikinte wiawi sangete tepin sampah.” (Madiu 24:21) “Kahn kamakam kowahlap” wet pahn kahrehda mahwen ehu me adaneki Armakedon, me wehwehki “mahwen me pahn wiawi ni rahn lapalap en Koht, me Keieu Manaman.”—Kaudiahl 16:14, 16.

 Ahpw, Armakedon pahn doarehla aramas akan, kaidehn kauwehla. Sang ni mahwen wet, Koht pahn ketin kaimwisekala kaundahn aramas, me kin kahrehda mahwen tohto. Pwe ken diar ia duwen Armakedon eh pahn imwikihla popohl kohkohlahte, menlau wadek oaralap pwukat:

•   “What Is the Battle of Armageddon?”

•   “Armakedon Wia Rohng Mwahu Ehu!”