Medewehla me met wiawi: Ni ahnsou me Julia kin irongen, ihte me e kin kilang iei mworourou. E kin pein nda, “I anahne tihtihla” mendahki eh pahpa nohno oh kompoakepah kan kin ndaiong me e “tihn kulu.”

Ni ahnsou keren kan, Julia kin medemedewe en tihtihla ni eh wia soahng keper ehu pwehn luhs “paun limaute.” Ihte me e pahn wia iei duhpekla erein rahn kei . . .

Ma ke ahneki soangen pepehm ko me Julia ahneki, dahme ke pahn wia?

E sohte sapwung ken pwunodki mwomwomw. Ni mehlel, Paipel pil kin koasoia mwomw mwahu en ekei lih oh ohl akan, duwehte Sara, Resel, Apikail, Sosep, oh Depit. Paipel mahsanih duwen emen lih me adaneki Apisak me “inenen kaselel.”—1 Nanmwarki 1:4.

Ahpw, me pwulopwul tohto kin nohn pwunodki mwomwarail. Met kak kahrehda kahpwal laud. Tehk:

• Ehu roporop kasalehda me persent 58 en serepein kan kin kose me irail mworourou, ahpw ni mehlel persente 17 me uhdahn mworourou.

• Pil ehu roporop kasalehda me persent 45 en lih akan me sohte lel arail paun kin medewe me re nohn toutou!

• Ni ar kin rapahki elen ar pahn tihtihla, ekei me pwulopwul kan kin ahnekihda soangen soumwahu ehu me adaneki anorexia, soangen soumwahu ehu me keper ong arail mour pwehki e kin kauwehla arail kin mwenge oh re kin duhpekla.

 Ma ke diarada kilelepen soangen soumwahu wet de ehu soangen soumwahu me kin kahrehiong ken sohte mwenge mwahu, ale sawas. Tepikihda ni ahmw pahn padahkihong ahmw pahpa nohno de emen me laud me ke kin likih. Paipel mahsanih: “Kompoakepah kan kin kasalehda ar limpoak ahnsou koaros. Ia katepen eh mie kompoakepahmw ma e sohte seweseiuk ni ahnsou apwal?”—Lepin Padahk 17:17.

Mehlel, soangen aramas dahmen kowe loale me kin kahrehiong meteikan en perenkin uhk de soh. Tehk duwen Apsalom nein Nanmwarki Depit pwutak. Paipel mahsanih:

“Eri, sohte aramas emen mie nan wehin Israel me ndandki eh masamwahu oh paliwaramwahu duwehte Apsalom; sang ni moange lel ni sendin neh.”—2 Samuel 14:25.

Ahpw, mwahnakapw menet me diren aklapalap, noahrok, oh kin pangala meteikan! Ihme kahrehda, koasoi kan nan Paipel duwen Apsalom sohte kaselel; e kin kasalehda ih nin duwen ohl emen me sansaliki eh kin soaloalopwoat oh kailok en men kemehla aramas.

Ong kahrepe mwahu me Paipel kihongki kitail kaweid wet:

“Kumwail pwuhriongehr nan likoun mour kapw en aramas kapw.”—Kolose 3:10.

“Dehr kin doadoahngki kapwat en paliwar pwe en kalinganahla pein kumwail, . . . Ahpw amwail lingan en mihmi loalamwail ni mour mwakelekel en nan kapehdomwail.”—1 Piter 3:3, 4.

Mendahki e sohte sapwung en men masamwahu oh paliwaramwahu, me kesempwal douluhl sang mwomwomw iei soangen aramas dahmen kowe. Kedekedeo irair kaselel kan me pahn kahrehda ken kaselel rehn aramas kan sang ahmw pwukel de paliwaramwahu! Serepein men me adaneki Phylicia koasoia, “Ma ke masamwahu aramas pahn mwadang tehk uhk, ahpw soangen aramas dahmen kowe oh irair mwahu me ke ahneki iei me aramas pahn kin keieu taman duwen kowe.”

Ke kin kalapw sapwungki mwomwen mesomw oh paliweromw?

Mie pak me ke medewe en ale pwal pwehn kalinganahla mesomw de paliweromw de wia soangen katihtihla ehu me daulihala?

Ma ke pahn kak wekidala duwen mwomwomw, dahme ke pahn wekidala? (Pilada koaros me ke men wia.)

• REIREI

• TOUTOU

• PITENMOANGOMW

• PALIWEROMW

• MESOMW

• POH KILIN MESOMW

Ma ahmw pasapeng ei ong peidek riau pwuko oh ke pilada meh siluh de tohtohsang nan kesiluhn peidek, tehk met: E kakete me mwein meteikan sohte kin kilang dahme ke kin kilang me ke sapwungki rehmw. E mengei en sipelehla dahme konehng oh kin nohn daulihala pwunodki mesomw oh paliweromw.—1 Samuel 16:7.