Paipel kawehwehda me Sohp “aramas mwahu men.” (Sohp 1:1) Lohd “ohl lelepek emen.” (2 Piter 2:8) Oh Depit kin “kapwaiada dahme [Koht] kin koasoanehdi.” (1 Nanmwarki 14:8) Ahpw, kitail tehk mwahu duwen mour en irail pwukat me kileldi nan Paipel. Kitail pahn kilang me (1) re kin wiahda sapwung, (2) kitail kak sukuhlki laud duwen arail mehn kahlemeng kan, oh (3) aramas soh unsek kan kak uhdahn kaperenda Koht.

Sohp lokolongki soangen kahpwal kei me lelohng ih me mwomwen sohte pahrek. E ahnekihda madamadau sapwung me dene Koht sohte ketin nsenohki ma e kolokolte eh pwoson ih de soh. (Sohp 9:20-22) Sohp uhdahn kamehlele pein eh wiewia kin pwung kahrehda ong meteikan e mwomwen me e ndinda me e uhdahn pwung sang Koht.—Sohp 32:1, 2; 35:1, 2.

Lohd pweiek en wiahda pilipil mengei ehu. E uhdahn pwunodki tiahk samin en aramas ako nan Sodom oh Komora, oh pil arail wiewia ko kin “kansensuwedihada  nan kapehde.” (2 Piter 2:8) Koht mahsanih me e kupwurki kasohrehla kahnimw suwed ko oh e ketikihong Lohd oh eh peneineio ahnsou mwahu en tangasang wasao. Ele ke medewe me Lohd me pahn tepin kohkohsang wasao. Ahpw, nan ahnsou apwalo, e wie pwapwand oh mihmihte. Tohnleng ko me Koht ketin poaronehdo en kapitala Lohd oh eh peneineio anahne koledi pehrail ko oh kahreirailieisang nan kahnimwo pwe irail en pitila.​—Senesis 19:15, 16.

Mie pak ehu me Depit sohte kak kaunda pein eh ineng ko oh e wiahda dipen kamwahl rehn ahn emen ohl eh pwoud. E kapwuriamwei me ni Depit eh song en ekihla met, e kemehla ahn liho pwoudo. (2 Samuel, irelaud 11) Paipel mahsanih me “KAUN-O kupwursuwedkihla sapwung wet me Depit wiahda.”​—2 Samuel 11:27.

Sohp, Lohd oh Depit koaros wiahda sapwung kan, ekei sapwung me re wiahda uhdahn laud. Ahpw kitail pahn kilang me irail kin inangih papah Koht ni peik sang ni mohngiongirail unsek. Irail men kasalehda me re koluhla oh wiahda wekidekla kan me anahn ong mwomwen arail wiewia. Ihme kahrehda, Koht kupwurkin irail oh Paipel kahdanekin irail ohl lelepek kei.

Nin duwen aramas soh unsek kei, kitail sohte kak soikala wiahda sapwung. (Rom 3:23) Ma kitail wiahda sapwung, kitail anahne kasalehda me kitail koluhkihla dahme kitail wiahdao oh eri wia dahme kitail kak pwehn kapwungala irairo.

Ia duwen Sohp, Lohd oh Depit arail kapwungala arail sapwung ko? Sohp kasalehda lelepek sang eh mohngiong. Mwurin Koht ketin mahsen ong ih, Sohp kapwungala eh madamadau sapwungo oh  koluhkihla dahme e ndao. (Sohp 42:6) Dahme Lohd medewehki tiahk samin en aramas ako nan Sodom oh Komora kin pahrekiong sapwellimen Koht koasoandi kan. Sapwungo me e wiahda iei e sohte kasalehda irair en karuwaru. E kedekedeo tangasang kahnimw suwed ko oh pitsang sapwellimen Koht kadeik. Ni peik e sohte kilangla mwuri pwehn kilang soahng kan me e pwilikihdi. Mendahki Depit wiahda dihp laud ni eh kauwehla sapwellimen Koht kosonnedo, e kasalehda dahme uhdahn mi nan eh mohngiong sang ni eh koluhla mehlel oh peki sapwellimen Siohwa mahk.​—Melkahka 51.

Koht eh ketin kupwurohla ohl pwuko kin pahrekiong sapwellime madamadau toupahrek ong aramas soh unsek kan. Koht ketin “mwahngih dahme kitail wiawihkihda; e pil ketin tamataman me kitail uhdahn pwehl.” (Melkahka 103:14) Eri, ma Koht ketin mwahngih me kitail sohte kak soikala wiahda sapwung kan, dahme e ketin kasik kitail en wia?

Kaweid me Depit kihong nah pwutako Solomon kasalehiong kitail ia duwen atail kak kaperenda Koht. E nda: “A kowe Solomon, nei pwutak, I peki ke en pohnese Koht en semomw oh papah ni mohngiong unsek.” (1 Kronikel 28:9) Ia wehwehn en ahneki mohngiong unsek? Ahneki mohngiong unsek iei en kin poakohng Koht oh men ese oh wia dahme e ketin kupwurki. Met sohte wehwehki me kitail ahneki mohngiong unsek ehu, ahpw e wia mohngiong ehu me kin men papah Koht ni lelepek oh kin men Koht en ketin kapwungala ih. Pwehki arail poakohng Koht oh men peikiong ih, Koht ketin kilangwohng Sohp nin duwen ohl “mwahu men,” Lohd nin duwen “ohl lelepek emen,” oh Depit nin duwen emen me kin “kapwaiada dahme [Koht] kin koasoanehdi.” Mendahki re wiahda sapwung kan, re kak kaperenda Koht.

Eri ma kitail ahnekihda madamadau suwed me kitail sohte men en pwarada nan atail madamadau de nda mehkot me kitail namenengki de wia soahng kan me mwuhr kitail tehkada me sapwung, kitail en ale kangoang sang mehn kahlemeng pwukat me kitail ahpwtehn koasoiapene. Koht ketin mwahngih me ahnsou wet kitail sohte unsek. Ahpw e ketin kasik kitail en poakohng ih oh nantihong peikiong ih. Ma kitail ahneki mohngiong unsek ong met, kitail kak koapworopworki me kitail pil kak kaperenda Koht.