MIE sister silimen me kin kousoan pohn kisin dekeo Sangir Besar nan Indonesia. Sounpar kei samwalahro, irail kin doadoahkpene ni oaroahr ehu. Aramas akan nan sahpwo kin ese irail pwehki irail kin wia doadoahk en kalohk oh sewese aramas akan en wehwehkihla Paipel. Ahpw ni ahnsowo, irail wiewia ehu doadoahk tohrohr.

Keieu, irail kin kohdihla wasa me pedeped nan sehdo oh rikida takai oh wahdahla ni oaroahro. Ekei takai ko kin uwehte mpwei en soccer. Mwuri, sister ko kin mwohd pohn kisin sehr kei oh doadoahngki ama oh sukpeseng takai ko pwehn tikitikla uwehte kutohr en malek. Mwurin mwo, irail kin rikpene takai tikitik ko oh kihong nan pekid pilastik kan oh wa kohdahla ni kehndakeo me kohlahng wasa me irail kin mi ie. Irail eri wudekiong takai ko nan ehd laud kan pwehn wisikla ni sidohsa kan me pahn wahla ni wasahn wiahda ahl kan.

Emen sister ko iei Hulda. Eh irairo kahrehiong ih en doadoahngki ahnsou laud sang meteiko pwehn wia doadoahko. E kin kalapw doadoahngki mwohni me e alehdi sang doadoahk wet pwehn apwaliheki eh peneineio. Ahpw ahnsou wet, e men doadoahngki ekis mwohnio ong mehkot tohrohr. E men naineki ehu tablet pwe en kak download JW Library^® app. Hulda ese me kisin kasdo kan oh soahng teikan nan JW Library kak kamwahwihala eh doadoahk en kalohk oh pil wehwehkihla Paipel.

Hulda kin doadoahngki awa riau nimenseng koaros erein sounpwong ehu elep pwehn sukpeseng takai kan ni uwen me kak itar en audehda mwurin sidohsa pick-up ehu. Kedekedeo, nah mwohnio itarohng pwainda tablet ehu.

Hulda koasoia, “Mendahki I uhdahn pwangada oh nan kili ka medengkihda ei kin suk takai ko, I kin mwadang manokehla medek pwukat koaros pwehki I kakehr doadoahngki nei tablet kapwo pwehn sewese ie kamwahwihala ei kalohk oh kaunopada ong mihting kan.” E pil koasoia me tableto sewese ih en iang towehda mihting kan oh kalohk erein soumwahu lusuluso eh wiawi. Kitail perenki me Hulda lel eh mehn akadeio.