Nicolas oh Céline lelohng kahpwal me weksang met. Ohpis en Sounkadehdehn Siohwa kan nan France peki ira en keseula nan mwomwohdiso kapw ehu. Ira koasoia: “Nin tapio se uhdahn peren, ahpw mwuri se tepida loaleidki kompoakepaht ko. Se saikinte ahnla riat Kristian ko nan mwomwohdiso kapwo.” a Nan soangen kahpwal ko, ia duwen omw kak pweida ni omw keseula nan ehu mwomwohdiso kapw? Dahme meteikan kak wia pwehn sawas? Oh ni ahl dah kan me kumwa kak kangoange meteikan oh ale kangoang sang mwomwohdiso kapwo?

KAWEID PAHIEU ME KAK SEWESEIUK EN AHNLA WEKIDEKLA KAN

1. Likih Siohwa. (Mel. 37:5) Kazumi nan Sapan, kohkohsang mwomwohdiso me e kin iang erein sounpar 20 ni ahnsou me eh pwoudo anahne keseula ehu wasa pwehn wia eh doadoahko. Ia duwen eh ‘mweidohng Siohwa pein ih’? E koasoia: “I pwurupwurehng padahkihong Siohwa ei pwunod, loaleid, oh masepwehk. Ehuehu ahnsou I kin wia met, e kin ketikihong ie kehl me I anahne.”

Ia duwen omw kak uhdahn likih Siohwa? Duwehte tuhke pwoat eh anahne pihl oh soahng kan nan pwehl pwehn kekeirda, atail pwoson pil kin anahne soahng kan pwehn kekeirda. Nicolas, me kitail koasoiapene mwoweo, doudouloale mehn kahlemeng en Eipraam, Sises, oh Pohl, me wiahda tounmetei tohto pwehn wia kupwuren Koht, oh met kalaudehla eh kamehlele me Siohwa pahn ketin sewese ih. Ma ke kin kaukaule onopki Paipel, met pahn seweseiuk dadaur pahn wekidekla kan  nan omw mour, oh ke pahn sukuhlki soahng kan me ke kak doadoahngki pwehn kangoange meteikan nan omw mwomwohdiso kapwo.

2. Dehr kapahrekihong omw mwomwohdiso en mahso omw mwomwohdiso kapwo. (Ekl. 7:10) Jules anahne ahnla tiahk ehu me uhdahn weksang ah ni ahnsou me e keseusang Benin kohla Wehin Amerika. E koasoia: “I kin pehm me I anahne padahkihong emenemen aramas me I tuhwong soahng koaros duwen ngehi.” Pwehki wasao weksang dahme e ahn, e tepida katohre pein ih sang rie Kristian kan. Ahpw, mwurin eh ekisekis esehla mwahu rie Kristian ko, e wekidala eh madamadau. E koasoia: “Met I esehda me sohte lipilipil wasa kitail kin mi ie nin sampah, aramas koaros duwepenehte. Ihte arail lokaia oh wiewia me wekpeseng. Kitail anahne pwungki mwomwarail.” Eri dehr kapahrekiong omw mwomwohdisohn mahso ong omw mwomwohdiso kapwo. Emen sister me kin pioneer, Anne-Lise, koasoia: “I keseu pwehki I men esehla soahng kapw kan, ahpw kaidehn pwehki I kasik me soahng koaros pahn duwehte wasa me I keseusang ieo.”

Elder kan en dehr pil kapahrekiong arail mwomwohdisohn mahso ong me kapwo. Mwein nan mwomwohdiso kapwo brother kan kin wia soahng kan me weksang dahme ke ese, ahpw met sohte wehwehki me dahme irail wiewiao sapwung. E wia elen loalokong en esehla irair en wasao mwohn omw kihda iren sawas kan. (Ekl. 3:​1, 7b) E mwahu brother kan en sukuhlki omw mehn kahlemeng mwahu a kaidehn en song en idingkihong irail en pwungki omw madamadau.—2 Kor. 1:24.

3. Soupisek nan omw mwomwohdiso kapwo. (Pil. 1:27) Mendahki e kin doadoahk laud oh anahne ahnsou laud en keseu, ihme kahrehda e kesempwal en mwadang pein kohla iang towehda mihting kan nan mwomwohdiso kapwo. Riomw Kristian kan nan mwomwohdiso kapwo anahne kalapw kilang uhk pwehn karanihiukla oh kak seweseiuk. Lucinda, me ih oh nah serepein riemen keseula nan kahnimw laud ehu nan South Africa, koasoia: “Kompoakepahi kan nan mwomwohdiso kangoange ien medemedewehte en karanihala irail kan nan mwomwohdiso kapwo, iang irail kalohk, oh iang pasapeng nan mihting kan. Se pil padahkihong brother ko me irail kak doadoahngki imwato pwehn wia tuhpenehn kalohk.”

En iang riomw Kristian kan “doadoahkpene” nan mwomwohdiso pahn sewese kakehlaka pein kowe oh meteikan. Anne-Lise, me kitail koasoiapene mwoweo, ale kangoang sang elder kan en song iang koaros nan eh mwomwohdisou kalohk. Ia imwilahn met? E koasoia: “I mwadang esehda me met ih ahl mwahu en mwadang esehla mwomwohdiso kapw ehu.” Patehng met, ni omw kin iang wia soahng kan me duwehte kamwakel de apwalih Wasahn Kaudok, met pahn kasalehda me ke wiahkilahr omw mwomwohdiso. Uwen laud en omw kin iang wia soahng kan nan mwomwohdiso, riomw Kristian kan pahn mwadang ahnuhkla oh ke pahn pehm me irail kisehn omw peneinei.

 4. Wiahda kompoakepahmw kapw kan. (2 Kor. 6:​11-13) Ma aramas akan ese me ke kin nsenohkin irail, e pahn mengeiong irail en wiahla kompoakepahmw. Eri koasoanehdi en kohla ni Wasahn Kaudok mwohn mihtingo tepida, oh mihmihte ekis werei mwurin mihtingo pwe en mie ahnsou laud en koasoiong aramas oh ese irailla. Song esehla adarail kan. Ni omw kin tamataman eden aramas akan oh ke kin kadek, irail pahn men eseiukala oh ele ke pahn wiahla kompoakparail.

Dehr pwunodki ma irail pahn pwungkin uhk, ahpw mweidohng riomw Kristian ko en uhdahn eseiukala. Wia dahme Lucinda koasoia: “Met mie kompoakepaht keren kan pwehki se kin tiengla mwowe oh luke iraildo ni imwato.”

“KASAMWO EMENEMEN”

Ele ke kin saloh en pedolong nan Wasahn Kaudok ehu me aramas ko ke sehse. Ia duwen omw kak kamengeila ong irail kan me keseudo nan omw mwomwohdiso? Wahnpoaron Pohl koasoia: “Kasamwo emenemen, nin duwen Krais eh pil kin ketin kasamwo kumwail.” (Rom 15:7) Sang ni arail alasang Krais, elder kan kak sewese me kapw kan en pehm me mwomwohdiso kasamwo irail. (Menlau kilang koakono “ Dahme Pahn Sewese Omw Keseuo en Pweida Mwahu.”) Ahpw, koaros nan mwomwohdiso, iangahki seri kan kak sewese me kapw kan en pehm me irail wia kisehn mwomwohdiso.

Kasamwo meteikan kin pidada en lukehiong aramas akan nan imwomwo oh pil kihda sawas me anahn. Karasepe, emen sister wahda sister men me ahpwtehn keseula nan eh wasao oh kasalehiong kahnimwo oh pil ia duwen eh pahn doadoahngki bus oh kihsa. Met sair sister me ahpwtehn keseulao oh sewese en soanamwahu nan eh wasa kapwo.

AHNSOU MWAHU EN KEKEIRDA

Ni loukust men eh kin lalaudla, kilio kin kohkohsang pak tohto mwohn eh kak pihr. Duwehte met, ni omw keseula nan mwomwohdiso kapw ehu, ke anahne kihsang soangen kapwunod kan me kin  kauhiukdihsang omw pahn pihr ni karasaras ni omw papah Siohwa. Nicolas oh Céline koasoia: “En keseula ehu wasa tohrohr wia kaiahn mwahu. Pwehn ahnla aramas akan oh wasa kapwo, se anahne kakairada irair kaselel kan.” Jean-Charles, me kitail koasoiapene mwoweo, koasoia ia duwen eh peneineio paiekihda. “Nan at mwomwohdiso kapwo, nait seri ko koahiekla oh karanihala Siohwa. Mwurin sounpwong keite, nait serepeino tepida wia padahk nan mihting en wihk kan oh nait pwutako wiahla sounkalohk me saikinte papidais.”

Karasepe, dahme ke kak wia ma pwehki omw irairo ke sohte kak keseula wasa kan me anahn laud mie. Ke kak wiahki omw mwomwohdisou wasa kapw ehu sang ni omw doadoahngki ekei iren sawas kan nan artikel wet. Ni omw kin likih Siohwa, soupisengki omw mwomwohdisou sang ni omw wiahda koasoandi en iang meteikan kalohk oh wiahda kompoakepahmw kapw kan de kamwahwihala omw kompoakepahnki irail kan me ke esehier. Mwein ke kak tiengla mwowe oh kihda sawas ong irail kan me kapw de me anahne. Pwehki irair en limpoak me kin kasalehda Kristian mehlel kan, en sewese meteikan kak kakerenihiukala rehn Siohwa. (Sohn 13:35) Ke kak kamehlele me “Koht kin ketin kupwurperenki soangen meirong pwukat.”—Ipru 13:16.

Mendahki kahpwal tohto, Kristian tohto pweidahr ni arail keseula nan ehu mwomwohdiso kapw—oh ke pil kak wia met! Anne-Lise koasoia: “En keseula nan mwomwohdiso kapw ehu sewese ien ahnla meteikan.” Kazumi kamehlele met me sang ni omw keseula ehu wasa, “Ke kak kilang sapwellimen Siohwa sawas ni ahl kan me ke saikinte kilang mwoweo.” Oh ia duwen Jules? E koasoia: “Kompoakepahi kan me I wiahda wasao sewese ien ahnla wasao. Met I uhdahn karanihala mwomwohdisou me kahrehda e pahn apwal ong ie en keseu sang mwo.”