Ke Kin Ese Duwen Met?
Ia duwen wiawihdahn prik kan me dierekda nan mohn Papilon en mahso eh kasalehda me Paipel kin pwung?
SOUNKASAWIH dipwisou en mahs kan diarada nan mohn Papilon en mahso lepin takai kan me wiawihdahsang pwehl tohtohie me mehn mahs ako doadoahngki pwehn kauwada kahnimwo. Nin duwen me emen sounkasawih dipwisou en mahs kan Robert Koldewey kasalehda, mehn mahs ko kin umwunda prik pwukat nan wasahn kisiniei mwehl me mi “likin kahnimwo, wasa me mie pwehl mwahu oh tuhke tohto pwehn saunki kisiniei.”
Sounkasawih dipwisou en mahs kan diarada mehn kadehde kan me me lapalap kan nan koperment en Papilon kin pil doadoahngki wasahn kisiniei mwehl pwukat ong tiahk mwersuwed kan. Paul-Alain Beaulieu, professor men nan University en Toronto, me samanih poadopoad en Asiria mahso koasoia: “Nting kan en Papilon kasalehda me nanmwarkio kin ruwese me irail kan me sapeikiong ih de mwamwahliki soahng sarawi kan pahn lekdekiong nan kisiniei mwehl oh isihsla.” Karasepe, ehu lepin nting ko ni mwehin Nanmwarki Nepukadnesar koasoia: “Kemeirailla, isikirailla, . . . nan wasahn kisiniei mwehlo . . . wiahiong edinieio, oh kisinieio en uhdahn kehlail.”
Met katamankihong irail me kin wadek Paipel kan duwen dahme wiawi nan Daniel irelaud 3. Kitail wadek me Nanmwarki Nepukadnesar wiahda sansal kohl ehu me uhdahn lapala nan patapat en Dura—likin kahnimw en Papilon. Ni ahnsou me mwahnakapw en Ipru ko me adaneki Sadrak, Mihsak, oh Apedneko sohte poaridi mwohn sansalo, Nepukadnesar uhdahn lingeringerda oh ruwese me ren saunda kisinieio pwe en “mwehl pak isuh sang mahs,” oh “keseiraillahng nan kisiniei mwehlo.” Tohnleng manaman emen me kapitirailsang mehla.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Prik ehu me eden Nepukadnesar kileldi ie
Prik kan me dierekda nan Papilon pil kasalehda me Paipel kin pwung. Nanpwungen prik pwukat, mie me tohto me nting kan kin kilel powe me kin kapinga arail nanmwarkio. Ehu nting ko koasoia: “Nepukadnesar, Nanmwarki en Papilon . . . Tehnpas ehu I kauwada ong Nanmwarkio . . . Kadaudokei kan en kin kakaun wasaht kohkohlahte.” Nting pwukat kereniong pahrekiong dahme kileldi nan pwuhken Daniel 4:30, me Nanmwarki Nepukadnesar suweiki: “Ia uwen lingan laud en Papilon! Pein ngehi me kauwada pwe en wia poahsoan kaunen ei wehi oh kasalehda uwen ei kehl oh manaman, uwen ei lingan, oh lapalap en ei wehi.”
