Nan pahr 2012, sounkasawih kepwehn mahs kan diarada diper en sah ehu me sounpar 3,000. Sounroporop kan inenen perenkihda met. Dahme kahrehda? Kaidehn pwehki re diarada diper en saho ahpw pwehki dahme nting powe.

Ni sounkasawih kepwehn mahs kan ar kihpene diper ko koaros, re kak wadekada mesen nting en lokaiahn Kenan powe. Mesen nting ko nda: “Eshba’al Ben Beda,” me wehwehki “Espaal, nein Beda nah pwutak.” Ih tepin ahn sounkasawih kepwehn mahs kan diarada ahd wet nting pohn kepwehn mahs ehu.

Mie pil emen me adaneki Espaal nan Paipel. E wia emen nein Nanmwarki Sohl pwutak ko. (1 Kron. 8:33; 9:​39) Professor Yosef Garfinkel, me iang diarada saho, nda: “E mwahu en tehk me ihte ni mwehin kaundahn Nanmwarki Depit me ahd wet Espaal kileldi nan Paipel, oh met e pil kileldi nan nein sounkasawih kepwehn mahs kan pwuhk.” Met pil ehu karasepen sounkasawih kepwehn mahs kan ar kin utung Paipel!

Nan Paipel, nein Sohl pwutako Espaal pil adaneki Isposed. (2 Sam. 2:⁠8) Dahme kahrehda ahdo “paal” wiliandi “posed”? Sounroporop kan kawehwehda me sounnting en Samuel Keriau ele sohte doadoahngki ahdo Espaal pwehki e katamankihong mehn Israel ko duwen Paal, koht en melimel me mehn Kenan kan kin kaudokiong. Ahpw, nan Paipel pwuhken Kronikel Keieu, kitail pil kak kilang ahdo Espaal.