Ei peneinei kin kousoan Tellancourt, kisin kousapw ehu palimesen paliepeng en France. Ei pahpao mehn France, oh ei nohno mehn Italy. Ni ahnsou me I sounpar waluh, se keseula nan kisin kahnimw semwehmwe ehu nan Rom, Italy. Wasao, at mour uhdahn apwalla. Ei pahpa nohno kin kalapw akamai pwehki kahpwal en mwohni.

Ni ahnsou me I sounpar 15, ei nohno kin kangoange ie en kin pedoi sang nan ihmwo oh rapahkihda kompoakepahi kan. Eri I kin tepida kohkohlahsang imwato ahnsou werei oh reirei. I mwadangete tepida patehng aramas suwed kan. Ehu rahno, ohl emen tuhwong ie, me mwomwen kadek. E kihong ie wini en kasahliel, ngehi eri ale pwe I men mwomwen aramas laud. I mwadangete iangala soangen mour me kin doadoahngki wini en kasahliel oh tiahk samin. Pak tohto, mie me kin angkehlailih ie en wia tiahk samin me pid wia nsenen pwopwoud. I tepida sohla nsenohki ei mour; I sohte katapanki ma I mour de mehla. I uhdahn loaleid. Ni ei sounpar 16, I nimala pwoatol en sakau en wai ehu pwon oh lusdihla nan pillap ehu pwe I en song kemeiehla. Imwikihla I lipwongmasala oh sohla kehn wasa erein rahn siluh.

I tepida perenki mour, ahpw I pil kin tepida wia soangen aramas me lemei oh mwersuwed. I kin pitiheki aramas en wia nsenen pwopwoud rehi, kawaieng irail wini en kasahliel ni imwarail oh pirapahsang arail dipwisou kesempwal kan. Pwihn en mwersuwed laud kan kin doadoahngkin ie en netikihseli wini en kasahliel kan nan Italy. I kin kalapw lelohng kahpwal rehn pilismen kan. Ei mour mwomwen sohla katepe oh suwedla douluhl. Ahpw, I kin kamehlele me uhdahn pahn mie kahrepen ei momour. I kapakapohng Koht, pekipeki en ketikihong ie sounparte ehu en popohl oh nsenamwahu.

Ni ahnsou me I sounpar 24, I koasoanehdi en kosoula England. Pwehki ei kin iang irail kan me kin netiki wini en kasahliel, ei mour mihla nan keper. Mwohn ei kohkohla, I mwemweitla rehn ei nohno oh I pwuriamweikihla ei kilang ohl emen me ede Annunziato Lugarà koasoakoasoiaiong ei nohno duwen Paipel. * Pwehki ei ese eh mour mwersuwed en mahso, I masepwehkada oh idek reh dahme kahrehda e kohkihdo mwo. E padahkihong ie duwen wekidekla laud me e wiahda nan eh mour pwehn  wiahla emen Sounkadehdehn Siohwa kan, oh e kahrehiong ie en inoukihong ih me I pahn koasoiong Sounkadehde kan ni ei lella England. I pwungkihda met. Ahpw, ni ei lel wasao I mwadangete pwuralahng ei mour en mahso.

Ehu rahno I tuhwong emen Sounkadehde me kihkihseli makasihn en Watchtower oh Awake! pohn oapwoat ahl nan London. I tamanda ei inowo ong Annunziato, ngehi eri peki rehn Sounkadehdeo ma e kak onop Paipel rehi.

I uhdahn pwuriamweikihla soahng kan me I sukuhlkihsang nan Paipel. Karasepe, I mwekidki ireo me kileldi nan 1 Sohn 1:9, me mahsanih duwen Koht: “Ma kitail wehkadahng Koht dipatail kan, e pahn ketin kapwaiada sapwellime inou oh eh pahn ketin wiewia me pwung: eri, e pahn mahkikihong kitail atail sapwung kan koaros.” Iren Paipel wet uhdahn kamwakid ie laud pwehki I kin medewe me ei mour uhdahn samin pwehki dahme I kin wiewiao. I mwadangete tepida iang towehda mihting ni Wasahn Kaudok en Sounkadehdehn Siohwa kan. Sounkadehde ko kasamwo ie ni kadek. Ni ei kilang arail kin wia kompoakepah kei me inenen kerenpene, soahng me I kin inengieng sangete mahso, I men iang wia kisehn arail mwomwohdiso me duwehte peneinei ehu.

Mendahki I sohte nohn apwalki kesehla wini en kasahliel kan oh uhdihsang tiahk suwed, I diarada me e apwal ong ie en kamwahwihala irair kan loalei. I tehkada me I anahne en kin wauneki oh kadekohng aramas. Ni mehlel, miehte irair suwed kei loalei me I anahnehte pepeiong. Ahpw pwehki sapwellimen Siohwa sawas, I kak pweida mwahu. Erein sounpwong weneu me I tepida onop en Paipel, I papidaisla nin duwen emen Sounkadehdehn Siohwa men. Met wiawi nan pahr 1997.

Mwurin ei papidaisla, I pwoudikihda peinakapw men me adaneki Barbara me pil ahpwtehn wiahla emen Sounkadehdehn Siohwa. Ni ahnsou me emen kompoakepahi en mahso tehkada uwen laud en ei wekila, e pil tepida onop Paipel. Kedekedeo, e wiahla emen Sounkadehde, oh pil iangahki rie serepein laudo. Rien ei nohno kahlap lih me daulih sounpar 80 tepida onop oh papidaisla mwohn eh mehla.

Met I kin papah nin duwen elder men nan ehu mwomwohdiso, oh ngehi ei pwoud kin doadoahngki pali laud en at ahnsou ong papah Siohwa, sewese padahngki Paipel ong irail kan me kin lokaiahki lokaiahn Italy nan London. Ekei pak I kin mworuskihla ei mour en mahso, ahpw Barbara uhdahn wia sawasepei laud. Ah met, I ahnekier mour en peneinei me I kin men ahneki, oh miehier Semei limpoak men me I kin men ahneki. I peki rehn Koht sounparte ehu en popohl oh nsenamwahu, ahpw e ketikihong ie laudsang dahme I peki!