یہوواہ دے گواہ بائبل کورس کیویں کراندے نیں؟
یہوواہ دے گواہ جیہڑا بائبل کورس کراندے نیں اوہدے ذریعے تُسی بائبل دی تلیم نُوں اسانی نال سمجھ سکدے او۔ ایس بائبل کورس دے ذریعے ...
تواڈی زندگی چ خوشیاں آ سکدیاں نیں۔
تُسی خدا دے دوست بن سکدے او۔
تُسی مستقبل لئی خدا دے وعدیاں بارے جان سکدے او۔
ایس صفحے تے:
بائبل کورس کیویں کرایا جاندا اے؟
یہوواہ دا اِک گواہ تواڈے نال بائبل دے فرق فرق موضوعاں تے گل بات کرے گا۔ ایس بائبل کورس لئی اوہ کتاب ”خوشیاں بھری زندگی پاؤ—ہُن تے ہمیشاں تک“ نُوں استمال کرے گا۔ ایہدے ذریعے تُسی ہولی ہولی بائبل دی تلیم سکھ جاؤ گے۔ نالے ایہہ وی سکھو گے کہ ایس تلیم توں تُسی فائدہ کیویں حاصل کر سکدے او۔ کورس بارے ہور جانن لئی ایس ویڈیو نُوں ویکھو۔
کیہہ ایہہ کورس کرن لئی مینوں پیسے دینے پین گے؟
نئیں۔ اَسی بائبل دی تلیم دین لئی کوئی پیسے نئیں لیندے۔ اَسی یسوع دے ایس حکم تے عمل کرنے آں: تُسی مُفت پایا اے ایس لئی مُفت دَوو۔ (متی 10:8) ایس بائبل کورس لئی یاں ایہدے چ استمال ہون والی کتاب ”خوشیاں بھری زندگی پاؤ—ہُن تے ہمیشاں تک“ لئی توانوں کوئی پیسے نئیں دینے پین گے۔
ایہہ کورس کِنّی دیر چلے گا؟
ایس بائبل کورس چ 60 سبق نیں۔ ایہہ تواڈے تے وے کہ تُسی ایہہ کورس کِنّی دیر چ کردے او۔ کجھ لوک اِک ہفتے چ اِک سبق نُوں مکمل کرنا پسند کردے نیں تے کجھ ہفتے چ اِک توں زیادہ سبق وی مکمل کر لیندے نیں۔
میں ایہہ کورس کیویں شروع کر سکنا واں؟
1. آنلائن فارم پُر کرو۔ تُسی فارم تے جیہڑی معلومات دَوو گے اوہنوں اَسی صرف تواڈے نال رابطہ کرن لئی استمال کراں گے۔
2. یہوواہ دا اِک گواہ تواڈے نال رابطہ کرے گا۔ اوہ توانوں ایس بائبل کورس بارے ضروری معلومات دَوے گا تے جے تواڈے کوئی سوال نیں تے اوہناں دے جواب وی دَوے گا۔
3. تُسی اپنے کورس کران والے نال وقت تے جگہ طے کرو گے۔ بائبل کورس تواڈے گھر آ کے وی کرایا جا سکدا اے یاں فیر فون، ویڈیو کال، خط یاں ایمیل دے ذریعے وی کرایا جا سکدا اے۔ بائبل کورس چ عام طور تے اِک گھنٹہ لگ جاندا اے پر تواڈی سہولت دے مطابق ایہہ اِک گھنٹے توں گھٹ یاں ودھ وی ہو سکدا اے۔
کیہہ میں پہلاں بس اِک دو واری کر کے ویکھ سکنا واں؟
جی۔ ایہدے لئی توانوں آنلائن فارم پُر کرنا پئے گا۔ فیر جدوں یہوواہ دا اِک گواہ تواڈے نال رابطہ کرے گا تے تُسی اوہنوں دَس سکدے او کہ تُسی پہلاں اِک دو وار کورس کر کے ایہہ ویکھنا چاہندے او کہ توانوں ایہہ پسند آندا اے کہ نئیں۔ اوہ تواڈے نال تِن سبقاں والی کتاب ”خوشیاں بھری زندگی پاؤ—ہُن تے ہمیشاں تک“ چوں کورس شروع کرے گا۔ ایس طرحاں تُسی فیصلہ کر سکو گے کہ تُسی ایہہ کورس جاری رکھنا چاہندے او یاں نئیں۔
جے میں بائبل کورس کرنا واں تے کیہہ مینوں یہوواہ دا گواہ بننا ای پئے گا؟
نئیں۔ یہوواہ دے گواہ خوشی نال لوکاں نُوں بائبل چوں تلیم دیندے نیں پر اوہ کسے نُوں وی اپنے مذہب چ شامل ہون لئی مجبور نئیں کردے۔ اَسی جاننے آں کہ بائبل دے مطابق ہر بندے نُوں ایہہ فیصلہ کرن دا حق اے کہ اوہ کیہہ منے گا تے کیہہ نئیں منے گا۔—1-پطرس 3:15۔
کیہہ میں کورس دے دوران اپنی بائبل استمال کر سکنا واں؟
جی۔ تُسی جیہڑا وی بائبل ترجمہ استمال کرنا چاہوو تُسی کر سکدے او۔ اَسی ایس گل نُوں سمجھنے آں کہ کجھ لوک بائبل دا اوہی ترجمہ استمال کرنا پسند کردے نیں جیہڑا اوہ شروع توں استمال کردے آئے نیں۔ اَسی”کتابِمُقدس—ترجمہ نئی دُنیا“ استمال کرنے آں کیونکہ ایہہ صحی تے اسان اے۔
کیہہ ایس کورس چ دُوجے وی میرے نال شامل ہو سکدے نیں؟
جی۔ تُسی اپنے گھر والیاں یاں دوستاں نُوں وی شامل کر سکدے او۔
جے میں پہلاں وی یہوواہ دے گواہواں نال کورس کر دا رہیا واں تے کیہہ میں فیر توں بائبل کورس کر سکنا واں؟
جی۔ تُسی فیر توں بائبل کورس کر سکدے او۔ ہُن جیہڑی کتاب چوں کورس کرایا جائے گا اوہنوں لوکاں دِیاں اَج کل دِیاں لوڑاں مطابق تیار کیتا گیا اے۔ ایہدے چ بوہت ساریاں تصویراں تے ویڈیوز نیں تے ایہنوں اِنج تیار کیتا گیا اے کہ لوک گل بات چ زیادہ توں زیادہ شامل ہو سکن۔توانوں ایس کتاب دے ذریعے بائبل کورس کر کے بڑا مزہ آئے گا۔
کیہہ میں کسے اُستاد دے بغیر آپ ای کورس کر سکنا واں؟
جی۔ پر اصل چ بائبل کورس کرن والیاں نُوں زیادہ فائدہ اوہدوں ہوندا اے جدوں اوہ کسے اُستاد دی مدد نال ایہہ کورس کردے نیں۔ پر کجھ لوک کلیاں ای ایہہ کورس کرنا چاہندے نیں۔ ایہدے لئی ساڈی ویبسائٹ تے موجود حصہ ”پاک کلام نُوں سمجھن لئی سہولتاں“ نُوں استمال کیتا جا سکدا اے۔ ایہدے چ شامل کجھ سہولتاں ایہہ نیں:
بائبل کورس لئی ویڈیوز۔ ایہہ ویڈیوز بائبل دی بنیادی تلیم نُوں سمجھن چ تواڈی مدد کرن گیاں۔
پاک کلام چوں سوال جواب۔ ایس حصے چ بائبل تے بائبل دی تلیم نال تعلق رکھن والے بوہت سارے سوالاں دے جواب دِتے گئے نیں۔
ایتاں دی وضاحت۔ بائبل دِیاں مشہور ایتاں دی وضاحت جانو۔