انڈونیشیا چ اِک چھوٹا جیہا جزیرہ اے جدا ناں سینگر بیسر اے۔ کجھ سال پہلاں اوتھے ساڈیاں تِن بھیناں کٹھیاں کم کر رہیاں سن۔ اوہ بھیناں اوتھے مُنادی کرن لئی مشہور نیں۔ اوہ لوکاں دی بائبل نُوں سمجھن چ مدد کردیاں نیں۔ پر اوس ویلے اوہ کوئی ہور کم کر رہیاں سن۔‏

سب توں پہلاں اوہ سمندر دے پانی چ ٹُردے ہوئیاں وڈے وڈے پتھر لبھدیاں سن تے فیر اوہناں نُوں کڈھ کے باہر لیاندیاں سن۔ کجھ پتھر تے فٹ‌بال جِنّے وڈے ہوندے سن۔ فیر اوہ لکڑی دی پیڑھی تے بہہ کے ہتھوڑے نال اوہناں پتھراں نُوں توڑ کے اوہناں دے چھوٹے چھوٹے ٹکڑے کردیاں سن، ایتھوں تک کے اوہ ٹکڑے مُرغی دے آنڈے توں وی چھوٹے ہو جاندے سن۔ ایس توں بعد اوہ پتھر دے اوہناں ٹکڑیاں نُوں پلاسٹک دی بالٹی چ پاندیاں سن تے سیڑھیاں چڑھ کے اپنے گھر لے کے جاندیاں سن۔ فیر اوہ پتھر دے اوہناں ٹکڑیاں نُوں اِک وڈی بوری چ پاندیاں سن تاکہ اوہناں نُوں ٹرک تے لدیا جا سکے۔ فیر ایہہ پتھر سڑکاں بنان لئی استمال ہوندے سن۔‏

اوہناں وچوں اِک بھین دا ناں حلدا سی۔ اوہدے کول دُوجیاں بھیناں نالوں زیادہ وقت ہوندا سی۔ ایس لئی اوہ زیادہ کم کردی سی۔ ایس کم دے بدلے اوہنوں جیہڑے پیسے مِلدے سن، عام طور تے اوہ اوہناں نال اپنے گھر والیاں دِیاں لوڑاں نُوں پورا کر دی سی۔ پر ایس واری اوہدے ذہن چ کجھ ہور وی چل رہیا سی۔ اصل چ اوہ اِک ٹیبلٹ خریدنا چاہندی سی تاکہ اوہ اوہدے تے ‏”‏جے‌ڈبلیو لائبریری“‏ نُوں استمال کر سکے۔ حلدا نُوں پتہ سی کہ ‏”‏جے‌ڈبلیو لائبریری“‏ تے جیہڑیاں ویڈیوز تے دُوجیاں چیزاں نیں، اوہناں دے ذریعے اوہنوں مُنادی کرن تے بائبل دِیاں گلاں نُوں سمجھن چ ہور مدد ملے گی۔‏

حلدا ہر روز دو گھنٹے ایہہ کم کردی سی۔ اوہ ڈیڑھ مہینے تک ایہہ کم کردی رہی۔ اِنج اوہنے اینے پتھر کٹھے کر لئے کہ اوہناں نال اِک چھوٹا ٹرک بھر گیا۔ اخیر اوہدے کول اینے پیسے جمع ہو گئے کہ اوہنے اِک ٹیبلٹ خرید لیا۔‏

حلدا نے کہیا:‏ ”‏بھانویں کہ مَیں بوہت زیادہ تھک جانی ساں تے میرے ہتھاں تے چھالے پے گئے سن۔ پر جیویں ای میرا نواں ٹیبلٹ میرے ہتھاں چ آیا، مَیں ساریاں درداں پیڑاں بُھل گئی۔ ایس ٹیبلٹ دی وجہ توں میرے لئی مُنادی کرنا تے عبادتاں دی تیاری کرنا اسان ہو گیا اے۔“‏ اوہنے ایہہ وی دَسیا کہ کورونا دی وبا دے دوران اوہدا ٹیبلٹ اوہدے بڑے کم آیا کیونکہ اوس ویلے عبادتاں تے مُنادی ویڈیو کال تے ای ہو رہی سی۔ اَسی ایس گل توں بڑے خوش آں کہ حلدا اپنے مقصد چ کامیاب ہو گئی۔‏