یومارہ تے اوہدے بھرا مارسیلو تے ہائیور، ملک گواٹیمالا دے اِک چھوٹے جہے پِنڈ چ رہندے نیں۔ یومارہ نے یہوواہ دے گواہواں نال بائبل کورس کر‌نا شروع کر دِتا تے فیر کجھ وقت بعد اوہدے بھراواں نے وی بائبل کورس شروع کر دِتا۔ پر اِک مسئلہ سی اوہ تِنے بھین بھرا اَنھے سن تے اوہناں نُوں بریل یعنی اُبھرے ہوئے لفظاں والی زبان پڑھنی نئیں آندی سی۔ ایس لئی بائبل کورس کر‌ان والا بھرا اوہناں نُوں پیراگراف تے ایتاں پڑھ کے سُناندا سی۔‏

ایہناں تناِں لئی عبادتاں تے جانا وی مشکل سی۔ اوہ آپ 40 منٹاں دا سفر کر کے نیڑے والی عبادت‌گاہ چ نئیں جا سکدے سن۔ پر کلیسیا دے بھین بھراواں نے عبادتاں تے جان چ اوہناں دی مدد کیتی تے جدوں اوہناں تناِں بھین بھراواں نُوں مسیحی زندگی تے خدمت والی عبادت چ حصے ملنے شروع ہوئے تے بھین بھراواں نے حصیاں نُوں یاد کر‌ن چ اوہناں دی مدد کیتی۔‏

مئی 2019 توں اوہناں دے پِنڈ چ وی عبادت ہونا شروع ہو گئی۔ اوس ویلے تک اِک پہل‌کار میاں بیوی اوہناں دے پِنڈ چ شفٹ ہو چُکے سن۔ ایس جوڑے نے سوچیا سی کہ اوہ ایہناں تناِں نُوں بریل پڑھنی تے لکھنی سکھان گے۔ پر اوہناں نُوں آپ بریل پڑھنی تے لکھنی نئیں آندی سی۔ ایس لئی اوہ اِک لائبریری گئے تے اوتھوں کجھ کتاباں لیائے تاکہ اوہ پہلے آپ بریل زبان سکھن تے فیر اوہناں نُوں وی سکھا سکن۔‏

کجھ ای مہینیاں چ اوہناں تناِں بھین بھراواں نُوں بریل زبان پڑھنی تے لکھنی آ گئی۔‏ a ایس وجہ توں اوہ یہوواہ دے ہور نیڑے ہو گئے۔ہُن بھین یومارہ تے اوہدے دونویں بھرا پہل کار نیں۔ بھرا مارسیلو ہُن کلیسیا چ اِک خادم اے۔ ایہہ تِنے بھین بھرا بڑے جوش نال یہوواہ دی خدمت کر رہے نیں۔ اوہناں دے جوش نُوں ویکھ کے دُوجے بھین بھراواں نُوں وی جوش نال خدمت کر‌ن دی ہلاشیری مِلدی اے۔‏

بھین یومارہ نے کہیا:‏”‏بھین بھراواں نے اوسے دن توں ساڈے لئی محبت ظاہر کر‌نا شروع کر دِتی جیس دن اَسی پہلی واری اوہناں نُوں ملے ساں۔“‏ بھرا مارسیلو نے کہیا:‏”‏کلیسیا چ ساڈے بڑے چنگے دوست نیں تے اَسی اِک ایہو جہے خاندان دا حصہ واں جدے جی دُنیا دے فرق فرق حصیاں چ رہندے نیں پر فیر وی اوہ اِک مُٹھ نیں۔“‏ بھین یومارہ تے اوہدے بھرا اوس دن دا اِنتظار کر رہے نیں جدوں اوہ اپنیاں اَکھاں نال ویکھن گے کہ یہوواہ ایس پوری زمین نُوں فردوس کیویں بناندا اے۔—‏زبور 37:‏10، 11؛‏ یسعیاہ 35:‏5‏۔‏