گلتیوں دے ناں خط 6:1-18
6 بھراوو، جے کسے بندے نُوں احساس نئیں ہوندا کہ اوہنے غلط قدم چُکیا اے تے تُسی جیہڑے پاک روح دی رہنمائی چ چلدے او،* نرمی نال اوہنوں سِدھی راہ تے لیان دی کوشش کرو۔ پر اپنے آپ تے وی نظر رکھو کہ کِتے تُسی کسے اَزمیش چ نہ پے جاؤ۔
2 مشکلاں دا بھار چُکن چ اِک دُوجے دی مدد کرو کیونکہ اِنج تُسی مسیح دی شریعت تے عمل کر رہے ہووو گے
3 کیونکہ جے کوئی بندہ اپنے آپ نُوں وڈا سمجھدا اے جد کہ اوہ کجھ وی نئیں تے اوہ اپنے آپ نُوں دھوکھا دے رہیا اے۔
4 ہر بندہ اپنے کماں نُوں پَرکھے۔ اِنج اوہنوں اپنے کماں دی وجہ توں خوشی ملے گی نہ کہ دُوجیاں نال اپنا مقابلہ کرن دی وجہ توں
5 کیونکہ ہر اِک نُوں اپنی ذمے داری دا بھار آپ چُکنا پووے گا۔
6 ایہدے علاوہ جیہڑے بندے نُوں خدا دے کلام دی تلیم دِتی جا رہی اے، اوہ اپنیاں ساریاں نعمتاں چ اوس بندے نُوں وی حصےدار بنائے جیہڑا اوہنوں تلیم دے رہیا اے۔
7 ایس غلط فہمی چ نہ رہوو کہ خدا نُوں دھوکھا دِتا جا سکدا اے* کیونکہ انسان جو کجھ بوندا اے، اوہی وڈھدا اے۔
8 جیہڑا انسان جسم دِیاں غلط خواہشاں دے مطابق بوندا اے، اوہ جسم توں تباہی دی فصل وڈھے گا۔ پر جیہڑا انسان پاک روح دے مطابق بوندا اے، اوہ پاک روح دے ذریعے ہمیشاں دی زندگی دی فصل وڈھے گا۔
9 ایس لئی آؤ اَسی چنگے کم کرنے نہ چھڈیئے کیونکہ جے اَسی ہمت نئیں ہاراں گے تے اَسی ویلا آن تے چنگی فصل ضرور وڈھاں گے۔
10 ایس لئی جدوں تک ساڈے کول موقع اے، آؤ اَسی ساریاں نال بھلائی کردے رہیے۔ پر خاص طور تے اپنے ہمایماناں نال۔
11 ویکھو، مَیں توانوں ایہہ خط اپنے ہتھیں وڈے وڈے حرفاں چ لکھ رہیا واں۔*
12 بوہت سارے لوک جیہڑے دُوجیاں دِیاں نظراں چ چنگا بننا چاہندے نیں، اوہی توانوں ختنہ کران تے مجبور کردے نیں۔ پر اوہ اِنج ایس لئی کردے نیں تاکہ اوہناں نُوں مسیح دی سُولی* دی خاطر ظلم نہ سہنا پووے۔
13 جیہڑے ختنہ کراندے وی نیں، اوہ آپ موسیٰ دی شریعت تے عمل نئیں کردے۔ پر اوہ چاہندے نیں کہ تُسی وی ختنہ کراؤ تاکہ تواڈی وجہ توں اوہناں نُوں شیخی مارن دا موقع ملے۔
14 پر مَیں ساڈے مالک یسوع مسیح دی سُولی* دے علاوہ کسے ہور چیز بارے شیخی نئیں مارنا چاہندا۔ ایس سُولی دی وجہ توں دُنیا دی نظر چ مَیں موت دی سزا دے لائق آں۔ پر میری نظر چ دُنیا موت دی سزا دے لائق اے۔
15 ختنہ کرانا یاں نہ کرانا اہم نئیں سگوں نوِیں مخلوق* بننا اہم اے۔
16 میری دُعا اے کہ ایس اصول تے صحی طرحاں چلن والے سارے لوکاں اُتے یعنی خدا دے اِسرائیل اُتے سلامتی تے رحمت ہووے۔
17 ہُن توں مینوں کوئی پریشان نہ کرے کیونکہ میرے جسم تے داغے گئے نشان ظاہر کردے نیں کہ مَیں یسوع دا غلام آں۔
18 بھراوو، میری دُعا اے کہ تواڈے نیک جذبے دی وجہ توں ساڈے مالک یسوع مسیح دی عظیم رحمت تواڈے تے ہووے۔ آمین۔
فٹ نوٹ
^ یاں، ”تُسی جیہڑے پختہ مسیحی او۔“
^ یونانی چ: ”خدا دا مخول نئیں اُڈایا جا سکدا۔“
^ یاں شاید، ”کِنّاں وڈا خط لکھ رہیا واں۔“
^ ”لفظاں دی وضاحت“ نُوں ویکھو۔
^ ”لفظاں دی وضاحت“ نُوں ویکھو۔
^ پاک روح نال مسح ہون والا ہر مسیحی اِک نوِیں مخلوق بن جاندا اے۔
