زمین تے امن تے سلامتی انساناں دِیاں کوششاں نال نئیں سگوں خدا دی بادشاہی دے ذریعے قائم ہووے گی۔ ایہہ بادشاہی اِک اسمانی حکومت اے جدا بادشاہ یسوع مسیح اے۔ غور کرو کہ پاک کلام چوں سانوں کیہڑی شان‌دار امید ملدی اے۔‏

1.   خدا ساری زمین توں جنگ موقوف یعنی ختم کر دے گا۔ (‏زبور 46‏:‏9‏)‏ ایس طرحاں اوہ اپنے وعدے دے مطابق زمین تے اوہناں آدمیاں نُوں جنہاں توں اوہ خوش اے صلح تے سلامتی دَوے گا۔—‏لُوقا 2‏:‏14‏۔‏

2.   خدا دی بادشاہی اسمان توں پوری زمین تے حکمرانی کرے گی۔ (‏دانی‌ایل 7‏:‏14‏)‏ کیونکہ ایہہ پوری دُنیا تے حکمرانی کرے گی ایس لئی ایہہ قوم‌پرستی نُوں ختم کر دَوے گی جیہڑی بوہت سارے لڑائی جھگڑیاں دی جڑ اے۔‏

3.   یسوع مسیح نُوں سلامتی دا شہزادہ کہیا گیا اے جیہڑا کہ خدا دی بادشاہی دا بادشاہ اے تے اوہدی بادشاہی چ سلامتی دی کوئی حد نئیں ہوئے گی۔—‏یسعیاہ 9‏:‏6‏، 7‏۔‏

4.   جیہڑے لوک لڑائی جھگڑیاں توں نئیں مُڑدے، اوہ خدا دی بادشاہی چ نئیں رہ سکن گے کیونکہ ظلم دوست توں خدا دی روح نُوں نفرت اے۔—‏زبور 11‏:‏5‏؛‏ امثال 2‏:‏22‏۔‏

5.   خدا اپنے بندیاں نُوں سکھاندا اے کہ اوہ امن نال کیویں رہ سکدے نیں۔ پاک کلام چ دَسیا گیا اے کہ ایہدے نتیجے چ اوہ اپنیاں تلواراں نُوں توڑ کے پھالاں تے اپنے بھالیاں نُوں داتریاں بنا لین گے تے قوم قوم تے تلوار نہ چلائے گی تے اوہ فیر کدی جنگ کرنا نئیں سکھن گے۔—‏یسعیاہ 2‏:‏3‏، 4‏۔‏

 پوری دُنیا چ لکھاں یہوواہ دے گواہ پہلاں توں ای یہوواہ خدا کولوں ایہہ سکھ رہے نیں کہ اوہ امن تے صلح نال کیویں رہ سکدے نیں۔ (‏متی 5‏:‏9‏)‏ ایہہ سچ اے کہ ساڈا تعلق فرق فرق نسلاں نال اے تے اَسی 230 توں وی زیادہ مُلکاں چ رہنے آں پر اَسی دُوجیاں دے خلاف ہتھیار نئیں چک دے۔‏