بائبل چ دانیایل نبی بارے کیہہ دَسیا گیا اے؟
پاک کلام دا جواب
دانیایل اِک بڑا مشہور یہودی نبی سی۔ اوہ ستویں تے چھیویں صدی قبلازمسیح چ رہندا سی۔ خدا نے اوہنوں بوہت سارے خواب وکھائے، مستقبل چ ہون والیاں گلاں بارے رویاواں وکھائیاں تے اوہنوں اِک کتاب لکھن دا اِلہام وی بخشیا جدا ناں وی دانیایل ای اے۔—دانیایل 1:17؛ 2:19۔
دانیایل کون سی؟
دانیایل یہوداہ دے علاقے چ جمیا پلیا سی۔ ایسے علاقے چ شہر یروشلیم تے ہیکل وی سی۔ 617 قبلازمسیح چ بابل دے بادشاہ نبوکدنضر نے یروشلیم تے قبضہ کر لیا تے ایس شہر دے رئیساں نُوں غلام بنا کے بابل لے گیا۔ (2-سلاطین 24:15؛ دانیایل 1:1) اوہ دانیایل نُوں وی لے گیا جیہڑا اوس ویلے منڈُا جیہا ای سی۔
دانیایل تے کجھ ہور نوجواناں نُوں (یعنی سدرک، میسک تے عبدنجو نُوں) شاہی محل کھڑیا گیا تاکہ اوہ اوتھے رہ کے تربیت حاصل کرن تے فیر حکومت دی خدمت کر سکن۔ بھانویں کہ دانیایل تے اوہدے تِن دوستاں اُتے بوہت دباؤ پایا گیا پھر اوہ فیر یہوواہ خدا دے وفادار رہے۔(دانیایل 1:3-8) اوہناں نے تِن سال تک بابل چ تربیت حاصل کیتی جدے بعد بادشاہ نبوکدنضر نے اوہناں دی عقلمندی دی تعریف کیتی تے کہیا کہ اوہ بابل دے سارے فالگیراں تے نجومیاں نالوں دس گُنا بہتر نیں۔ ایس لئی اوہنے دانیایل تے اوہدے تِن دوستاں نُوں اپنے دربار چ خدمت کرن لئی مقرر کر دِتا۔—دانیایل 1:18-20۔
ایہدے کئی سال بعد جدوں دانیایل دی عمر شاید 90 سال توں وی زیادہ ہو گئی سی تے اِک دن اوس ویلے دن بادشاہ بیلشضر نے اوہنوں محل چ بلایا گیا۔ بادشاہ نے اوہنوں کہیا کہ اوہ دیوار اُتے لکھی اِک عجیب جہی لکھائی پڑھ کے دَسے۔ دانیایل نے خدا دی مدد نال اوہنوں پڑھیا تے دَسیا کہ مادی فارس دی حکومت بوہت چھیتی بابل نُوں تباہ کرن والی اے۔ تے اِنج ای ہویا۔ اوسے ای رات بابل تے مادی فارس دا قبضہ ہو گیا۔—دانیایل 5:1، 13-31۔
مادی فارس دی حکومت چ وی دانیایل نُوں اِک سرکاری عہدہ مل گیا تے دارا بادشاہ نے کہیا کہ دانیایل نُوں ایہدے توں وی اُچا عہدہ ملنا چاہی دا اے۔ (دانیایل 6:1-3) پر کجھ افسر ایس گل توں سڑھ گئے تے اوہناں نے دانیایل خلاف اِک سازش گھڑی جدے نتیجے چ دانیایل نُوں شیراں دی ماند وچ سُٹ دِتا گیا پر یہوواہ نے اوہنوں بچا لیا۔ (دانیایل 6:4-23) دانیایل دی زندگی دے آخری دِناں چ اِک فرشتے نے دو واری اوہنوں دَسیا کہ اوہ یہوواہ نُوں بڑا عزیز اے۔—دانیایل 10:11، 19۔
ایہناں ساریاں گلاں بارے ہور جانن لئی دو حصیاں والا ایہہ ڈرامہ ویکھو: ”دانیایل—زندگیبھر ایمان تے قائم رہن والا اِک نبی۔“
ایہہ وی ویکھو
اہم تلیم
اَسی کیوں یقین کر سکنے آں کہ بائبل خدا دا کلام اے؟
جے بائبل واقعی خدا ولوں اے تے ایہنوں دُنیا دی ہر کتاب توں وکھرا ہونا چاہیدا اے۔
بائبل دی تلیم
ایہہ کورس کر کے ویکھو۔
اِک ایہو جیہا دلچسپ بائبل کورس کرو جدے چ تُسی تے تواڈا اُستاد مِل کے گل بات کرو گے۔