یوحنا رسول نے اپنی اِنجیل چ یسوع مسیح دی زندگی دے جیہڑے واقعے لکھے، اوہناں بارے اوہنے لکھیا:‏ جیہڑے بندے نے ایہہ ویکھیا، اوہنے ایہدے بارے گواہی دِتی تاکہ تُسی وی ایمان لیاؤ۔ اوس بندے دی گواہی سچی اے تے اوہ جان دا اے کہ اوہدی گل سچی اے۔—‏یوحنا 19:‏35‏۔‏

 اَسی متی، مرقس، لُوقا تے یوحنا دِیاں اِنجیلاں چ لکھیاں گلاں تے بھروسا کر سکنے آں کیونکہ ایہہ اوس ویلے لکھیاں گئیاں سن جدوں ایہو جہے بوہت سارے لوک زندہ سن جنہاں نے ایہہ گلاں اپنی اَکھیں ویکھیاں سن۔ کجھ ثبوتاں دے مطابق متی دی اِنجیل یسوع مسیح دی موت دے ست سال بعد یعنی 41 عیسوی دے لگ بھگ لکھی گئی سی۔ پر کئی عالماں دا کہنا اے کہ ایہہ اِنجیل 41 عیسوی دے بعد لکھی گئی سی۔ پر زیادہ‌تر لوک ایس گل نال اِتفاق کردے نیں کہ مسیحی یونانی صحیفیاں دِیاں ساریاں کتاباں پہلی صدی دے دوران لکھیاں گئیاں سن۔‏

 بوہت سارے لوکاں نے اپنی اَکھیں ویکھیا سی کہ یسوع فوت ہویا تے بعد چ زندہ وی ہویا۔ ایہہ لوک گواہی دے سکدے سن کہ اِنجیلاں چ لکھیاں گلاں سچیاں نیں تے جے ایہناں وچوں کجھ گلاں غلط ہوندیاں تے اوہ اوہناں تے اِعتراض کر سکدے سن۔ پروفیسر فریڈرک بروس نے لکھیا:‏ ”‏یسوع دے رسولاں دے اثردار طریقے نال گواہی دین دی اِک وجہ ایہہ سی کہ اوہ لوکاں نُوں اوہناں گلاں دی تلیم دیندے سن جیہڑیاں اوہ اپنی اَکھیں ویکھ چُکے سن۔ ایسے لئی رسولاں نے صرف ایہہ نئیں کہیا کہ اَسی ایہناں گلاں دے گواہ آں سگوں اوہناں نے ایہہ وی آکھیا کہ تُسی وی ایہناں گلاں توں واقف او (‏اعمال 2:‏22‏)‏۔“‏