پاک کلام چ ایہو جہے واقعیاں، حالاتاں تے لوکاں دی سوچ تے کماں بارے دَسیا گیا اے جیہڑے دُنیا دے آخری زمانے یاں آخری وقت دی نشانی ہون گے۔—‏متی 24:‏3؛‏ 2-‏تیمُتھیُس 3:‏1؛‏ دانی‌ایل 8:‏19‏۔‏

 بائبل چ دَسیا گیا اے کہ آخری زمانے چ کیہہ کجھ ہوئے گا۔ نالے ایہہ وی دَسیا گیا اے کہ ایہہ سب کجھ اِکو ای وقت چ ہوئے گا جدے توں پتہ چلے گا کہ اَسی آخری زمانے چ رہ رہے آں۔ (‏لُوقا 21:‏7‏)‏ آؤ آخری زمانے بارے کجھ گلاں تے غور کرئیے:‏

 پوری دُنیا چ جنگاں۔‏ یسوع نے دَسیا سی کہ قوماں اِک دُوجے تے چڑھائی کرن گیاں تے حکومتاں اِک دُوجے دے خلاف اُٹھ کھلون گیاں۔ (‏متی 24:‏7‏)‏ ایسے طرحاں مکاشفہ 6:‏4 چ وی اِک گھوڑے دا ذکر ہویا اے جیہڑا جنگ وَل اشارہ کردا اے جدی وجہ توں زمین توں امن تے صلح ختم ہو جائے گی۔‏

 کال۔‏ یسوع نے دَسیا سی کہ تھاں تھاں کال پین گے۔ (‏متی 24:‏7‏)‏ مکاشفہ دی کتاب چ وی اِک گھوڑے بارے دَسیا گیا اے جیہڑا کال وَل اشارہ کردا اے۔ ایس پیشین‌گوئی دے مطابق آخری زمانے چ دُنیا چ بوہت وڈے وڈے کال پین گے۔—‏مکاشفہ 6:‏5، 6‏۔‏

 وڈے وڈے زلزلے۔‏ یسوع نے کہیا سی کہ تھاں تھاں زلزلے آن گے۔ (‏متی 24:‏7؛‏ لُوقا 21:‏11‏)‏ ایہناں زلزلیاں دی وجہ توں پوری دُنیا چ بوہت زیادہ جانی تے مالی نقصان ہوئے گا۔‏

 بیماریاں۔‏ یسوع نے پیشین‌گوئی کیتی سی کہ آخری زمانے چ وباواں تے بیماریاں پھیلن گیاں۔—‏لُوقا 21:‏11‏۔‏

 جُرم۔‏ ایہہ سچ اے کہ انسان شروع توں ای جُرم کردے آ رہے نیں پر یسوع نے دَسیا سی کہ آخری زمانے چ جُرم تے بُرائی بوہت زیادہ ودھ جان گے۔—‏متی 24:‏12‏۔‏

 اِنساناں دے ہتھوں زمین دی تباہی۔‏ مکاشفہ 11:‏18 توں پتہ چلدا اے کہ اِنسان زمین نُوں تباہ کر دین گے۔ اوہ نہ صرف اپنے بھیڑے کماں تے ظلم نال اِنج کرن گے سگوں زمین دے ماحول تے فضا نُوں وی گندا کر دین گے۔‏

 اِنساناں دے بھیڑے رویے۔‏ 2-‏تیمُتھیُس 3:‏1-‏4 چ پیشین‌گوئی کیتی گئی سی کہ آخری زمانے چ لوک ناشکرے، بے‌وفا،‏‏.‏.‏.‏ ضدی، بدنامی کرن والے، اپنے آپ تے قابو نہ رکھن والے، وحشی، نیکی دے دُشمن، دھوکھےباز، ڈھیٹھ تے گھمنڈی ہون گے۔ لوکاں دے ایہہ بھیڑے رویے ایہنے ودھ جان گے کہ دُنیا چ رہنا مشکل ہو جائے گا۔‏

 خانداناں چ نااِتفاقی۔‏ 2-‏تیمُتھیُس 3:‏2، 3 چ دَسیا گیا اے کہ لوک خاندانی محبت توں خالی ہون گے تے بچے ماں باپ دے نافرمان ہون گے۔‏

 خدا لئی لوکاں دی محبت ٹھنڈی پے جائے گی۔‏ یسوع نے دَسیا سی کہ بتھیرے لوکاں دی محبت ٹھنڈی پے جائے گی۔ (‏متی 24:‏12‏)‏ اوہدے کہن دا مطلب سی کہ خدا لئی لوکاں دی محبت ٹھنڈی پے جائے گی۔ ایہو جہے لوکاں بارے 2-‏تیمُتھیُس 3:‏4 چ وی دَسیا گیا اے کہ اوہ خدا نُوں پیار کرن دی بجائے موج مستی نُوں پیار کرن گے۔‏

 مذہبی ہون دا دِکھاوا۔‏ 2-‏تیمُتھیُس 3:‏5 چ دَسیا گیا اے کہ لوک خدا دی عبادت کرن دا دعویٰ تے کرن گے پر اوہناں دے طور طریقے خدا دے حکماں مطابق نئیں ہون گے۔

 بائبل دِیاں پیشین‌گوئیاں بارے سمجھ ودھے گی۔‏ دانی‌ایل دی کتاب چ دَسیا گیا اے کہ آخری زمانے چ بوہت سارے لوک بائبل دِیاں سچائیاں تے پیشین‌گوئیاں نُوں ہور چنگی طرحاں سمجھن لگ پین گے۔—‏دانی‌ایل 12:‏4‏۔‏

 پوری دُنیا چ بادشاہی دی مُنادی ہوئے گی۔‏ یسوع نے پیشین‌گوئی کیتی سی کہ بادشاہی دی خوش خبری دی مُنادی ساری دُنیا چ کیتی جائے گی۔—‏متی 24:‏14‏۔‏

 لوکاں دی لاپروائی۔‏ یسوع نے دَسیا سی کہ بوہت سارے لوک ایس گل تے کوئی دھیان نئیں دین گے کہ ایہہ دُنیا ختم ہون والی اے۔ (‏متی 24:‏37-‏39‏)‏ 2-‏پطرس 3:‏3، 4 دے مطابق کجھ لوک تے ایس گل دا مخول اُڈان گے کہ ایہہ دُنیا ختم ہون والی اے۔‏

 ساریاں پیشین‌گوئیاں دا اِکو وقت چ پورا ہونا۔‏ یسوع مسیح نے دَسیا سی کہ آخری زمانے چ کوئی اِک یاں صرف کجھ پیشین‌گوئیاں نئیں سگوں ساریاں پیشین‌گوئیاں اِکو ای وقت چ پوریاں ہون گیاں۔—‏متی 24:‏33‏۔‏

 جی، دُنیا دے حالات تے پاک کلام دِیاں پیشین‌گوئیاں توں پتہ چلدا اے کہ آخری زمانہ 1914 توں شروع ہویا سی۔ ایہہ اوہی سال اے جدے چ پہلی عالمی جنگ شروع ہوئی سی۔ ایس ویڈیو چ ویکھو کہ دُنیا دے حالات توں کیویں ثابت ہوندا اے کہ آخری زمانہ شروع ہو گیا اے:‏

 1914 چ خدا دی بادشاہی نے اسمان تے حکمرانی شروع کر دِتی سی تے ایس بادشاہی نے سب توں پہلا کم ایہہ کیتا کہ ایہنے شیطان اِبلیس تے بُرے فرشتیاں نُوں اسمان توں کڈھ دِتا تے اوہناں نُوں زمین تے سُٹ دِتا۔ (‏مکاشفہ 12:‏7-‏12‏)‏ انساناں تے شیطان دا اثر ایس گل توں نظر آندا اے کہ بوہت سارے لوکاں دے رویے تے کم بوہت ای بھیڑے نیں جدی وجہ توں آخری زمانے چ زندگی بوہت مشکل ہو گئی اے۔—‏2-‏تیمُتھیُس 3:‏1‏۔‏

 بوہت سارے لوک ایس آخری زمانے دے مشکل حالات دی وجہ توں بڑے پریشان نیں۔ اوہ ایس گل بارے بوہت فکرمند نیں کہ معاشرہ وِگڑدا جا رہیا اے۔ کجھ لوکاں نُوں تے ڈر اے کہ کِتے انسان اِک دُوجے نُوں ختم ای نہ کر دین۔‏

 پر کجھ ایہو جہے لوک وی ہے نیں جیہڑے اَج کل دے حالات توں پریشان نیں پر اوہناں نُوں اِک چنگے مستقبل دی امید وی اے۔ اوہناں نُوں خدا دے ایس وعدے تے پورا یقین اے کہ بوہت چھیتی اوہ اپنی بادشاہی چ دُنیا دے ساریاں مسئلیاں نُوں حل کر دے گا۔ (‏دانی‌ایل 2:‏44؛‏ مکاشفہ 21:‏3، 4‏)‏ اوہ صبر نال خدا دے ایس وعدے دے پورے ہون دا اِنتظار کر رہے نیں۔ نالے اوہ یسوع دی ایس گل توں تسلی حاصل کر رہے نیں کہ جیہڑا آخر تک ثابت‌قدم رہے گا، اوہ نجات پائے گا۔—‏متی 24:‏13؛‏ میکاہ 7:‏7‏۔‏