Nä. Jehova siene Zeijen sent nich doajäajen, sikj imfen to loten. Wie seenen daut soo, daut jieda Christ daut selfst entscheiden kaun. Väle von Jehova siene Zeijen haben sikj aul imfen loten.

 Wie räakjnen daut väl, wan wie eene feine Doktarie kjrieen, un sent sea dankboa doafäa, daut et met de Doktarieen aul soo wiet veraunjekomen es, daut se kjennen jäajen schlemme Krankheiten schaufen. Wie schazen daut, daut de Doktasch sikj soo aunstrenjen un äa bastet jäwen, besonda, wan doa schwoare Tieden sent.

 Jehova siene Zeijen rechten sikj no soone, waut äwa de Doktarie aunjestalt sent. Biejlikj haben dee von dan aus de COVID-19-Krankheit aunfunk, emma wada de Menschen opp äare Websied opp hundade Sproaken toojerot, sikj aun de Aunwiesungen von äare Jäajent to hoolen, woo see sikj fa de Krankheit beschitzen kjennen. Doa wudden de Aunwiesungen met en sennen, sikj uteneen to hoolen, nich en Gruppen tooptokomen, fa eene jewesse Tiet von de aundre oppoat bliewen (quarantining), sikj de Henj wauschen, Mulschutz brucken un aundre Sachen, waut de Rejierunk velangt ooda toorot (Reema 13:1-2).

 Fa väl Joaren haben Jehova siene Zeijen en äare Bieekja opp dän Gruntsauz hanjewäsen:

•   Aules, waut met Doktarieen to doonen haft, es eene perseenelje Entscheidunk (Galata 6:5).

   “[Dit Heft] rot kjeenem too, jewesse Medizien to nämen ooda met jewesset to doktren un jeft uk kjeene Aunwiesungen doaräwa. Doa woat eefach jesajcht, woo de Sach steit, un jieda eena kaun dan selfst entscheiden, waut hee doamet deit” (Erwachet! vom 8. Feebawoa 1987).

   “Aus jie un june Kjinja junt wellen imfen loten, es june perseenelje Entscheidunk” (Erwachet! vom 8. Nowamba 1965).

•   Wie loten ons doktren, wäajen wie daut Läwen fa sea wieetvoll talen (Aposteljeschicht 17:28).

   “Jehova siene Zeijen loten sikj von eenen Dokta halpen, wan dee krank sent. Dee räakjnen daut Läwen sea väl un doonen aules, waut see kjennen, om lenja to läwen, soo lang aus daut nich jäajen de Schreft es” (Der Wachtturm vom 1. Nowamba 1975).

   “Jehova siene Zeijen nämen wellich Medizien un loten sikj doktren. Dee wellen eene goode Jesuntheit haben un soo lang aus mäajlich läwen. Eenje von dee sent mau rajcht Doktasch, soo aus Lukas, waut eena von de ieeschtemmasche Christen wia. . . . Jehova siene Zeijen sent deejanje sea dankboa, waut sikj soo flietich om de aundre äare Jesuntheit kjemren. Un dee schazen daut sea, wan dee an halpen, daut see sikj wada bäta feelen” (Der Wachtturm vom 1. Feebawoa 2011).