De Schreft sajcht nich, daut Harmagedon een Kjrich es, waut bloos en eene jewesse Jäajent sennen woat. Oba no de Schreft no es daut een Kjrich äware gaunze Welt tweschen aule menschelje Rejierungen un Gott.

•   “Beese Jeista . . . gonen no de Kjennichs opp de Ieed äwa de gaunze Welt, dee to dän aulmajchtjen Gott sien grooten Dach toom Kjrich to saumlen. . . . See saumelden dee opp dän Plauz toop, dee opp hebräisch Harmagedon heet” (Openboarunk 16:14, 16, PB).

 “Harmagedon” kjemt von daut hebräische Wuat Har Meghiddon, un daut bediet “Boajch von Megiddo”. Ieeschtemma wia Megiddo eene Staut en daut Launt Israel un doawäajen jleewen eenje Menschen, daut de Kjrich von Harmagedon uk en Israel sennen woat. Oba de Jäajent von Megiddo es väl too kjlien toom de Kjennichs von de gaunze Welt un dee äare Soldoten toopsaumlen. Un uk en kjeene aundre Jäajent en de Lenda runtom Israel wudd fa dee aula Rum sennen.

 Daut Bibelbuak Openboarunk es “en Tieekjens” jeschräwen; daut sent Bilda, waut waut väastalen sellen (Openboarunk 1:1, NW). Daut bediet, daut Harmagedon nich werkjlich eene Städ es. Oba daut jeit doarom, daut aule Velkja oppe gaunze Welt sikj toopstonen, om sikj toom latste mol jäajen Gott siene Rejierunk to stalen (Openboarunk 19:11-16, 19-21).