“Aus ekj noch kjlien wia, deed mien Brooda mie jieda Dach vekjielen, tonuschtmoaken un dommsajen. Aus ekj mie dan ieescht befriet haud, dan wia miene Schwieemutta krakjt soo domm to mie. Miene Schwieeelren deeden mie soo behaundlen, aus wan ekj dee äa Sklow wia. Ekj docht äwa mie daut Läwen nämen” (Madhu, a Indien).

 De World Health Organisation sajcht: “Aulawäajen oppe Welt woaren Frues grausom un schlajcht behaundelt.” Dee sajcht uk, daut meist jieda dredde Fru irjentwanea en äa Läwen grausom behaundelt ooda sexuell mesbrukt woat.

 Väle woaren bloos doawäajen soo schlajcht behaundelt, wäajen daut Frues sent. Wan du soon Schlemmet hast must beläwen, dan hast du nu veleicht emma eene groote Angst, daut die irjentwäa wada waut aundeit. Un woomäajlich späat sikj die daut soo, daut de Frues fa de mieeschte Menschen nuscht wieet sent. Oba woo es daut fa Gott? Sent Frues fa Gott waut wieet?

 Waut de Schreft sajcht: “Gott muak … Maunsmensch uk Frumensch” (1. Mose 1:27).

 Waut daut bediet: Gott haft Mana un uk Frues jemoakt. Beid vedeenen Respakjt. Un Gott velangt von de Mana, daut dee äare “Frues jrod soo goot sennen” sellen, aus dee sikj selfst sent (Efeesa 5:33). Gott well nich haben, daut een Maun siene Fru kontrollen saul, un besonda nich met grausome Wieed ooda derch schlajcht behaundlen (Kolossa 3:19). Aun aul dit es kloa to seenen, daut et fa Gott sea wichtich es, daut Frues sikj kjennen secha feelen.

 “Aus ekj noch kjlien wia, deeden waut von mien Frintschoft mie sexuell mesbrucken. Aus ekj dan 17 Joa oolt wia, wull mien Wieet mie bemotten, Sex met am to haben, aus wan nich, wudd hee mie aufsajen. Un bie groot muaken aundre mie tonuscht, biejlikj mien Maun, miene Elren un miene Nobasch. Oba dan lieed ekj von Jehowa b, onsen Schepfa. Hee deit Frues ieren. Doaderch kunn ekj mie secha sennen, daut hee mie leeft un daut ekj fa am sea väl wieet sie” (Maria, Argentinien).

 Waut de Schreft sajcht: “Doa es een Frint dee fausta biesteit aus een Brooda” (Spricha 18:24).

 Waut daut bediet: Een gooda Frint woat die unjastetten. Späat sikj die daut soo, daut die daut veleicht halpen kunn, met wäm doaräwa to räden, woo du die feelst? Dan räd met wäm, opp dän du vetrust.

 “Ekj hilt daut fa 20 Joa stell un säd daut kjeenem, daut ekj wia bekleift worden. Met de Tiet wort ekj doawäajen mootloos un must aune Narfen lieden. Oba aus ekj dan entlich met wäm äwa daut Schlemme räd, waut ekj beläft haud, feeld ekj mie väl leichta” (Elif, Turkei).

 Waut de Schreft sajcht: “Schmiet aul june Sorjen opp … [Gott]; hee sorcht fa junt” (1. Petrus 5:7).

 Waut daut bediet: Gott horcht opp iernst too, wan du to am bäden deist (Psalm 55:23; 65:3). Hee es werkjlich om die bekjemmat, un doawäajen woat hee die halpen to vestonen, daut du sea wieetvoll best.

 “Waut ekj beläft hab, haft miene Jefeelen sea jeschot. Oba aus ekj Jehowa kjanen lieed, wort daut langsom bäta. Nu kaun ekj mie to Gott utschedden. Hee es soon Frint fa mie, waut miene Jefeelen krakjt vesteit” (Ana, Belize).

 Waut de Schreft sajcht: “Jehowa, . . . du woascht doafäa sorjen, daut de Weisenkjinja un de Unjadrekjte jerajcht behaundelt woaren, soo daut de stoafelja Mensch vonne Ieed dee nich mea Angst moaken kaun” (Psalm 10:17-18, NW).

 Waut daut bediet: Boolt woat Gott met jieda Sort Ojjerajchtichkjeit een Enj moaken – uk doamet, daut Frues grausom un schlajcht behaundelt woaren.

 “Ekj lieed, daut Jehowa boolt doafäa sorjen woat, daut Frues un Mejales nich mea schlajcht behaundelt woaren. Daut deed mie bloos sea berujen! Daut jeef mie ennalich Fräd” (Roberta, Mexiko).

 West du mea weeten äwa de Hopninj ut de Schreft, wuarom du opp dise Vespräakjungen vetruen kaust un woo Jehowa siene Zeijen die nu aul derch de Bibel halpen kjennen? Dan froag eent von Jehowa siene Zeijen, aus dee no die komen well.

 Disen Artikjel raufloden toom opp Papia utdrekjen.