Ekj sie en Paddington, London, Enjlaunt jebuaren. Daut es eene Städ, wua de Menschen sea dicht toop wonen. Ekj un miene Mame un miene dree elre Sestren wonden toop. Mien Voda wia lang nich emma tus, wäajen hee soo väl drinkjen deed.

Aus ekj kjlien wia, lieed miene Mame mie, jieda Zeowes to bäden. Ekj haud een Bibelkje, wua bloos de Psalmen bennen wieren. Un dan muak ekj mie Mellodieen opp, daut ekj dee sinjen kunn. Ekj läsd mol en een Buak eenen Sauz, waut ekj nich vejäten kunn. Doa säd daut: “Eenen Dach woat doa nich mea een morjen sennen.” Wäajen dise Wieed must ekj de Nacht waka ligjen un doaräwa nodenkjen, waut nochmol komen wudd. Ekj docht soo: “Es dit Läwen aules? Wuarom läw ekj verheipts?” Ekj wull nich stoawen!

Ekj wort nieschierich no Jeistawäsen. Ekj proowd, met de Doodes to räden un jinkj uk met Frind von de School toop nom Kjoakjhoff. Un wie kjikjten jreselje Films. Dee räajden ons sea opp, oba to deeselwje Tiet gruld wie ons uk.

Aus ekj noch mau tieen Joa oolt wia, wort ekj sea goaschtrich. Ekj funk aun Tobbak to schmieekjen un wort uk sea boolt doavon aufhenjich. Lota funk ekj uk aun, Marihuana to schmieekjen. Aus ekj alf Joa oolt wia, funk ekj uk aun, stoakjet to drinkjen. Ekj jleicht daut nich, woo daut schmakjt, oba ekj jleicht daut, woo sikj daut späad. Ekj jleicht uk Spell to horchen un to daunzen. Ekj nuzt jieda Jeläajenheit ut, no Fasten to wanken. Ekj schlikjt mie de Nacht rut un kjeem plietsch trigj, ea daut zemorjes wia. Un wäajen ekj dän näakjsten Dach meed wia, jinkj ekj foaken goanich no de School. Un wan ekj dan mol no de School jinkj, dan deed ekj foaken opp Pause stoakjet drinkjen.

Aus daut Schooljoa derch wia, wia de Schoolliera sea ontofräd, wäajen ekj nich väl jelieet haud. Un doawäajen wort miene Mame daut en, daut ekj sea goaschtrich wia un dan wia dee uk sea ontofräd un doll äwa mie. Wie zankten ons un dan veleet ekj von tus. No daut wond ekj een Stoot bie mienen Jung, Tony. Hee deed stälen un Droggs vekjeepen un wia bekaunt doafäa, daut hee aundre tualeiden deed. Goanich lang no daut, sull ekj een Kjint haben. Un aus ekj 16 Joa oolt wia, haud wie dan ons ieeschtet Junkje.

Daut ieeschte Mol lieed ekj Jehova siene Zeijen kjanen, aus ekj opp eene Städ wond fa onbefriede Mitta un äare Bäbes. Waut Rejierungsbeaumte hauden mie jeholpen, doa eene Stow to kjrieen. Twee Sestren von Jehova siene Zeijen kjeemen pinkjlich eenje von de junge Mames doa besieekjen. Eenen Dach räd ekj uk met dee. Ekj wull dee bewiesen, daut Jehova siene Zeijen orrajcht wieren. Oba dee läden mie aules ruich un kloa met de Schreft ut, waut ekj weeten wull. Dee wieren soo leeftolich un daut jleicht ekj. Doawäajen funk ekj aun, met dee toop de Schreft to studieren.

Boolt lieed ekj dan waut von de Schreft, waut mien Läwen veendad. Von junk aun haud je ekj Angst fa stoawen. Oba nu wort ekj en, waut Jesus äwa daut oppstonen von de Doodes lieed (Johanes 5:28-29). Ekj lieed uk, daut Gott om mie bekjemmat wia (1. Petrus 5:7). Un waut ekj besonda sea jleicht, wia daut, waut Jeremia 29:11 (PB) sajcht: “Ekj hab daut goot äwajedocht, sajcht de HAR, un waut ekj fa junt jeplont hab, es Fräd un Erfolch, un nich Schoden. Ekj well junt eene Tookunft un Hopninj jäwen.” Un dan funk ekj daut uk aun to jleewen, daut ekj kunn fa emma en een Paradies oppe Ieed läwen (Psalm 37:29).

Jehova siene Zeijen weesen mie opp iernst Leew. Aus ekj toom ieeschte Mol bie een Toopkomen wia, feeld ekj mie doa sea wool. Aule wieren soo leeftolich! (Johanes 13:34-35). Daut wia gaunz aundasch, aus se mie en miene Kjoakj behaundelt hauden. Endoont, waut ekj fa een Läwen fieed, de Zeijen neemen mie fein opp. Dee neemen sikj Tiet fa mie, dee kjemmaden sikj om mie un holpen mie met väl Sachen. Mie späad sikj daut soo, ekj wia nu Poat von eene groote leeftolje Famielje.

Aus ekj de Schreft studieed, wort ekj en, daut ekj daut Läwen, waut ekj fieed, wudd motten endren, wan ekj mie wull aun daut hoolen, waut Gott fa rajcht talt. Daut wia goanich soo leicht, opptohieren met schmieekjen. Ekj wort uk en, daut mie daut noch dolla foddad, Marihuana to schmieekjen, wan ekj wesset Spell horcht. Un doawäajen deed ekj leewa aundret Spell horchen. Un wiels ekj mie nich besupen wull, jinkj ekj nich mea no de Fasten, wua ekj wudd kjennen en Vesieekjunk komen. Ekj funk uk fresche Frind, waut mie halpen kunnen, mien Läwen to endren (Spricha 13:20).

To deeselwje Tiet haud Tony uk aunjefongen, met Jehova siene Zeijen toop de Schreft to studieren. Wiels dee am aul siene Froagen met de Schreft utlajen kunnen, wia hee sikj uk secha, daut daut de Woarheit wia, waut hee lieed. Hee haft sien Läwen sea jeendat: Hee veleet siene Frind, waut met Jewault to doonen hauden, hee hieed opp met stälen un deed uk nich mea Marihuana schmieekjen. Wiels wie soo läwen wullen, aus Jehova daut velangt, word wie ons eenich, daut wie nich mea wullen bloos toopläwen. Aune 1982 befried wie ons dan, un wie wullen je uk onsen Sän een sechret Famieljenläwen jäwen.

Ekj weet noch, daut ekj no Artikjels socht em Woaktorm un uk em Woat waka!, * wua daut von soone Menschen rät, waut äa Läwen haben kunt endren, soo aus ekj uk must. Dise Läwesjeschichten to läsen, jeef mie sea väl Moot un Krauft, daut ekj nich wull oppjäwen. Un ekj bäd uk to Jehova, daut hee mie sull halpen, wiedatomoaken. Un en Juli 1982 leeten Tony un ekj ons dan aus eent von Jehova siene Zeijen deepen.

Met Jehova Frind woaren, haft mie daut Läwen jerat. Tony un ekj haben daut selfst beläft, woo Jehova ons en schwoare Tieden unjastett haft. Wie lieeden en schwoare Tieden opp Gott to vetruen un wie weeten, daut hee onse Famielje emma jeholpen un biejestonen haft (Psalm 55:23).

Fa mie wia daut eene Freid, onsen Sän un onse Dochta to halpen, Jehova kjanen to lieren, soo aus ekj uk hab. Un krakjt dee Freid hab ekj uk, wan ekj see, daut onse Grootkjinja uk Gott kjanen lieren.

Nu ligj ekj nich mea waka em Bad un sorj mie äwa daut, waut lota komen woat ooda äwa dän Doot. Tony un ekj sent emma drock. Jieda Wäakj reis wie no veschiedne Vesaumlungen von Jehova siene Zeijen toom dee Moot moaken. Wie schaufen met de Breeda toop un lieren aundre Menschen, daut dee uk kjennen fa emma läwen, wan dee aun Jesus jleewen.