WAN du eenje Joaren trigj wurscht sennen no eene kjliene Insel en Indoneesien jereist, waut Sangir Besar heet, wurscht du doa veleicht dree von onse Sestren aune Kaunt Mäa jeseenen haben. Dee sent doafäa bekaunt, daut see de Menschen doa halpen, de Bibel bäta to vestonen. Oba dan jroz deeden dee nich prädjen; dee schauften waut aundret.

Daut ieeschte jinjen dee em Mäa nenn un sochten no groote Steena un druagen dee no de Kaunt Mäa. Eenje Steena wieren soo groot aus een Footbaul. Dan saden dee sikj opp heltane Steela dol un kjielden de Steena met Homasch twei, daut dee kjlanda wieren aus een Heena-Ei. Dan deeden dee de fienjehakte Steena en Plastikj-Amasch nenn un druagen dee no Hus; doatoo musten dee opp eene Trap nopp. Dan deeden see de Steena en Sakj nenn, waut se lota opp eenen Trock nopploden kunnen. Dise Steena worden jebrukt toom Wäaj moaken.

Eent von dise Sestren wia Hulda. See haud mea Tiet toom dise Oabeit doonen aus de aundre Sestren. Daut Jelt, waut see doamet vedeend, brukt see jeweenlich toom daut kjeepen, waut de Famielje jieda Dach fäld. Oba nu schauft see doaropp, daut see sikj noch waut aundret kjeepen kunn. See wull sikj een Tablet kjeepen, daut see de JW Library^®-App brucken kunn. Hulda wist, daut de Videos un uk aul daut aundre en de App ar halpen wudd, bäta to prädjen un de Bibel uk bäta to vestonen.

Fa eent un eene haulwe Moonat schauft Hulda jieda Dach zemorjes twee Stund, bat see soo väl Steena tweijekjielt haud, daut see kunn eenen naten Trock voll loden. Un entlich haud see soo väl Jelt, daut see een nieet Tablet kjeepen kunn.

Hulda sajcht: “Ekj wia sea meed un mie deed aules wee. Oba aus ekj mien nieet Tablet em Prädichtdeenst brucken kunn un mie fa de Toopkomes leichta reedmoaken kunn, vegaut ekj meist fuaz von miene Weedoag.” See sajcht uk, daut daut Tablet ar en de Tiet von de COVID-19-Krankheit togood kjeem, wiels see kunn met de Vesaumlunk vebungen bliewen un sikj fa de Toopkomes un dän Prädichtdeenst aunknekjen. Wie freien ons, daut Hulda äa Tablet kjrieech.