Fa Nicolas un Céline, waut von daut Betel en Frankreich no eene fresche Vesaumlunk jeschekjt worden, wia waut aundret schwoa. Dee sajen: “Ieeschtlich wia wie sea oppjebrocht, oba lota bangd wie ons no onse Frind. Wie wieren noch nich sea vebungen met de Breeda en onse fresche Vesaumlunk.” a Daut kaun schwoa sennen, sikj to eene fresche Vesaumlunk wanen. Soo, waut kaun die halpen, die doa tus to feelen? Waut kjennen aundre doatoo doonen? Waut kjenn jie doonen, om junt unjarenaunda opptomuntren?

VEA GRUNTSAUZEN, WAUT DIE HALPEN KJENNEN

1. Velot die opp Jehowa (Psa. 37:5). Kazumi, eene Sesta en Jaupaun, jehieed aul fa 20 Joa to eene Vesaumlunk. Oba aus äa Maun wäajen siene Oabeit aundatwäajen hantrakjen must, must see de Vesaumlunk wakjslen. Woo wees see, daut see sikj opp Jehowa veleet? See sajcht: “Ekj schedd mie emma wada ut to Jehowa un säd am daut, daut ekj mie Sorjen muak, mie auleen feeld un groote Angst haud. Un jiedatsmol, wan ekj bäd, jeef hee mie de Krauft, waut mie fäld.”

Woo kaust du die noch dolla opp Jehowa veloten? Krakjt soo aus eene Plaunt Wota un goode Ieed fält, daut dee waussen kaun, krakjt soo fält dienen Gloowen daut aun jeisteljet Wota un Noarunk, daut dee stoakja woaren kaun. Waut holp Nicolas, von dän wie ea aul räden, sikj secha to sennen, daut Jehowa am halpen wudd? Hee docht äwa daut Biespel von Abraham, Jesus un Paulus no, waut aula veschiednet oppjäwen musten, om Gott sienen Wellen to doonen. Wan eena uk pinkjlich  de Bibel studieet, woat eena nich bloos kjennen met dee Schwierichkjeiten foadich woaren, waut en eenem sien Läwen oppkomen, oba eena woat uk soont lieren, waut eena brucken kaun, om de Breeda en de fresche Vesaumlunk Moot tootospräakjen.

2. Vejlikj nich dise Vesaumlunk met diene väaje (Liera 7:10). Jules must sikj to eene gaunz niee Kultua wanen, aus hee von Benin no de Stäts trock. Hee sajcht: “Mie späad sikj soo, ekj must jiedrem eenen, dän ekj kjanen lieed, aules vetalen, waut ekj en mien Läwen beläft haud.” Wäajen hee daut nich jewant wia, wull hee nich mea met de Breeda un Sestren toop sennen. Oba aus hee dee bäta kjanen lieed, kjikjt hee doa aundasch naun. Hee sajcht: “Nu jleew ekj, daut de Menschen äwa de gaunze Welt äwareen sent. Dee räden un vehoolen sikj bloos een bät aundasch. Dauts wichtich, daut wie dee soo aunnämen, aus dee sent.” Doawäajen sell wie onse fresche Vesaumlunk nich met onse väaje vejlikjen. Anne-Lise, eene Pionia-Sesta, sajcht doatoo: “Ekj trock wajch, wäajen ekj waut Nieet beläwen wull un nich, wiels ekj docht, daut aules wudd krakjt äwareen sennen.”

De Eltestasch sellen uk nich äare fresche Vesaumlunk met äare väaje vejlikjen. Wan doa waut aundasch jedonen woat, bediet daut oba nich, daut daut orrajcht es. Daut wudd kluak sennen, ieescht doamet bekaunt to woaren, woo daut en dee Jäajent es, ea dee äwa waut eene Iedee jäwen (Liera 3:1, 7b). Dauts väl bäta, daut eena de Breeda met sien ieejnet Biespel waut lieet, aus daut eena dee prooft to bemotten, soo to denkjen, aus eena deit (2. Kor. 1:24).

3. Moak enne Vesaumlunk met (Filip. 1:27). Daut brukt väl Tiet un Krauft, wan eena omtrakjen deit. Oba dauts doawäajen wichtich, daut eena soo schwind aus mäajlich bie de Vesaumlunk es – wan mäajlich biem Vesaumlungshus. Wiels wan de Breeda von de fresche Vesaumlunk die kjeenmol ooda meist kjeenmol seenen, woo woaren dee die dan unjastetten kjennen? Lucinda un äare beid Dajchta trocken no eene groote Staut en Siedafrika. See sajcht: “Mie wort toojerot, goode Frind to woaren met de Breeda von dee Vesaumlunk, met dee toop em Deenst to gonen un bie de Toopkomes mettomoaken. Wie säden uk, daut see de Toopkomes fa dän Prädichtdeenst kunnen en ons Hus haben.”

Met de Breeda toop bie soone Sachen mettomoaken, woat junt halpen, junt unjarenaunda opptomuntren. De Eltestasch rooden Anne-Lise, von dee wie ea aul räden, too, met jiedrem eenen von de Vesaumlunk toop to prädjen. Woo kjeem daut ut? See sajcht: “Ekj wort meist fuaz en, daut et eene groote Help es, daut eena sikj kaun tus feelen en eene fresche Vesaumlunk.” Wan eena de Breeda weeten lat, daut eena reed es, daut Vesaumlungshus reintomoaken un to unjahoolen, dan wiest daut, daut eena dise Vesaumlunk nu aus siene ieejne sitt. Je dolla du metmoakst, je scheena woat die un de Breeda daut gonen.

4. Moak die doa uk goode Frind (2. Kor. 6:11-13). Om aundre bekjemmat sennen, es de  baste Wajch, Frind to moaken. Nemm die aulsoo goot Tiet, ver un no de Vesaumlunk met de Breeda to räden un dee bäta kjanen to lieren. Proow, dee äare Nomes em Denkj to hoolen. Wan du eena best, met dän leicht to räden jeit un de aundre äare Nomes em Denkj helst un frintlich best, dan woaren dee die wellen bäta kjanen lieren un jie woaren goode Frind woaren.

Dauts bäta, daut de Breeda die soo kjanen lieren, aus du best un nich, daut du die vestalst, daut dee die jleichen sellen. Doo daut uk soo aus Lucinda, waut sajcht: “Wie looden aundre en, no ons to komen, un sent doaderch goode Frind jeworden.”

“NÄMT JUNT UNJARENAUNDA OPP”

Fa eenje kaun daut schwoa sennen, en een Vesaumlungshus nenntokomen, waut gaunz voll framde Menschen es. Woo kaust du soone daut leichta moaken, waut eene Vesaumlunk wakjslen? De Apostel Paulus rot ons too: “Nämt junt unjarenaunda opp, krakjt soo aus Christus junt oppjenomen haft” (Reem. 15:7). Wan de Eltestasch Christus nodoonen, kjennen dee soone halpen, daut dee sikj enne Vesaumlunk maklich feelen. (See daut Hock “ Waut mott doa jedonen, wan doa wäa de Vesaumlunk wakjselt?”) Oba aule kjennen methalpen – mau rajcht de Kjinja – daut de Niee sikj tus feelen.

Wie kjennen uk methalpen, daut de aundre sikj maklich feelen, wan wie dee biejlikj no ons kroagen ooda dee aundasch Help aunbeeden. Eene Sesta toom Biespel neem sikj Tiet un wees eene aundre Sesta, wua aules wia enne Staut un woo see met eene Boss ooda Zuach opp un dol foaren kunn. De Sesta jinkj daut sea to Hoaten, un daut holp ar, sikj doa tus to feelen.

EENE JELÄAJENHEIT, EM JEISTELJEN VERAUNTOKOMEN

Krakjt soo aus een Grausshoppa mieremol mott ut siene Schluw rutkrupen, ea dee flieejen kaun, krakjt soo mott wie aule Sorjen loosloten, waut ons doavon aufhoolen, mea em Deenst fa Jehowa  to doonen, wan wie de Vesaumlunk wakjslen. Nicolas un Céline sajen: “Wajchtrakjen wia eene goode School. Daut wie ons to aundre Sorten Menschen un eene aundre Jäajent wanen kunnen, must wie noch aun aundre Ieejenschoften schaufen.” Jean-Charles, wua wie aum Aunfank von räden, sajcht, woo siene Famielje daut togood kjeem: “En onse fresche Vesaumlunk kjeemen onse Kjinja veraun un kjeemen Jehowa noda. No een poa Moonat haud onse Dochta en daut Toopkomen enne Wäakj aul Schiela-Oppgowen un ons Sän wort een ojjedeepta Vekjindja.”

Waut kaust du doonen, wan diene Omstend daut nich tooloten, wua hantotrakjen, biejlikj doa, wua daut aun mea Help fält? Du wurscht dit biejlikj kjennen en diene Vesaumlunk nokomen, wua wie nu von jerät haben. Dan woat sikj die daut soo späaren, daut du en eene fresche Vesaumlunk best. Velot die opp Jehowa un hool die drock enne Vesaumlunk, doaderch daut du met aundre toop em Deenst jeist, niee Frind kjanen lieescht un bätre Frind woascht met dee, waut du aul kjanst. Wurscht du de Niee ooda soone, waut daut aun Help fält, kjennen Help aunbeeden? Wäajen de Christen aun de Leew to kjanen sent, woascht du Jehowa noch noda komen, wan du aundre halpst (Joh. 13:35). Du kaust die äwa eent secha sennen: “Daut sent Opfa, dee Gott jefaulen” (Heb. 13:16).

Väle Christen sent no eene fresche Vesaumlunk jetrocken, wan daut uk nich leicht wia, un dee sent schaftich. Krakjt soo kaust du daut uk! Anne-Lise sajcht: “De Vesaumlunk wakjslen haft mie jeholpen, mea Leew to wiesen.” Kazumi es sikj nu gaunz secha, “daut wan eena wajchtrakjt, woat Jehowa eenem opp soone Wäaj halpen, waut eena nich ea beläft haft.” Un woo denkjt Jules? Hee sajcht: “De Frind, waut ekj doa nu hab, halpen mie, daut ekj mie doa gaunz tus feel. Ekj feel mie nu soo vebungen met de Vesaumlunk, daut mie daut wudd schwoa sennen, wan ekj doa sull veloten.”