Vejäwen meent, daut vejäten, waut doa jeworden es, un nich beleidicht bliewen. Vejäwen meent nich, daut eena daut fa goot talt, wan doa wäa waut orrajchtet jedonen haft, un uk nich, daut eena daut soo talt, daut et newers passieet es.

WAUT DE SCHREFT SAJCHT: “Vedroacht eena dän aundren, un vejäft junt unjarenaunda, wan wäa eene Kloag jäajen dän aundren haft” (Kolossa 3:13).

Aaron sajcht: “Wan eena wäm leeft, dan kjikjt eena nich no dän siene Fäla, oba eena kjikjt dolla no daut, woo dee sikj prooft to vebätren.”

Wan du beleidicht blifst, dan kaust du die selfst Schoden aundoonen, kjarpalich un uk ennalich. Du kaust doaderch uk dienen Ehestaunt schoden.

Julia sajcht: “Eemol fruach mien Maun mie om togoodhoolen, wiels hee mie sea beleidicht haud. Daut wia fa mie schwoa, am to vejäwen. Oba met de Tiet deed ekj daut. Un nu es mie daut schod, daut ekj daut nich ea deed. Daut gaunze haud onse Ehe onneedich väl toojesat.”

UNJASIEEKJ DIE SELFST

Daut näakjste Mol, wan dien Ehepoatna die beleidicht haft wäajen waut, waut dee säd ooda deed, dan denkj äwa dit no:

• “Sie ekj väl too neiw?”

• “Es daut soo oajch, daut dee mie om togood hoolen froagen mott ooda kaun ekj daut bloos vejäten?”

RÄD MET DIENEN EHEPOATNA ÄWA DIT

• Woo lang dieet ons daut jeweenlich, bat wie ons vejäwen?

• Waut kjenn wie doonen, daut daut nich soo lang dieet, bat wie ons vejäwen?

EEN ROT

• Wan du beleidicht best, dan denkj nich fuaz, daut dien Ehepoatna daut schlemm jemeent haft.

• Nemm dienen Ehepoatna daut nich fa schlemm auf. Denkj leewa: “Wie loten ons aula veschiednet to schulden komen” (Jakobus 3:2).

Kimberly sajcht: “Daut es leicht to vejäwen, wan beid Schult haben. Oba daut es schwanda, wan bloos eena de Schult haft. Stolt sennen moakt daut schwoa, aundre togood hoolen, wan dee eenem doano froagen.”

WAUT DE SCHREFT SAJCHT: “See, daut du . . . schwind äwareen kjemst” (Matäus 5:25, JHF).